FN-IP NIVIARSIAQQANUT ULLORITITAA
Niviarsiaqqat siunissaminnut takorluukkaminnik ineriartortitsinissaminnut periarfissaqartariaqarput
Niviarsiaqqat Ulluat malunnartinnagu Naalakkersuisut immikkut sammivaat niviarsiaqqat arnallu inuusuttut taakkununngalu atugassarititaasut. - Niviarsiaqqat nukappiaqqatulli siunissartik pillugu takorluugaqarput, kisianni meeqqat atuarfiannili niviarsiararpassuit takorluugaat aserorneqarlutillu kipitinneqartarput. Suiaassuseq aallaavigalugu naatsorsuutiginnittarneq unitsillugu niviarsiaqqat takorluugaasa piviusunngortinneqarnissaannut periarfissaqartittariaqarpagut, naligiissitaanermut Naalakkersuisoq Naaja H. Nathanielsen oqarpoq.
- Niviarsiaqqat siunissartik pillugu takorluuillutillu toqqissillutik pilersaarusiorsinnaasariaqarput, kanngutsaatsuliorfigitinnermik aqqusaagaqartussaanngillat aamma niviarsiaraanertik piinnarlugu inisseriikkamik inuuneqartinniarsarineqartussaanngillat, taamak oqarpoq Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen (IA).
Assi (toqqorsivik): Leiff Josefsen
NIVIARSIAQQAT ULLUAT PILLUGU
Niviarsiaqqanut ullorititaasoq 2011-miilli ukiut tamaasa ulloq 11. oktober malunnartinneqartarpoq. Ullormi tassani niviarsiaqqat piginnaatitaaffiinik aammalu inuttut pisinnaatitaaffiinik naammassinnittussaatitaaneq immimmut sammineqartarpoq.
Ukioq manna Naalagaaffiit Peqatigiinnit qulequtaritinneqarpoq ”Niviarsiaqqat Siunissamut Takorluugaqarnerat."
1995-mi Arnat pillugit nunarsuarmi ataatsimeersuarnermi Beijing-imi ingerlanneqartumi, ”Beijing-imi nalunaarut aamma iliuusissanut pilersaarut” arnat niviarsiaqqallu pisinnaatitaaffiisa siuarsarnissaannut pilersaarut aatsaat taama siuarsaarusussuseqartigisoq, nunat Naalagaaffinnut Peqatigiinnut ilaasortaasut akueraat.
Beijing-imi nalunaarut, nalunaarutit niviarsiaqqat pisinnaatitaaffiinik immikkuullarissumik erseqqissaaviusut siullersaraat.
Ullumikkut FN-ip niviarsiaqqanut ullorititaa malunnartinneqarpoq nunarsuaq tamakkerlugu, aamma maani nunatsinni. Tassunga atatillugu niviarsiaqqat arnallu inuusuttut aallarnisaaasinnaanermut qullasissumillu atorfeqarsinnaanermut periarfissaat aallaavigalugit Naalakkersuisut malunnartitsipput.
- Niviarsiaqqat arnallu inuusuttut isumannaatsumik, toqqissisimanartumik, peqqinnartumik kiffaanngissuseqarlutillu toqqaasinnaasut ersarilluinnaraluartoq, maani nunatsinni imaluunniit nunarsuarmi taamaaginnartanngilaq. Tamatuma iluarsinissaa pisussaaffigaarput, Naaja H. Nathanielsen (IA) oqarpoq, nangillunilu:
- Nammineq timimut oqartussaassuseqarneq, angerlarsimaffimmi toqqissisimanissamut pisinnaatitaaffeqarneq aammalu suiaassuseq malillugu immikkoortiterneqannginnissamut pisinnaatitaaffeqarneq, nunatsinni niviarsiaqqat arnallu inuusuttut ulluinnarsiutigisariaqaraluarpaat, kisianni ajoraluartumik taamaanngilaq. Tamatuma kingunerisaanik niviarsiaqqat pineqartut periarfissaminnik killilersorneqartarput akimmisaartinneqartarlutillu. Tamanna inuiaqatigiit tamarmiusut annaasaqarfigisarpaat. Takorluugaqarnerit anguniagaqarumanerillu qanoq naatsorsuutiginninneq aallaavigalugu mattunneqarunik ineriartorsinnaajunnaassammata.
Ullumikkut Kalaallit Nunaanni niviarsiaqqat ukioqanngitsuniit 18-it tikilluit ukiullit 7.000-it missaanniipput.
Suliffeqarnermi suiaassuseq aallaavigalugu immikkoortitsisarneq arnallu aallarnisaasinnaanerannut killilersuutit peerneqartariaqarput
- Tamanna Naalakkersuisut suliffeqarnerup suiaassutsinut aggulugaajunnaarsinnissaanik suliaqarneranni pingaarutilittut eqqarsartaatsit ilagaat aammalu arnat aallarnisaasut amerlanerulersinnissaannik anguniagaqarnermut tunngaviulluni, naligiissitaanermut naalakkersuisoq oqarpoq.
Kisianni ullumikkut ukkoq arnat ullorinngilaat, niviarsiaqqat ullorivaat, taamaattumik suliffeqarnermut, aqutsisutut inissisimanermut aamma inuussutissarsiortunngornissamut sammitissallugu toqqarparsi, uffa massa niviarsiaqqat atornerlunneqartarnerat aamma takorluukkatik aserorterneqartarnerat mikisunnguullutilli nalaattaraat?
- Siullertut erseqqissaatigissavara ukioq manna niviarsiaqqanut ullorinneqartumi sammineqartoq tassaammat "niviarsiaqqat siunissamut takorluugaqarnerat". Tamatuma pisussaaffilerpaatigut niviarsiaqqat namminneq siunissaminnut takorluugaqarsinnaanissaminnut inerisaasinnaanissaanik periarfissiineq. Ilisimavarput niviarsiaqqat amerlasuut atuarfianniilli niviarsiaqqatut naatsorsuutigineqartarnerat pissutigalugu immikkoortitsineq aallartittartoq. Taamaattumik inuuneq aallartilaaginnartoq niviarsiaqqat ilinniartinneqartarput, assersuutigiinnarlugu suliffeqarnermi angutit suliassaqarfiisut isigisani, taannalu pissuseq peersinniartariaqarparput, taamaalilluni niviarsiaqqat aamma nukappiaqqat, qanorluunniit suiaassuseqaraluarunik, naligiimmik peroriartorsinnaaqqullugit aamma siunissami takorluugaat pigiinnarsinnaaqqullugit ineriartortissinnaaqqullugillu.
- Kialuunniit takorluukkani kisimiilluni angusinnaanngilai. Suliffeqarnerup suiaassutsinut aggulugaasup atorunnaarsinneqarnissaata sulissutigineqarnerata saniatigut, niviarsiaqqat aqutsisutut atorfininnissamut periarfissaannik qulakkeerinissaq, aammalu pisortat missingersuutaanni niviarsiaqqat nukappiaqqatuullu annertutigisumik iluaquserneqartarnissaat, Naalakkersuisut aamma sulissutigaat. Siunnerfigineqarpoq inuiaqatigiinni kikkut tamarmik suiaassuseq apeqqutaatinnagu imminnut naligiillutik peqataanissamut periarfissaqassasut, Naaja H. Nathanielsen naggataatigut erseqqissaavoq.
