Navianartorsiortoqarsinnaanera aarlerinarmat Israelimut angalasoqassanngikkallartoq nunanut allanut ministeriaqarfik kajumissaarivoq
Hizbollah-p aamma Israelip akornanni akerleriinnerup sakkortuseriarnerata kingunerisaanik Israelimiissinnaanermut isumannaallisaanikkut navianartorsiortoqarnerulerpoq.
Israelimut amerlanerusunik qaartartunik nassiussisoqarpoq, amerlanertigut Iron Dome-mit illersuutitigut pisarineqartarlutik. (Toqqorsivimmit assilisaq qaartartumik saassussisoqarnerani).
Jalaa Marey/Ritzau Scanpix
Nunanut allanut Ministereqarfiup Israelimut angalanissat tamarmik unitsinneqarallassasut kajumissaarutigaa, Hizbollah-p Libanonimeersup aamma Israelip akornanni sorsunnermi sakkortuumik annertusinissaa aarlerinarmat.
Taama allappoq Nunanut allanut Ministereqarfik angalanermut ilitsersuummi nutarterneqaqqammertumi.
Tamanna sioqqullugu ministeriaqarfiup innuttaasut kiffartuussiviata pisariaqanngitsumik angalanissat mianersoqqussutigisimavai, maannali mianersoqqusineq qaffanneqarpoq.
Hizbollah-p aamma Israelip akornanni akerleriinneq annertusiartorpoq Gaza-mi sorsunnerup ingerlanerani.
Sisamanngornermi Hizbollah oqaluttuarpoq, 200-nit amerlanerusunik qaartartunik aamma timmisartunik qarasaasiat atorlugit qaartartulinnik Israelimi sumiiffinnut assigiinngitsunut arlalinnut nassiussisimallutik.
Hizbollah-mit oqaatigineqarpoq, tamanna Israelip saassussineranut akissutaasoq, pingasunngornermi sakkutuut qullersartaasa ilaata toqutaaneranut atatillugu, nutaarsiassaqartitsivik AFP allaaserisaqarpoq.
Nunanut allanut ministeriaqarfik naliliivoq, Israelimi isumannaallisaanermut inissisimaneq ajorseriarsinnaasoq "takorluukkamiit sukkanerujussuarmik imaluunniit nalunaaruteqarani periaannaasoq".
Taamatuttaaq angallannikkut periarfissat nunamit pineqartumit aninissamut timmisartukkut angallassinikkut unitsinneqarsinnaapput imaluunniit annertuumik killilersorneqarsinnaallutik.
Ataatsimut isigalugu pissutsit imaannaanngitsut pissutigalugit nunanut allanut ministeriaqarfik ikiorsiisinnaanngilaq Danmarkimeersunut Israelimiittunut. Sorsuffimmit qimagunniarneq taamaalilluni nammineq akisussaaffigineqartussaalluni.
Misissueqqissaartartut naliliipput Israel, Iran imaluunniit Hizbollah Libanonimi sorsuttoqarnissaa kissaatiginngikkaat.
Qaammat kingulleq Hizbollahip siuttua, Hassan Nasrallah, aarlerisaarilluni oqaluppoq. Tamanna pivoq, ilaatigut illersortitik Syriami, Irakimi aamma Yemenimi eqqarsaatigalugit sorsunneqarnissamut peqataarusuttut nalunaaruteqarluni.
Taamaalilluni Israelip siusinnerusukkut illersornissamut ministeria Benny Gantz mianersoqqusivoq, Israelip illersornissaaqarfia Hizbollahip sakkutuuisa piginnaassutsimik "ulluni arlalinni" aserorsinnaagaa.
Yitzhak Gershon, Israelip avannaani sakkutuujunngitsup tullersortaa oqarpoq, The Economistimut oqarluni, Israel Hizbollahip qinngornerinik unitsitsisinnaanngippat, anguniagaassasoq tassa "Libanonip naalagaaffia toqqavia tikillugu aserortissallugu".
Tamanna pissappat Gaza sanilliutissagaanni "paradisetut isikkoqassaaq", taanna oqarpoq.
/ritzau/
