NSK-p pinerluttoqarsimanermut misissuisartui Nuummiittut

Arfininngornermi ullaakkut suli paasissutissanik amerlanerusunik Kalaallit Nunaanni Politiinit pissarsisoqarsinnaanngilaq, sisamanngornermi unnukkut, politiit tusagassiorfinnut nalunaarummik nassiussinerisa kingorna, tassanilu oqaatigineqarpoq sisamanngornerup ullaassaani inuk toqungasutut nalilerneqartoq Nuummi najugaqarfimmi nassaarineqarsimasoq. 

AAMMA ATUARUK:

Pasinartumik toqusimasumik Nuummi nassaartoqartoq

Politiit pigaartuisa pisortaat Aputsiaq Hansen tusagassiorfinnut nalunaarummi allappoq politiit, pissutsinut tunngasut misissuinermilu paasineqarallartut tunngavigalugit, suliaq pasitsannartumik toqusoqarsimanertut misissuiffigineqalersoq. 

Aammattaaq politiit ilisimatitsissutigaat, suliamut atatillugu angut 29-nik ukiulik tigusarineqarsimasoq, sisamanngornermilu unnukkut eqqartuussivimmi sassartinneqarluni ulluni 28-ni tigummigallagassanngortinneqartoq. 

Tamatuma malitsigisaanik Sermitsiamit politiit attavigaagut paasinarlugu toqusimasup nassaarineqartup suiaassusaa ukiuilu pillugit paasissutissanik pissarsisinnaanerluta. Kisianni misissuinerup ingerlanera pissutigalugu politiit apeqquterput akissuteqarfigisinnaasimanngilaat.

National enhed for Særlig Kriminalitet Nuummi

Sermitsiamit politiit misissuinerat ungasianiit malinnaaffigaarput. Tallimanngornermi paasivarput National enhed for Særlig Kriminalitet-ip kriminalteknikerii pisimasoqarfittut pasineqartumut apuussimasut. Nalornisiginngilarput taakku Kalaallit Nunaanni Politiit suliaq pillugu misissuinerannut ikiuukkiartorsimasut.

Kriminalteknikerit pinerluttoqarsimaneranik misissuisartuupput, National enhed for Særlig Kriminalitet-imut atasut, taakkulu naalagaaffik tamakkerlugu angalasarput sakkortuumik pinerluttoqarsimatillugu, soorlu toqutsisoqarnerani, pinngitsaaliisoqarsimanerani, qinngasaarisoqarnerani ikuallattoqarneranilu. 

Matumani pineqartoq tassaavoq Nuummi najugaqarfimmi inuk toqungasoq nassaarineqarsimasoq, tassungalu atatillugu 29-nik ukiulik pasineqartoq sisamanngornermi unnukkut tigusarineqarsimasoq tigummigallagassanngortitaallunilu.

Kriminalteknikerit NSK-meersut arfininngornermi unnukkut nalunaaqutaq 22:00 qaangilaaraa pisimasoqarfittut misissorneqartumit anipput, nalunaaqutarlu 23:00-ip missaani politiit assiaqutaat peerneqarput. Taamaalilluni isumaqarnarpoq pisoqarfiusimasumi misissuinerit naammassineqarsimassasut.

Kalaallit Nunaanni Politiinit paasissutissanik sukumiinerusunik pissarsinissarput Sermitsiamit sulissutigaarput.