NATO-p illersornissamut anguniakkat nutaat akueralugillu Issittoq ukkatarinerulissagaa
Nato-p nunat illersornissamut ministeriisa sisamanngornermi ataatsimiinneranni isumaqatigiissutigineqarpoq ataatsimoortumik nukittorsaanissamut anguniagassanik annertusaanissaq - tassunga ilanngullugu Naalagaaffeqatigiit Danmark-ip Arktis-imi inissisimanera.
Illersornissamut ministerip Troels Lund Poulsenip USA-mi suleqatini, Pete Hegseth, sisamanngormat ataatsimiinnermi oqaloqatigigaa.
Assi: Yves Herman/Reuters/Ritzau Scanpix
NATO-mi nunat Bruxellesimi ataatsimiinnerminni nunat ilaasortaasut ataasiakkaat illersornissamut tunngatillugu qanoq iliuuseqartariaqarnerat pillugu anguniagassanik nutaanik ullumi akuersipput. Kunngeqarfiup Danmarkip Issittumi ukkassinerunissaminut pilersuinissaanut piumasaqaatit annertusineqassapput.
Illersornissamut anguniakkat sukumiisut isertuunneqarput, piumasaqaatilli annertusineqartut illersornissamut ministeriaqarfik tusagassiutitigut nalunaarummi allappoq:
- Piumasaqaatit isumannaallisaanermut politikkimut tunngassuteqarput, annertusingaatsiarneqassappullu – ilaatigut Kunngeqarfiup Danmarkip Issittumi inissisimaffia eqqarsaatigalugu, nalunaarummi allassimavoq.
NATO-p Issittumi akisussaaffii pingaartinneqarnerulersut
NATO Issittumi Atlantikullu avannaani sunniuteqarnerussasoq, aamma Europa iligiinni suliassanik annertunerusunik kivitseqataassasoq ministereqarfik ilanngullugu allappoq, tamannalu illersonissami anguniakkani nutaani erserpoq.
- Illersornissamut anguniakkat nutarsakkat NATO-p Issittumi akisussaaffiini sammineqarnerulernerat naammagisimaarpara. Tamanna Kunngeqarfimmut pingaaruteqarpoq.
- Illersornissamut anguniakkat nutarsarnerisigut Europa isumannaallisaanermini annerusumik akisussaaffeqalissaaq. Tamanna Europap Atlantikullu illuatungaani nunanut allanut attaveqarnerinut iluaqutaavoq, illersornissamut ministeri Troels Lund Poulsen oqarpoq.
Illersornissamut anguniakkat nutaat Danmarkip Kalaallit Nunaanni suliniuteqarneranut qanoq sunniuteqassanersut suli ilisimaneqanngilaq. Danmarkip ilaatigut umiarsuit sorsuutit sorliit ukiuni tulliuttuni aningaasaliiffigineqassanersut allajangerniarlugu illersornissamut anguniakkat utaqqeqqaarsimavai.
Rutte: Silaannakkut illersorneq, raketsit sakkutuullu
Donald Trumpip Kalaallit Nunaata tiguarnissaanut aqunnissaanullu tunngavilersuutaani Kalaallit Nunaata isumannaatsuuneranut apeqqut qitiuvoq. Nunagisami nunanilu tamalaani isumannaatsuuneq eqqarsaatigalugu USA-p Kalaallit Nunaat pisariaqartikkaa Trump arlaleriarluni oqarpoq.
USA-p aamma nunat Nato-mi ilaasortat allat illersornissamut aningaasartuutinik amerlisitsinissaannik kimigiiserfigai.
Ritzau naapertorlugu NATO-p generalsekretæria Mark Rutte ullumi ataatsimiinnissamut iseriartornermini ima oqarpoq:
- Illersorniarluta sakkussiat silaannakkut illersornermut atortut, missilit ungasissumut ingerlasinnaasut, nakkutilliinermut atortorissaarutit sakkutuullu nunamiittut amerlasuut pisariaqartippagut.
- Taamaaliussagutta aningaasaliingaatsiartariaqarpugut, Mark Rutte ataatsimiinnissaq sioqqullugu oqarpoq.
