Nukissiorfiit amigartooruteqaqqittut

Innaallagissamut imermullu akit qaffanneqaraluartut Nukissiorfiit aningaasaqarnerannik oqimaaqatigiissaarinissamut naammanngilaq.

Ingerlatseqatigiiffik 2024-mi 62 millionit koruuninik amigartooruteqartoq Naalakkersuisut tusagassiutitigut nalunaarummi ilisimatitsipput.

Nukissiorfiit akiisa politikkerinit aqunneqarluinnarneri pissutigalugit ingerlatseqatigiiffiup aningaasaqarnera ukiuni kingullerni ajorseriarpoq. Amigartoorutit 2023-mi 86 mio. koruuniupput.

Naalakkersuisut naapertorlugit innaallagissamut imermullu akit 3,5 procentimik juulimi 2024-mi nalimmassarneqarnerisigut 30 millionit koruunit missaannik isertitaqarnerulertoqarsimavoq, taamaalillunilu 2024-mi amigartoorutit ukiup siulianut sanilliullugit ikinnerupput.

Naalakkersuisoq: Pilersaarut aallartinneqarpoq

Nukissiorfiit aningaasaqarnerata oqimaaqatigiissaarneqannginneranik ajornartorsiut ilisimaneqartoq Nukissiuuteqarnermut Naalakkersuisoq Naaja H. Nathanielsen (IA) nalunaarummi oqarpoq:

- Nukissiorfiit aningaasaqarnerat oqimaaqatigiinngitsoq ajornartorsiutaavoq ilisimalluarneqartoq. Nukissiorfiit isertitai aningaasartuutaalu imminnut ataqatigiinngitsut, ukiorpassuarni paasisariaqartarsimavarput. Tamatumunnga pissutaasut siusinnerusukkut qulaajaavigineqarput, tamanullu saqqummiunneqarlutik aammalu pilersaarut naatsorsuutini oqimaaqatigiilersitsisussaq aallartinneqarluni, taanna oqarpoq.

2018-imi akit assigiinnik inissisimalernerat aserfallatsaaliuinermullu aningaasaleeqataavallaannginnerat pissutigalugit Nukissiorfiit amigartooruteqangaarsimasut iluarsaassinerlu milliardilikkaanik kinguaattoorfiusimasoq 2021-mi nalunaarusiami erserpoq.

Naaja H. Nathanielsenip aningaasaqarnikkut ajornartorsiutit aaqqinnissaannut Nukissiorfiit suleqatiginissaat pingaartillugu nangilluni erseqqissarpaa:

- Nukissiorfiit atugassarititaasut ajornakusoortut tunngavigalugit sullissinermik inuiaqatigiinni pinngitsoorneqarsinnaanngitsumik pilersuisuuvoq. Tamanna innaallagiamik, imermik kiassarnermillu aalajaatsumik pilersorneqarnissaq pisariaqartipparput. Nukissiorfiit tamatuminnga pilersuinissaa naatsorsuutigaarput, peqatigisaanillu aamma atortut illuutillu tamatumunnga atasut tamaasa aserfallatsaaliornissaat nutartertarnissaallu aamma isumagisussaavaa. Tamanna suliassaavoq annertooq aammalu Nukissiorfiit suliassaq taanna ilungersuullugu tigusimammagu akuersaarpara, naalakkersuisoq oqarpoq.

Nukissiorfiit iluarsaaqqinnissaannut kinguaattoornerit 1,8 milliardit koruuninik naleqartut missingerneqarsimapput.