New
Yorkimiit biilinik nunarsuaq kaajallallugu angalaneq.
Ilisimasassarsiorlutik
angalasut Transglobal Car Expedition-imik taaguutillit taama
pilersaaruteqarput.
New
Yorkimiit biilinik nunarsuaq kaajallallugu angalaneq.
Ilisimasassarsiorlutik
angalasut Transglobal Car Expedition-imik taaguutillit taama
pilersaaruteqarput.
Sermersuarli itivillugu biilernissamik pilersaaraluarnerat
iluatsinngilaq.
TRANSGLOBAL CAR EXPEDITION SUNAAVA?
Transglobal
Car Expedition tassaavoq nunarsuaq tamakkerlugu misigasassarsiorluni angalaneq,
tassani ilisimasassarsiortut immikkullu ilisimasallit nunarsuaq kaajallallugu
angalaqatigiillutik. Sumiiffiit avinngarusimasuniittut sakkortuumik
avatangiisillit ilisimasassarsiorfiginissaat siunertaavoq, inuit teknologiillu
qanoq angusaqarsinnaatiginerannik misileraajutigaluni ilisimatusarnermik
avatangiisinullu tunngatillugu siuarsaaneq siunertaalluni.
Politiit
pisortaata Bjørn Tegner Bayip politiit siorna suliaannik oqaluttuartillugu
tupigusuleraluttuinnarpunga. Politiit pisortaat nammineq
oqaluttuarsimanngitsuuppat upperisimassanngikkaluarpara. Allaannginnami
Hollywoodimi pissanganartuliaralugu filmi oqaluttuariinnaraa. Piviusumili
pisimasuuvoq.
Taamaattumik
Issittumi ilisimasassarsiornermi biilinik sermersuaq itivillugu angalaneq
tusagassiuutitigut sammineqarpiarsimanngimmat politiit pisortaata
tupigusuutigaa.
Bjørn Bayip
oqaluttuarisinnaasai killeqarput, oqaluttuarli naallugu atuareerukku suut
oqaatigisimannginnerai immaqa eqqarsaatigissavat.
Ingilluartitaariarlutit
tusarnaarluarit.
Issittumi
biilerluni ilisimasassarsiortut Avannaanukaarlutik aallareersimasut Kalaallit
Nunaanni Politiit apriilimi 2024-mi eqqumaffigilerpaat.
Angalaqatigiit
13-it missaanniittut Transglobal Car Expeditionimik ateqarput,
amerlanerpaartaallu russiullutik. Taakku Qalasersuaq aqqusaarlugu
Sermersuakkoorlutik immikkut ittunik biilinik ingerlaarniarput. Biilit
sakkortuumik motoorillit soorlu nunakkoorutaasinnaasut imaluunniit lastbiilitut
sakkortutigisunik motoorillit silarluttumut, issittorujussuarmut,
kiattorujussuarmut maniitsukkullu ingerlaarsinnaanngorlugit
tulluarsarneqarsimasunik.
Suut
tamarmik ajorput
Ilisimasassarsiorluni
angalaneq New Yorkimiit Canadakkoorluni Nunavuullu avannarpasissuatigut
pissasoq siunertaavoq. Qalasersuaq kaajallallugu kujammut Sermersuaq
aqqusaarlugu Kangerlussuarmukassallutik.
- Kalaallit
Nunaata avannarpasissuani politiit iliuuseqarnissaannut suliaq annertuvoq,
taakkumi iseqqusaanngillat. Akuersissuteqarniarnerat ajorpoq, Bjørn Bay
oqarpoq, nangillunilu:
-
Ilisimasassarsiornissamut akuersissummik pissarsisoqartariaqarpoq, nunamut
isernissamut allagartaqartariaqarpoq nunami eqqissisimatitaavoq.
Akuersissuterpassuit pisariaqarput, Kalaallit Nunaannut Schengenimullu
isernissamut visumeqarnissaq pisariaqarluni. Suut tamarmik ajorput, Bjørn
Tegner Bay oqarpoq.
Politiit
suliaqarnerat Kalaallit Nunaata avannarpasinnersaaniit Station Nordimut
apriilip naalernerani maajillu aallartinnerani pivoq. Sumiiffik apeqqutaalluni
attaveqatigiinniarneq ajornakusoortarpoq taamaattumillu Kalaallit Nunaata
Politiivinit sumiiffimmukartoqartariaqarluni.
Bjørn Bayip
saniatigut Katrine Sandgreen peqataavoq aqutsisuulluni. René Jakobsenilu
periaatsimut akisussaalluni.
Taakkua
saniatigut Issittumi Sakkutooqarfimmit Station Nordimiittut qimussimillu
alapernaarsuisut Sirius ikiuussinnaalluarput.
-
Suliaqarneq nukippassuarnik atuiffiuvoq, iluatsilluarlunili, oqarpoq.
Sermitsiaq.gl
maajimi 2024-mi ima paasissutissiivoq:
-
Ilisimasassarsiortut nunatsinni angalanissaannut itigartitsinermi
Naalakkersuisut peqqutigaat ilisimasassarsiortut ajornartuussagaluarpata
ikiuiartorfissaq tikikkuminaattussaammat.
Inuulluarisi
Alapernaarsuisut
Siriusikkut - illersornissaqarfiup immikkoortortaqarfianni nakkutilliisut
Kalaallit Nunaanni Politiinit politiitut sulisinnaanngorlugit
pisinnaaffilernikuummassuk illersornissaqarfiup politiillu suliassaannik
suliaqarsinnaasut – ilisimasassarsiortut Qalasersuup avannaanut sikumut
apuummata attaveqarfigigaat Bjørn Bayip AG-mut oqaluttuaraa.
-
Ilisimasassarsiortut Kalaallit Nunaanniinnissaat kissaatigineqannginnerannit
politiinit paasissutissaq Siriusip alapernaarsuisuisa apuuppaat. Oqarput
uternissamut naammattunik taquaqaratik. Taamaattumik Station Nordimut
ingerlaaqquneqarput, oqarpoq.
Ilisimasassarsiortut
arlaatigut unioqqutitsinissaat pinaveersaartinniarlugu Station Nordimut
ingerlaarnerat Siriusip alapernaarsuisuinit nakkutigineqarpoq.
-
Ilisimasassarsiorlutik angalasut nunakkoorlutik biilerujussuarnik
tulleriillutik tikiummata Station Nordimukaallugit ingerlaqatigaavut, tassanilu
nunamut isernissamut, kinaassutsimut uppernarsaataat misissorneqarput,
allagartaqarnersut sakkunillu nassataqarnersut misissorneqarlutik.
-
Amerlanersaat nunami allamiut pillugit inatsit naapertorlugu
itigartinneqartarput. Kunngeqarfimmi kissaatigineqanngitsut nunamillu
qimatsisariaqartut paasitinneqarput. Aqqullu ataasiinnaq atorsinnaavaat. Tassa
Svalbardimiit timmisartumut pinngitsaalillugit ikisinneqarlutik, Bjørn Bay
oqarpoq peqataasunilu marluinnaat visum-eqartut ilanngullugu oqaatigalugu.
- Suliami
matumani Namminersorlutik Oqartussat, Illersornissaqarfiup politiillu
suleqatigiinnerat nuannaarutigeqaara, soorluttaaq sakkutuut suleqatimalu
pilersaarusiornermi iliuuseqarniarnermilu iliuuserisimasaat kakkageqalugit,
politiit pisortaat naggasiivoq.
Pisorli
pissutigalugu ilisimasassarsiorluni angalaneq unitsinneqanngitsoq
nittartagaanni allassimavoq. Sumut killinnersut sunalu angusimaneraat
takuneqarsinnaavoq. Ilisimasassarsiorneq pilersaarutit malillugit ukioq manna
marsimi/aprilimi naammassineqassaaq.
