Napparsimasut naammagittaalliorsinnaanerat annertusineqarpoq
Napparsimasut naammagittaalliuuteqarsinnaanerat taarsiiffigineqarsinnaanerallu ulloq 14. februaari 2025 atuutilissasoq aalajangerneqarpoq.
Napparsimasut katsorsarneqarnertik pillugu naammagittaalliorsinnaalissapput. Siornatigut naammagittaalliorniaraanni inuk aalajangersimasoq pineqartarpoq.
Assi: Leiff Josefsen
Innuttaasut peqqinnissaqarfimmi katsorsarneqarsimasut naammagittaalliorusukkunik imaluunniit taarsiivigineqarnissamik piumasaqarsinnaallutik isumaqartut maanna naammagittaalliornissamut periarfissaqalerput.
Napparsimasut kukkusumik katsorsarneqarsimasorisut naammagittaalliuuteqarsinnaanerat taarsiiffigineqarsinnaanerallu tallimanngornermi februaarip 14-ianni atuutilissaaq.
Namminersorlutik Oqartussat nalunaarutigaat.
- Peqqinnissaqarfimmi passussinermut atatillugu ajoqusersimanermut taarsiivigitinnissap suliarinissaanut Inatsisip atuutilersinneqarnera ilaatigut ajornannginnerulersitsissaaq, peqqinnissaqarfimmilu katsorsarneqarneq pillugu naammagittaalliuutigineqartut suliarinissaannut ajornannginnerulersitsissaaq.
Imminut sullinneq
Namminersorlutik Oqartussat napparsimasut naammagittaalliorsinnaanerat taarsiiffigitinnissamullu piumasaqarsinnaanerat ajornannginnerulersinniarlugu suliniuteqarput.
Peqqinnissaqarfimmi ajoqusernerit kukkunerillu pillugit maalaaruteqarnermut taarsiissuteqarnissamullu piumasaqarsinnaaneq Sullissivik.gl-imi nammineerluni imersorneqarsinnaalissaaq.
Siornatigut naammagittaalliuuteqaraanni inuk aalajangersimasoq eqqaaneqartariaqartarpoq, inatsilli nutaaq naapertorlugu napparsimasut katsorsarneqarnertik naammaginngikkunikku naammagittaalliuuteqarsinnaalissapput.
Napparsimasut naammagittaalliuuteqarsinnaanerat taarsiiffigineqarsinnaanerallu pillugit Inatsisartut Inatsisaat atuutilermat tamanna periarfissaalertoq Namminersorlutik Oqartussat ilisimatitsipput.
