Nukissiorfiit Munck Gruppenilu Ilulissani minguitsumik suleqatigiittut

Nukissiorfiit Munck Gruppenilu suleqatigiilernerat Air Greenlandip timmisartuanik Tuukkamik 27-riarluni atlantikoq qulaallugu angalasarnissamut sipaaruteqartitsissasoq, Nukissiorfiit tusagassiuutinut nalunaarummi allapput.

Taakkumi marluullutik 2024-mi upernaakkut isumaqatigiipput Ilulissani CO₂ -mik aniatitsineq 2.502 tonsit missaannik annikillisaavigissallugu.

Mingutsitsinngitsumik nukissiorneq

Munck Gruppenip asimi sulisunut tammaarsimaffianut, svejserinermut sannavianut kiisalu asfaltiliorfianut, nunat tamalaanut attaviliisutut mittarfiup nutaap takkuttussap sanaartornera pissutigalugu suliaqarfiusunut minguitsumik nukissamik pilersuisoqassaaq.

- Ilulissani Munck Gruppenilu qanimut suleqatigiinnissamik atsiuinerup iluatsinnera Nukissiorfinniit assut nuannaarutigaarput. Ilulissani sinnilimmik nukissamik pigisaqarpugut, tamannalu Munck Gruppenip atuisartutut nutaatut maannakkut atulissavaa – silap pissusianut pitsaasoq, minnerunngitsumillu Ilulissanut pitsaasoq, Suleqatigiinneq pillugu nukissiornermut pisortaq, Cicilie Senderovitz oqarpoq

Atlantiku qulaallugu timmisartornerit 27-t

Suleqatigiinneq uuliamik 836.376 literit missaannik naatsorsuutigisamit sipaaruteqarnissamik nassataqassaaq, allanngortitatut naatsorsoraanni CO₂ -mut 2.502 tonsit missaannut annertussuseqartoq, tamatumalu assigaa Air Greenlandip timmisartuanik Tuukkamik Atlantiku qulaallugu timmisartornerit 27-t missaat.

Munck Gruppen suleqatigiilerneq nuannaarutigaat:

- Nukissiorfiit suleqatiginera assut iluarisimaarparput, aammalu Ilulissani asimi tammaarsimaffitta eqqaani sarfaliuutit dieselitortut qaminnissaasa maannakkut periarfissaqalernera iluarisimaarparput. Tamatuma nassataraa sulisutta nipiliornernik annikinnerusunik, aammalu silaannaap pitsaassusaanik pitsaanerusumik misigisaqarsinnaalernerat, aammalu Ilulissani suliniummut annertuupilussuarmik CO 2 -mik aniatitsinitsinnik annikillisaanerput. 

- Taamaalilluni Munck Gruppenip pingaarnertut CO 2 -mik aniatitsinitsinnik annikillisaanissatsinnik, aammalu inuiaqatigiinnut, suleqatitsinnut aamma silap pissusianut piujuartitsisutut siunissamut ilalersuinissamut pingaarnertut sammisaqarneranut Nukissiorfinnik suleqateqarneq tulluartupilussuuvoq, Munck Gruppenimi Senior Project Manager, Rasmus Schmidt-Petersen oqarpoq. 

Nukissiorfiit naapertorlugu Ilulissani Munck Gruppenimik suleqateqarnerup ukiuni makkunani Nukissiorfiit suliaqarfigisaatut innaallagissamut suliniutaani arlaliusuni ilaaginnartoq.