Trumpip Kalaallit Nunaannut tatisinerata nalaani, aaqqissuisuunerup Kalaallit Nunaannut sullissinera pillugu nersornaaserneqartoq

Ebbe Munck nersornaasiuttagaa 2026-mi tunniunneqartussaq, Masaana Egedemut tusagassiortutut sunniuteqarnera pillugu, aamma Kalaallit Nunaanni nutaarsiassaqartitsivinni kisiartaatut namminersortutut Sermitsiami pisortaanertut aaqqissuisuunertullu sulinini aqqutigalugu kalaallinut inuiaqatigiinnut oqaatsit marluk atorlugit eqqortumik paasissutissinneqartarnissaat anguniarlugu suliniuteqartarnera pillugu, nersornaaserneqassaaq.

Taama Ebbe Munck-ip Aningaasaateqarfia tusagassiutitigut nalunaarummi allappoq.

Aningaasaateqarfiup nersornaasiinermut tunngavilersuutaani erseqqissarneqarpoq, nunarsuarmi politikkikkut anorersuarsiortoqarnerani, tassa Donald Trumpip Kalaallit Nunaat tiguarniarnissaanik anguniagaqarnerani Sermitsiap kiffaanngissuseqarluni isornartorsiuisinnaallunilu tusagassiisarnera qitiutinneqarluni tunngavilersuutigineqarnera:

– USA-p præsidentiata Donald Trumpip ivertinneqarnermini oqalugiarnermini Donroe-doktrinimik isumassarsiaq saqqummiummagu, Kalaallit Nunaat USA-p soqutigisaata ilagigaat, tamatumalu saniatigut arlaatigut Kalaallit Nunaat kissaatigalugu oqarmat, kalaaliusutut aamma Sermitsiami pisortaanertut Masaana Egede annertuumik suliassaqalerpoq.

– Taanna Sermitsiarlu amerikamiut soqutiginninnerat pillugu Kalaallit Nunaannut nunarsuarmioqatitsinnullu tamanut ilisimatitsillutillu tusagassiisariaqartarput. Tamanna pivoq Kalaallit Nunaanni qinersisoqarnerata nalaani, matumanilu aamma pineqarput Kalaallit Nunaata namminiilivinnerulernissaanut alloriarnerit tulliuttut sammineqarnissaat, Ebbe Muncks Mindefond allappoq.

Aningaasaateqarfik naapertorlugu kiffaanngissuseqarluni tusagassiorneq isornartorsiuisinnaanerlu tamat oqartussaaqataanerannik kiffaanngissutsimillu illersuineq, Sermitsiap nutaarsiassanik saqqummiussisarnerani takutitsisuuvoq.

– Innuttaasunut, tamatumunngalu atatillugu kalaallinut, paasissutissanik tunngavissaqarluartunik toqqagassaqarnissaat, oqartussallu akisussaatinneqarnissaat aamma salluliornerit eqqunngitsunillu paasissutissiinerit akiornissaat, qulakkeerneqarpoq. Masaana Egedep Sermitsiami pisortaanertut suliassamik tamatuminnga kivitsinermut sulilu kivitseqataaneranut tamanna ataqqinaataavoq, Ebbe Munck Fonden allappoq.

Masaana Egede Fredensborg Slotimi novembarip pingajuanni nersornaaserneqassaaq.

Nersornaat kalaallit nuimasut, soorlu meeqqat illersuisuat Aviâja Egede Lynge 2023-mi politikkerilu Kuupik Kleist 2017-imi siornatigut nersornaasiunneqareerpoq.