Netanyahu peqqussuteqarpoq Gazami sakkortuumik saassussisoqassasoq

Israelip ministeriunera, Benjamin Netanyahu, nunap sakkutuuinut peqqusivoq "piaarnerpaamik"  Gazami sakkortuumik saassussissasut.

Ministeriuneq oqaaseqaateqarluni taamak nalunaartoq, Reuters allappoq.

- Piareersimaneq pillugu ataatsimiinnerit kingorna ministeriuneq Netanyahu sakkutuut Gazami piaarnerpaamik saassussinissamik peqqusivoq, ministeriunerup allattoqarfianit AFP naapertorlugu avammut nalunaarutigineqarpoq.

Taamatut nalunaarneq pivoq Netanyahup kingumut Hamas eqqisseqatigiinnissamut  isumaqatigiissummik unioqqutitsinerarlugu pisuutimmagu.

Netanyahup nalunaaruteqarnerata kingorna Gazap innuttaasunut illersornissaqarfia nalunaarpoq minnerpaamik pingasoriarluni Israelip timmisartuutaanik saassussisoqartoq.

Israelip sakkutuui naapertorlugu Hamas eqqisseqatigiinnissamik isumaqatigiissummik unioqqutitsivoq Israelip sakkutuui killeqarfiup sungaartup tungaanut saassussineratigut, tassanilu Israelip sakkutuui tunuarsimapput eqqisseqatigiinnissamut isumaqatigiissut naapertorlugu.

Reuters taamak allappoq.

Hamasip sakkutuui naapertorlugu marlunngornermi tiguakkat timaasa tunniunneqarnissaat kinguartinneqarpoq, Israelip eqqisseqatigiinnissamik isumaqatigiissummik unioqqutitsisimaneragaanera pissutaatillugu.

Netanyahup ullup ingerlanerani Hamas pisuutippaa tiguakkat timaannik utertitsinani allat timaannik tunniussinerarsimallugu.

Taamaattumik tiguagaasimasup timaa Israelip sakkutuuisa siusinnerusukkut nassaaraat sorsunnerup ingerlanerani toqutaasimasup timaa.

Israelsip sakkutuuisa Hamas aamma pisuutippaat "pisuusaarnerarlugit" tiguagaasimasup timaanik ujarlertoqarnerani.

- Peqqarniisaarniat Hamasikkormiut Røde Korsimit sinniisut aggersarpai, pisuusaarlutik toqutaasimasup timaanik nassaarsimanerarlutik takutitsillutik, AFP naapertorlugu taamatut nalunaartoqarpoq.

Israeliamiut tusagassiorfiisa dpa naapertorlugu nalunaarutigaat sorsunneq Gaza kujataani Rafah qanittuani ingerlanneqartoq.

Oktoberip qulingani Hamasip Israelillu akornanni eqqisseqatigiinnissamik isumaqatigiissut atuutilerpoq.

Eqqisseqatigiinnissamik isumaqatigiissuteqartoqaraluartoq suli nalunaarutigineqartarpoq sakkussiat atorlugit aporaattoqartoq israeliamiut silaannakkut saassussinerat Gazami. Hamasip aamma Israel pisuutippaa eqqisseqatigiinnissamik isumaqatigiissut unioqqutinneqarsimanerarlugu.

Kingullertigut ataasinngornermi nalunaarutigineqarpoq Gazami napparsimmavimmit, inuit marluk toqutaasimasunik pingasullu ikiligaasimasut illoqarfimmi Absan al-Kabira-mi israeliamiut saassussineranni .

Taama allappoq tyskit tusagassiorfiat dpa.

Israelsip sakkutuuisa tusagassiorfimmut ilisimatitsissutigaat, inuit taakku "killeqarfimmik sungaartumik" taakku qaangiisimasut.