POLITIIT
Nanortalimmi nanoq
Nanortalimmi nanoq ullaaq manna takussaavoq. Kalaallit Nunaanni Politiit nakkutilliisuisa pisortaat, Anette Ostenfeldt oqaluttuarpoq inunnut saassussiniarsimanngitsoq aammalu illoqarfimmit qimagutitinneqarsinnaasimasoq.
Annonse
Kalaallit Nunaanni Politiini nakkutilliisut pisortaat, Anette Ostenfeldt oqaluttuarpoq nuna tamakkerlugu sapaatip-akunnerata naanera ataatsimut isigalugu eqqissisimanarsimasoq.
Taamaattorli aamma oqaluttuarpoq arfininngornerup ullaavani Nanortalimmi nanoq illoqarfiup iluani takussaaleraluarsimasoq.
- Kalaallit Nunaanni Politiinut nalunaarutiginnittoqarsimanngilaq, taamaattorli nannup najuussimanera arajutsinngilarput, taanna oqaluttuarpoq.
Inuit attaveqaqatigiiffiinik alakkarneqarneratigut paasinarsivoq, inuit arlallit nanoq takusimagaat maliginiarnarpoq, qujanartumillu Aviaaja aamma Kornelius Nanortalimmeersut assiliisimanerisigut, ullaaq manna nanortalimmiut pissanngatigisaat assitalerlugu takutissinnaavarput.
Nanoq qimaatinneqarsinnaasimavoq
Nalunaarutiginnittoqarsimanngikkaluartoq, innuttaasut politiillu suleqatigiillutik nanoq Nanortalimmit qimaatissinnaasimavaat.
- Nannup illoqarfimmit sapinngisamik ungasinnermaamut qimagutitinnissaa qulakkeerniarlugu nanoq immamut pissimmat umiatsiaaqqat ilaasa malersorlugu qimaatissinnaasimavaat, Anette Ostenfeldt oqaluttuarpoq.
Nanoq taanna piffissami matumani sikorsuit takkummatali nannut arlalissuit Nunatta Kujataani illoqarfinnut pulatertut ilagiinnarpaat. Tassami illoqarfinni allani aamma nanorsuit takussaasarput akuttunngitsumik.
- Qujanartumik ajoqusertoqanngilaq, kisianni maluginiarparput piffissami matumani nannut Kujataani najugaqarfinnut takkuttartut, immaqa ingerlaarnerminni nerisassaqarluartarsimanngitsut, kisianni tamanna pillugu nannut pillugit ilisimatuut aperigussigit pitsaanerussaaqq, Kalaallit Nunaanni Politiit nakkutilliititaasa pisortaat, Anette Ostenfeldt naggataatigut oqarpoq.
