Nuna tamakkerlugu illussanik titartaasarneq pillugu politikki ujartorneqarpoq
Siumup Inatsisartunut ilaasortaatitaa Najaaraq Møller isumaqarpoq nuna tamakkerlugu illussanik titartaasarnermut politikki pisariaqartoq.
Naalakkersuisut nuna tamakkerlugu illunik titartaasarneq pillugu politikkeqarnissamut pilersaaruteqarpat, taamaappat, nuna tamakkerlugu illussanik titartaasarneq pillugu politikkiliornissaq qanoq akeqassava, Najaaraq Møller aperivoq.
Nuummi attaveqaasersuineq illuliat aqquserngillu eqqarsaatigalugit tamakkiisumik inissisimannginnerinut innersuussivoq.
- Taassuma saniatigut illut portusuut inuit tungaannit pissutsit eqqarsaatigineqaratik sanaartorneqarput, assersuutigalugu illut qanoq qanitsiginersut, sumi inissisimanersut, kusanassusaat il.il., Najaaraq Møllerip paragraf 37 naapertorlugu Naalakkersuisunut apeqqutaani allassimavoq.
Danmarkimi periutsimut innersuussivoq, tassani "illussanik titartaasarneq pitsaasoq tassaasoq inunnut taakkuninnga avatangiiseqartunut aamma pitsaasoq".
Sinaakkutit toqqissisimanartut
- Illunik titartaasarneq pitsaasoq inuit attassisinnaanerannut toqqissisimanartunik tulluarsakkanillu sinaakkusiisuuvoq, inunnut ataasiakkaanut ataatsimoortunullu. Naak issittumi pissutsinut tulluussaarinernik suliaqartuartunik illunik titartaasartunik pitsaasunik peqaraluarluta issittumilu ingenørinngorniarfeqaraluarluta, suli nunanut sanilerisatsinnut isumassarsianik ilutsinillu pissarsisarpugut, politikkeri Siumumeersoq itisiliivoq.
- Nunaqarfivut illoqarfivullu piffinni amerlasuuni aserfallakkiartorfiupput, inuit kusanartunik isigisaqarniartussaagaluartut alianartunik, eqiasunnermik nakerinninnginnermillu isigisaqalersimallutik. Taamaattumik nuna tamakkerlugu illunik titartaasarneq pillugu politikkeqarneq innuttaasunik peqataatitsinerulersinnaavoq, nutaaliornermik pilersitsissalluni minnerunngitsumillu tamatta pisariaqartitatsinnik ataatsimuussusermik misigilersitsissalluni, Naalakkersuisunut apeqquteqarnermini tunngavilersuummini naqissusiivoq.
