Nordlandair timmisartuussisarnernik amerlanerulersitsiniarluni isumaliutiginnippoq
Timmisartortitseqatigiiffik Nordlandair, Mestersvigimut ilaasunik angallassisartoq, takornariarpassuaqartillugu immikkut timmisartuussisarnissamik periarfissanik misissuisoq, naalakkersuisoq ilisimatitsivoq.
- Takornarissat aqqummik atuinerat ajornartorsiut pitsaasuuvoq. Kisianni innuttaasut eqqugaappata, siunissamut aaqqiissutissamik nassaartariaqarpugut, Ittoqqortoormiiniit Ittoqqortoormiinullu angallannermi ajornartorsiutit pillugit Hans Peter Poulsen oqarpoq.
Assi: Leiff Josefsen
Ilaannikkut takornariat Nordlandairip Islandimiit Tunumut timmisartuussisarnerinut ilaavissat ulikkaartarmatigit, Ittoqqortoormiini innuttaasut illoqarfimminnut utimullu angalanissartik ajornartorsiutigisarpaat.
Pissutsit taamaannerat pissutigalugu Sermersuumi borgmesteri Avaaraq Olsen (IA) pitsaanerusumik aaqqiissuteqartoqarnissaanik kaammattuilluni oqaaseqarpoq.
Suliaq pillugu Nordlandairimik oqaloqateqarsimalluni, attaveqaasersuutinut naalakkersuisoq Hans Peter Poulsen (S), Sermitsiamut oqarpoq.
Nordlandair Namminersorlutik Oqartussanit (taperneqarluni) kiffartuussinissamik isumaqatigiissuteqarluni timmisartuussisarpoq.
Ajornartorsiutit nalunngilai
- Nordlandairip pissutsit allaaserineqartut ilisarisinnaaneraat paaserusullugu attaveqarfigaarput. Upernaakkut ukiassariartulerneranilu inissat ajornartorsiutaalersartut nalunngilai.
- Norlandairimut kiffartuussinissamik isumaqatigiissut malillugu sapaatip-akunneranut marloriarluni timmisartuussisarpoq, tamannalu taakkua isumagisussaavaat. Ukiut tamaasa ajornartorsiut taanna aqqusaartuaannarlugu paasileramikku sapaatip-akunneranut pingasoriarlutik timmisartuussisarsinnaanerlutik misissuleruttorpaat, Hans Peter Poulsen Sermitsiamut oqarpoq.
Piffissaq ungasinnerusoq eqqarsaatigalugu Ittoqqortoormiit Tasiilallu eqqaanni mittarfiliorneq aaqqiissutissaasoq, aammattaaq naalakkersuisoq oqarpoq.
Ittoqqortoormiini innuttaasut ajornartorsiuteqaraangamik NanuTravelimut attaveqartaqqullugit maannakkumut naalakkersuisup kajumissaarpai, taamaalillutik ajornartorsiutit pillugit Nordlandair toqqaannartumik paasissutissinneqartarniassammat.
- Ajornartorsiut pitsaasuuvoq
- Takornarissat aqqummik atuinerat ajornartorsiut pitsaasuuvoq. Kisianni innuttaasut eqqugaappata, siunissamut aaqqiissutissamik nassaartariaqarpugut, Hans Peter Poulsen oqarpoq.
Borgmesterip Avaaraq Olsenip paasissutissaatini naapertorlugit umimmaat arferillu Island aqqusaarlugu assartorneqarsinnaannginnerat aamma isornartorsiorpaa, taamaammallu piniartut aningaasarsiornissamut periarfissaq pingaarutilik annaavaat.
Ajornartorsiut tamanna misissorneqarpoq, Hans Peter Poulsen oqarpoq:
- Maannakkorpiaq suna ajornartorsiutaanersoq naluarput.
- Neqili tunineqareerpat nassiussassatut nassiunneqarnissaa innersuussutigaarput. Nordlandair ajornartorsiuteqalissagaluaruni tamanna misissuiffigiumaarpaa, Hans Peter Poulsen oqarpoq.
