POLITIIT
Nuna tamakkerlugu eqqissiviilliornerit aalakoornartutorsimanermut attuumassutillit
Kalaallit Nunaanni politiit sapaatip akunnerata naanerani assut ulapipput. - Ataatsimut oqaatigissagaanni suliagut tamarluinnangajammik aalakoornartutorsimanermut attuumassuteqarput, Kalallit Nunaanni Politiit piareersimasuutitaasa pisortaat Malik Olesen oqarpoq.
Kalaallit Nunaanni Politiit ulapittorujussuupput angerlarsimaffinni eqqissiviilliornerit, aqqusinerni eqqissiviilliornerit, nakuuserlunilu pinerlunnerit pissutaallutik. - Ataatsimut isigalugu suliassat tamarmik imigassamik aalakoornartumik imersimanermut attuumassuteqarput, politiit piareersimasuutitaasa pisortaat Malik Olesen oqarpoq.
Assi toqqorsivimmit: Leiff Josefsen
Qularnanngilaq nunatsinni innuttaasorpassuit eqqissisimanartumik pinsiorsimassasut. Kisianni aamma innuttaasut amerlasuut, pingaartumik imigassamik aalakoornartumik imersimanermut tunngatillugu, Kalaallit Nunaanni Politiinut nuna tamakkerlugu ulapitsitsipput.
Taamak oqaluttuarai Kalaallit Nunaanni Politiit piareersimasuutitaasa pisortaat, Malik Olesen.
- Maannakkut oqaatigisinnaanngikkallarpara qasseriarluta pisoqarfinnut orniguttariaqarsimanersugut, kisianni nunarput tamakkerlugu amerlaqaat. Suli maannamut ulapippugut, Malik Olesen pinsip sapaatani nal. 11:00 missaani oqaluttuarpoq.
Angut Sermiligaami tigusarineqartoq
Nal. 11:00 aallartippoq angutip 40-t missaanni ukiullip Tasiilami eqqartuussivimmi sassartinneqarnera.
Angut Tasiilap nunaqarfittaani Sermiligaami angerlarsimaffimmi eqqissiviilliortitsilluni, nakuuserluni sioorasaaralunilu ulorianartorsiortitsisimavoq. Kalaallit Nunaanni Politiinut nalunaarutiginnittoqarpoq arfininngornerup sapaatillu akornanni nal. 04:30.
Sermiligaaq Tasiilap avannamut kangianiippoq, politiillu Tasiilamiit Sermiligaamut, 100 kilometerit missaani ungasitsigisumut, orniguttariaqarsimapput.
- Tassani politiit aalajangerput angut tigusaralugu Tasiilamullu aallarunneqassasoq, tassani eqqartuussivimmi sassartinneqassammat, aamma siusinnerusukkut assingusunik pinerluuteqarsimammat, Politiit piareersimasuisa pisortaat Malik Olesen oqaluttuarpoq.
