Nanortalik pilertortumik namminiilivinnissamik piumasaqartoq

Kalaallit Nunaata namminiilivinnissaanut inatsit tunngaviusussaq pillugu Nuummi Kujataanilu innuttaasunik ataatsimiititsinerni sisamani oqarasuaatit angallattakkat attavii atorlugit taasinerni kisitsisit ataatsimut kisinneqarsimalerput.

Apeqqut aalajangiisuulluinnartoq tassaavoq Kalaallit Nunaata namminiilivinnissaanut ulloq sorliussanersoq, tassani ataatsimeeqataasut pingasunik toqqaasinnaallutik: 1) Ukiut 0-imit qulit qaangiuppata, 2) Ukiut qulit 30-llu akornanni qaangiuppata aamma 3) Ukiut 30-t sinneqartut qaangiuppata.

Innuttaasunik ataatsimiititsinerit nunap inuinut sinniisuusutut oqaatigineqarsinnaanngillat, taamaattorli maluginiagassaalluni Nanortalimmi ataatsimiigiartut namminiilivinnissap sukkanerpaamik atuutilernissaanut taasisimammata. Nunatsinni illoqarfiit kujasinnerpaartaanni ataatsimeeqataasut 75 procentii ukiut qulit ingerlaneranni (2024-2034) namminiilivinnissamut kissaateqarlutik taasisimapput, 25 procentillu ukiut qulit 30-llu akornanni qaangiuppata (2034-2054) namminiilivinnissaq kissaatigaat. Nanortalimmi ataatsimeeqataasut arlaannaataluunniit 2054-imut utaqqinissaq kissaatiginngilaa.

Sermitsiaq Nuummi innuttaasunik ataatsimiititsisoqarmat peqataavoq, Kujataanili peqataanani. Taamaattumik Nanortalimmi pilertortumik namminiilivinnissamut tunngavilersuutit ilisimanngilavut, kisiannili isumaliutersuutigineqarsinnaasoq tassaavoq oqartussaaqataanikkut sanngiillisimasutut misigisimaneq. Kommunit 2009-mi aaqqissuuteqqinneqarnerisigut »illoqarfiit borgmestereqarfiusut« 18-init sisamanut ikilineqarput; ullumikkut tallimaallutik. Illoqarfiit »borgmestereqarfiusimasut« kommunit kattunneqarnerisa kingorna innuttaminnit qimagarneqarput taakkunanilu aalajangiisarnerit pisarunnaarlutik. Nanortalik ullumikkut 1.105-inik inoqarpoq – innuttaasullu ikiliartuinnarlutik.

Pissutsit maanna atuuttut periarfissatut isigineqanngillat. Danmarkimiillu sukkasuumik avissaarluni namminiilivinnissamut angerneq Nunatsinni pissaaneqarnerup aaqqissuussaanerata allanngortinneqarnissaanik kissaateqarnertut aamma paasineqarsinnaavoq.

Ujartorneqartoq: Kulturikkut naleqartitat

Vivian Motzfeldtip Inatsit Tunngaviusussaq pillugu isumalioqatigiissitap sulinerata kingorna, inatsit tunngaviusussatut siunnersuutigineqartoq pitsaasutut taavaa, aammali amigaateqartoq isumaqarluni.

- Siuleqummi taaneqartoq eqqaasanngikkaani, kulturikkut naleqartitat ilaatigut inatsit tunngaviusussatut siunnersuummi ilanngunneqarsimanngitsut, Vivian Motzfeldtip maluginiarpaa.

Tamatuma akerlianik innuttaasunik ataatsimiititsinerni peqataasut kulturikkut naleqartitat oqallisigerusuttorujussuuaat.

Apeqqutit aalajangersimasut marluk tunngavigalugit tamanna pivoq. – Nunatsinni suut ataatsimuulersittarpaatigut; inuiattut suut assigiissutigaavut?

Tamanna apeqqut Nuummi ersarissumik akineqarpoq: Oqaatsit ataatsimoortippaatigut.

– Kulturikkut naleqartitat suut inatsimmut tunngaviusussamut ilanngussinnaavavut; kulturikkut naleqartitavut inatsimmi tunngaviusussami qanoq illersorsinnaavavut?

Nuummi apeqqut oqallisigineqarluarpoq, eqimattakkaartut akimorlugit akissutigineqarluni inuiaqatigiit siamasissumik aaqqissuussaaneranni inuiaat kalaallit aamma Nunatsinni pinngortitap illersorneqarnissaat.

Aamma Vivian Motzfeldtip oqallittoqarluarnera soqutiginartutut isigaa.

- Kulturikkut naleqartitat soqutigineqarnerat innuttaasunik ataatsimiititsinerni tullerni taamaaginnassanersoq maluginiarluartariaqarparput.

Nunarput Manerassuarmi qeqertaanngilaq

Qeqertat Cook Øerne New Zealandimut kiffaanngissuseqarlutik suleqatigiinnissamut isumaqatigiissuteqarput. Aamma kalaallit angalatitaasa qeqertat Manerassuarmiittut 1990-ikkunni paasisassarsiorfigaat, naalagaaffiit kiffaanngissuseqartut akunnerminni suleqatigiinnerminni qanoq misilittagaqarnersut paaserusunneqarluni.

Nunatsinni namminersorneq pillugu isumalioqatigiissitap 2000-imit 2003-mut atuuttup aamma qallunaat/kalaallit namminersorneq pillugu isumalioqatigiissutaata (2004-2008) namminersornerulluni oqartussaanermut taarsiullugu nunat kiffaanngissuseqarlutik suleqatigiissinnaanerat oqallisigisaanut ilaavoq. Politikerit soorlu Naleqqameersup Pele Brobergip aamma Siumumeersup Kuno Fenckerip kiisalu Ilisimatusarfimmi ilisimatusartut aamma Danmarkimi nunanut allanut tunngasunut misissuisoqarfimmeersut oqallisigisarpaat kiffaanngissuseqarluni suleqatigiinnissamut periarfissat, tamatumani Nunatta naalagaaffittut namminersortutut nunamik allamik qanittumik suleqateqarsinnaanera oqallisigineqartarluni. Inatsit tunngaviusussatut siunnersuummi nunat kiffaanngissuseqarlutik suleqatigiissinnaanerat toqqaannartumik taaneqanngilaq, paragraf 44-mili taaneqartutut Naalakkersuisut Inatsisartunit piginnaatinneqarlutik oqartussaaffiup ilaanik tunniussinissamut isumaqatigiissuteqarsinnaapput.

Tamanna tassaasinnaalluni kiffaanngissuseqarluni suleqatigiinneq. Piffissami kingullermi Manerassuarmi qeqertap Palauip aamma USA-p kiffaanngissuseqarluni suleqatigiinnermut assersuutitut taaneqartarput.

Taamaattorli Manerassuarmit Ikersuarmut Davis-imut ungaseqaaq. Innuttaasunik ataatsimiititsinerni sisamaasuni Nunatta naalagaaffittut namminiilivinnissaa ajugaatinneqarpoq, tassa Danmarkimik imaluunniit nunamik allamik suleqateqarluni. Vivian Motzfeldt soqutigisaqaqatigiinnik Narsami ataatsimeeqateqarmat, peqataasut Nunatta naalagaaffittut namminiilivinnissaa 100 procentimik taperserneqarpoq.

Akerliusut aamma tikilluaqqusaasut

Naleqqap siulittaasuata Pele Brobergip aviisimi matumani sapaatip akunnerani kingullermi saqqummersumi oqaatigaa, inuiaat kalaallit namminiilivinnissaq piumasarigaat, Nunatsinni najugaqartut tamarmiunngitsut.

Aamma Inatsit tunngaviusussaq pillugu isumalioqatigiissitaq partiinit illuatungiliuttunit sakkortuumik isornartorsiorneqarpoq, isumaliutissiissummik suliaqarnerminni ukiut arfinillit aamma 30 millionit koruunit atorsimammatigik, siunnersuutaallu naammaginanngitsut taagorlugu. Tamannali Vivian Motzfeldtip uniffiginianngilaa:

- Ataatsimiigiaqataasut ilaat allanit pingaarnerunngillat, aamma inatsit tunngaviusussatut siunnersuummut isumaqataasut akerliusullu tamarmik innuttaasunik ataatsimiititsinernut tikilluaqqusaapput. Vivian Motzfeldt piffissami aggersumi Avannaani innuttaasunik ataatsimiititseqattaassaaq.