Borgmesteri: Takornariat timmisartoq Ittoqqortoormiinukartoq ulikkaartarpaat
Ittoqqortoormiini innuttaasut timmisartumik bilitsinik pissarsiniarnerat ajornakusoorsinnaavoq, borgmesteri oqarpoq, taamaattoarneranut ilaatigut pissuteqarsorivaa takornariat nunanit allaneersut takornariartitsisartut Constable Pyntimut timmisartortillugit, tassanngaanniillu umiarsuarmik ingerlateqqittarmatigit.
Borgmester Avaaraq Olsen ujartorpaa pitsaanerusumik attaveqarneq Ittoqqortoormiinut.
Leiff Josefsen
Kommuneqarfik Sermersuumi borgmesteri, Avaaraq Olsen (IA), Ittoqqortoormiini tikeraarnermini illoqarfimmi innuttaasunit angallannikkut pissutsit pillugit arlalinnik naammagittaalliuuteqarfigineqarpoq.
Ajornartorsiutaasoq tassaavoq timmisartuussisoqartarnerani inissaqartitaanissap ajornakusoortarnera, tamannalu borgmesterip oqaatigaa kommunimit tikeraarnerminni aamma malugisimagitsik:
- Innuttaasut tamanna ajornartorsiutitut annertutut isigaat. Aamma uppernarsarsinnaavarput Ittoqqortoormiinut bilitsinik pissarsiniarneq ajornakusoortoq.
- Illoqarfik tikeraarniarlugu timmisartumik attartortariaqarsimavugut, Avaaraq Olsen kommunip nittartagaani naapertorlugu oqarpoq.
Borgmesteri naapertorlugu illoqarfimmi piniartut aamma naammaginninngillat, Island aqqusaarlugu usinik angallassinerit pisariaqarmata, tassami umimmaat qilalukkallu Islandikkut aqqusaarunneqaqqusaanngimmata.
- Piniarneq Ittoqqortoormiini namminersorluni inuussutissarsiutitut kisimi periarfissaavoq. Taamaattumik maanna piniartunut akornutaasunik pilersitsisoqarsimanera pitsaanngilaq. Tamanna pitsaanerulersinnaavarput, Avaaraq Olsen oqarpoq.
Avaaraq Olsen maanna innuttaasut naammagittaalliutaat pillugu oqartussaasunut attuumassuteqartunut oqaloqatiginnissaaq.
Naalakkersuisoq Hans Peter Poulsen (S) siusinnerusukkut oqarpoq, nunatta iluani, nunatsinniit nunatsinnullu angalasut takornariartaatsit amerliartornerat pissutigalugu sumiiffiit ilaanni angallannikkut periarfissat amigaataasut, tassami angalasut amerlanerit tikittalersimapput, siornatigut naatsorsuutigineqarsimanngitsut.
