Nappaanersiorneq: Nunatsinni kræftimik nappaateqartut namminneq illoqalersut
Nunatsinni kræftimik napparsimasut illussaat nutaaq 2026-p aasaanerani aatsaat piariissaaq. Tallimanngormalli peqatigiiffiit suliniuteqarnermi peqataasut Nuummi sanaatornerup siuariarnera nalliuttorsiuutigaat.
Neriuffiit Kattuffiata siulittaasua Elisabeth Lynge Hansen, Kræftens Bekæmpelsimilu pisortaq Jesper Fisker, Nunatsinni kræftimik siunnersuisarfissap siulliup – Kræftimik nappaatillit Illuannik - nappaanersiornerani najuupput.
Assiliisoq: Kræftens Bekæmpelsi
Ukiuni arlalinni
pilersaarusiortoqareersoq toqqavik kuineqarpoq, iikkallu napparneqarlutik.
Nunatsinni kræftertunut qanigisaannullu ataatsimut illu siunnersuiffik siulleq
– Kræftimik nappaatillit Illuat – Nuummi tallimanngornermi
nappaanersiorneqarpoq. Taama Kræftens Bekæmpelse tusagassiuutinut
nalunaarummini allappoq.
Suliniut
Neriuffiit Kattuffiata, nunarput tamakkerlugu kræftimik napparsimasut
peqatigiiffiisa Danmarkimilu Kræftens Bekæmpelse suleqatigiillutik ingerlappaat.
– Ajoraluartumik
Kalaallit Nunaanni kræfti annertuumik atugaavoq, napparsimasullu amerlasuut
qanigisaallu apeqqutinik ajornakusoortunik ilerasunnermillu nalaanneqartarput,
amerlasuutigullu katsorsartikkiartorlutik ungasissumut angalasariaqartarput.
Kræftimik napparsimasut Illoqalernerisigut siullermeerluta ataatsimut,
toqqissisimanartumi erseqqarissumillu peqatissaagut, tassanilu
ikiuisoqarsinnaavoq, ilisimasaqartoqarluni ataatsimoortoqarlunilu.
Illuutitsinnut kusanartumut tikilluaqqusinissarput assorsuaq qilanaaraarput, Neriuffik
Kattuffiata siulittaasua, Elisabeth Lynge Hansen oqarpoq.
Dronning Ingridip Napparsimavissuata, SANA-p Nuummiittup eqqaani kræftimik napparsimasut illuat sanaartorneqarpoq.
Assiliisoq: Neriuffik Kattuffiat
Pilersaarutit
naapertorlugit illu 2026-p aasaanerani naammassissaaq tassanilu
siunnersuisarfeqassaaq nunatsinnilu kræftimik napparsimasut kattuffiat,
Neriuffiit Kattuffiat qullersaqarfeqassaaq.
Kræftimik
nappaateqartut illuat Danmarkimi Kræftens Bekæmpelsip kræfti pillugu
siunnersuisarfianit isumassarsiaavoq, nunatsinnilu pisariaqartitanut
nalimmassagaavoq. Illu Nuummi Dronning Ingridip nappaasimavissuata – nunatsinni
kræftimik napparsimasut katsorsarneqarfituaata - eqqaani qaamasumik
eqqissisimasumillu sinaakkusiissaaq.
Napparsimasunut
qanigisaasunullu ikorfartuinermik neqerooruteqarnerup saniatigut, kræftimik
napparsimasut illuat aamma nunarput tamakkerlugu kræftimik ilisimasanik
siaruarterinermi pingaarutilimmik suliaqassaaq. Taama Jesper Fisker, Kræftens
Bekæmpelsimi pisortaaneq, nappaanersiornermi Nuummut peqataajartortoq
oqaluttuarpoq.
– Kræftimik
napparsimasut Illuat Kalaallit Nunaanni kræftimik akiuiniarnermi qitiulissasoq
neriuutigaarput. Siunnersuineq ornigulluni attaveqaatillu atorlugit
ingerlanneqassaaq, taamaalilluni nunaqarfinni isorliunerusunilu inuttaasut
ajornannginnerusumik ikorfartuinermut ilisimasanillu
periarfissaqalersinnaaqqullugit, taanna oqarpoq.
