NIIK: Ulloq unnuarlu angerlarsimaffinni pissutsit aaqqittariaqarput

Meeraq ulloq unnuarlu angerlarsimaffimmut inissinneqaraangat, angerlarsimaffiup meeqqamut katsorsaanermik eqqortumik neqeroornissaa ajornakusoorsinnaasarpoq. Tamanna ilaatigut isumalluutinik amigaateqarnermik, ilaatigullu meeraq pillugu paasissutissanik amigaateqarnermik patsiseqarsinnaavoq.

Taama Naalakkerusisut ulloq unnuarlu angerlarsimaffiit pillugit ukiumoortumik nalunaarutaanni inerniliussap ilaa nipeqarpoq. Kalaallillu Nunaanni Inuit Innarluutillit Kattuffiata NIIK-ip taamatut nassueruteqarneq akorluarpaa, pisariaqartumillu siunnerfimmik allannguinissaq pillugu suleqatigiinnissamut piffissanngornerarlugu.

AAMMA ATUARUK

Ulloq unnuarlu paaqqinnittarfiit arlalinnik unammilligassaqartut

- Naalakkersuisut ajornartorsiutinik tigusillutik tamanut takusassiinerat iluarisimaarlugulu taperserparput. Maannalu meeqqat, ilaqutariit inuiaqatigiillu tamaasa pillugit siunnerfimmik pisariaqartumik allannguinissamut periarfissaq tigusariaqararput, NIIK-imi siulittaasoq Viggo Johansen oqarpoq.

Periusissiaq marlunnik siunnerfilik siunnersuutigaa

NIIK-ip periusissiamik marlunnik siunnerfilimmik suleqatigiissuteqarnissaq siunnersuutigaa:

1. Ulloq unnuarlu angerlarsimaffinnik ingerlaannaq pitsannguinerit
2. Ungasissumut sammisumik siunnerfimmik allannguineq ilaquttanut qanittuni piffinni aaqqiissutinik

Marlunnik suliniutissanut siunnersuuteqarnermikkut siunissami qanittumi unammilligassanik suliniutit iliuuseqartut, peqatigisaanillu meeqqanut innarluutilinnut angerlarsimaffiup avataanut inissinneqartunut aaqqiissutinik ungasissumut sammisunik inissaqartitsisoqartoq, NIIK isumaqarpoq.

Piffinni inuiaqatigiinnik ineriartortitsinerup aamma meeqqat innarluutillit inuuniarnermikkut atugaannik pitsanngueqataassasoq, NIIK-ip ilanngullugu erseqqissaatigaa.

- Meeqqat – ulloq unnuarlu angerlarsimaffinniinngitsoq - toqqissisimanartunik qanittunillu attaveqarlutik ineriartorluarnerusarput. Taamaammat piffinni inuiaqatigiinnut kulturitsinnut, nunatsinnut pisariaqartitanullu naleqqussakkanik ikorfartuinermut neqeroortunut eqaatsunut aningaasaliissaagut.

- Tamanna meeqqanut pitsaaneruvoq ilaqutariinnilu nukittunerusunik pilersitsisarlutit, peqatigisaanillu tamanna inuiaqatigiit aningaasaqarnerat eqqarsaatigalugu isumatusaarneruvoq. Ulloq unnuarlu angerlarsimaffiit inuk innarluutilik inuiaqataanit avissaartittarpaa, namminerlu inuunerminut aalajangiisinnaassusianik arsaartarlugu. Najugaqartut piffimmi inuiaqatigiinnit attaveqaatiminnullu mattullutik inuusarnerat akulikitsumik nalaatassaasarpoq, taakku isumaqarput.

Akisussaaffik ataatsimoorussaq

Kalaallit Nunaat Naalagaaffiit Peqatigiit Meeqqat pillugit Isumaqatigiissutaannut Inuillu Innarluutillit pillugit Isumaqatigiissutaannut, meeqqat ilaquttatik najorlugit, nammineerlutillu inuiaqatigiinni inuunissamut pisinnaatitaaffeqarnissaannik aalajangersaasunik malinnittussaatitaavoq.

Ilaatigooriarluni meeqqat ulloq unnuarlu angerlarsimaffinnut inissinnissaat pisariaqarsinnaasartoq, NIIK-ip erseqqissarpaa, peqatigisaanillu meeqqat angerlarsimaffimminni pitsaasumik peroriartorsinnaanerisa qulakkeernissaat pillugu iliuuseqartoqarnerusinnaanera tikkuarpaat. Taamaammat ikorfartuinissamut neqeroorutinik eqaatsunik, angajoqqaat akuutinnerisa nukittorsarnissaannik, meeqqat innarluutillit siunissami periarfissaannik pilersitsinissamut kiisalu aalaakkaasuunerup, ikaarsaarnermi ikorfartuinerup attaveqaatillu aalaakkaasut qulakkeernissaannik qulakkeerinissamut NIIK suleqatiserinnippoq.

- Meeqqavut pineqarput – aammali Kalaallit Nunaata siunissaa pineqarpoq. Allannguinissami pisariaqartumi naalakkersuisup Anna Wangenheimip politikikkut siuttuunermik tigusinissaa neriutigaarput. Aaqqiissutinik inunnik, aaqqissuussaniinngitsoq, nukittorsaasunik pilersitsisa, Viggo Johansen oqarpoq.