Nunani tamalaani politikerit 73-it Mette Frederiksenimut kaammattuipput: Paul Watson iperagaali
Paul Watson iperagaateqqullugu nunani tamalaani politikerit arlallit Mette Frederiksen kajumissaarpaat.
Paul Watson Kalaallit Nunaanni juulimi parnaarussaavoq.
Assiliisoq: Thomas Peter/Reuters/Ritzau Scanpix
Nunanit quliusunit politikerit 73-it ministeriunermut Mette Frederiksenimut allakkaminni avatangiisinik illersuisoq Paul Watson ingerlaannaq iperagaaqqullugu Danmark kajumissaarpaat.
Tamanna TV 2-mi allaaserineqarpoq.
Paul Watson juulip 21-ani Kalaallit Nunaanni tigusarineqarpoq maannalu Japanimut tunniunneqarsinnaalluni, tassani Japan 2010-mili nunanit tamalaanit tigusarineqarnissaanik peqqussuteqarmat.
Allakkat atsiortuisa ilagaat Europap inatsisartuini ilaasortat aamma nunani politikerit Frankrigimeersut, Finlandimeersut, Tysklandimeersut, Østrigimeersut, Hollandimeersut, Belgiameersut, Italiameersut, Spaniameersut Luxembourgimeersullu.
Taakkua ilagaat Europami inatsisartuni ilaasortaq Emma Forreau.
- Taanna ( Watsonimut suliaq, aaqq.) nunarsuaq tamakkerlugu avatangiisinik illersuiniaqatigiit naqisimaneqarneruleriartornerannik pinerluttuliorfigineqaleriartornerannillu ilaannaraat, aamma Europami. Europami nunani qulini inatsisartuni ilaasortat katersornerisigut taamaaliortoqartarunnaartariaqarneranik danskit naalakkersuisui oqaluttuuppavut, TV 2-mut oqarpoq.
Paul Watson, Canadamiu Amerikamiu 73-inik ukiulik, Greenpeacemik pilersitseqataasimavoq, maannali Greenpeacemut attuumassutaarussimavoq.
/ritzau/
