KL

DK

Nunanit allanit politikkikkut akuliunneq USA-milu inatsisissatut siunnersuut isumakuluutigigaa

Aningaasanik agguaaneq nunanillu allaneersut tikeraarnerat Kalaallit Nunaanni qinersigajalernermut akuliunniarnertut isigineqarsinnaasoq Folketingimut ilaasortap Aaja Chemnitzip (IA) ernumassutigaa

Thomas Munk Veirum
Tusagassiortoq
Saqqummersinneqarpoq

Folketingimi nunanut allanut tunngasunut ataatsimiititaliaq sisamanngornermi ataatsimiimmat folketingimi ilaasortaq Aaja Chemnitz (IA) peqataavoq. Ataatsimiinnermi ministeriuneq Mette Frederiksen Donald Trumpimik oqaloqateqarnini pillugu paasissutissiivoq. Trumpimik oqaloqateqarneq pingasunngornermi pivoq.

Ataatsimiinneq pillugu sakkortusisamik nipangersimasussaatitaaneq piumasaqaataasoq Aaja Chemnitzip Sermitsiamut oqaatigaa. Taamaattumik qanoq oqartoqarsimanersoq imaluunniit qanoq aperisoqarsimanersoq oqaatigisinnaanngilaa, kisianni ataatsimut isigalugu suut sammineqarsimanersut oqaluttuarisinnaavaa.

Politikerip uku pingasut eqqaavai:

Amerikami inatsisissatut siunnersuut Trumpimut Kalaallit Nunaat pillugu Danmarkimik isumaqatiginninniarsinnaanngortitsisussaq, Kalaallit Nunaanni ataatsimiititaliap pilersinneqarneranik paasinninneq paatsuuinerluunniit, tassani Namminiilivinnissaq pillugit inatsimmi §21-p atuutilersinneqarnissaa misissuiffigineqartussami, naggataatigullu Inatsisartunut qinersinissaq sioqqullugu nunanit allanit sunniiniarsarinerit:

Aningaasanik agguaaneq akeqanngitsumillu nerisitsineq

- Politikkikkut sunniiniarnerit assigiinngitsutigut pisut ernumanartoqartippakka.

- Nunat allat Kalaallit Nunaanni qinersinermut akuliutissaanngillat. Tamanna Kalaallit Nunaanni partiit kisimik aalajangiiffigissavaat. Tassani eqqarsaatigaakka aningaasanik agguaaneq, akeqanngitsumik neriartoqqusineq qinersinissallu qallinerani tikeraarneqarneq, Aaja Chemnitz oqarpoq.

Taama pisoqartillugu Danmarkip Kalaallit Nunaatalu oqaloqatigiinnerat akulikinnerusariaqartoq aamma oqaatigaa:

- Folketingimi paasissutissanik pissarsisarpugut, taakkualu aamma Inatsisartunit paasineqarnissaat pingaaruteqarpoq. Isumaqarpunga ataqatigiissaarineq maannakkut pingaaruteqarluinnartoq. Pingaaruteqarpoq qanimut ataqatigiissaarineq qulakkeerniarlugu sapinngisamik iliuuseqartoqarnissaa, tamannalu qallunaat naalakkersuisuisa naalakkersuisullu akornanni piusoq nalunngilara. Tamatuma qulakkeerneqarnissaa anguniarlugu iliuuseqartorujussuuvunga.

USA-mi inatsisissatut siunnersuut malinnaavigigaa

USA-mi inatsisissatut siunnersuut Trumpimut Kalaallit Nunaat pillugu Danmarkimik isumaqatiginninniarsinnaalersisussaq Aaja Chemnitzip aamma eqqumaffigaa:

- Inatsisissatut siunnersuut Amerikamiut saqqummiussaat malinnaavigeqqissaassallugu aamma pingaaruteqarpoq, ataasinngorpat Trumpip ivertinneqarnerani saqqummiunneqarsinnaavoq.

- Nalunngilarput taanna Amerikami inatsisitigut suliarineqaqqaartussaasoq, pissutissaqarpallu aalajangiiffigisussaassallugu, oqarpoq.

Paatsooqatigiissinnaanerit mianersuuteqqugai

Ataatsimiititaliarsuarmik Namminiilivinnissaq pillugu inatsimmi §21 aallaavigalugu suliaqartussamik pilersitsineq Kalaallit Nunaata Danmarkimut atajunnaarluni namminiilinissaata qallineranik isumaqalersitsisinnaasoq politikerip naggataatigut mianersoqqussutigaa.

Ataatsimiititaliarsuup pilersinneqarnissaa Inatsisartut 2024-mi upernaakkut ataatsimiinneranni aalajangiiffigaat.

- Politikkikkut suliaqartut ilaannit ataatsimiititaliarsuaq piffissap ingerlanerani Namminiilivinnissaq pillugit inatsimmi §21-mik atuutilersitsisinnaasoq pillugu aalajangersimasumik isumaqartoqarnera siusinnerusukkut isornartorsiornikuuara.

- EU-mi USA-milu isumaqartoqarsinnaavoq Kalaallit Nunaat namminiilivinnialersoq. Danmarkimi politikkikkut Kalaallit Nunaat pillugu ilisimasat killeqarpata taava EU-mi USA-milu suli ingasannerusumik ilisimasakinnerusoqartoq oqartoqarsinnaavoq, tamannalu aamma uanga maluginiarpara, Aaja Chemnitz oqarpoq.

Aaja Chemnitzip Folketingimi ilaasortaqatiminut Aki-Matilda Høegh-Damimut §21 naapertorlugu ataatsimiititaliarsuaq pillugu eqqartueqateqarsimanini innersuussutigaa.

Ataatsimiititaliarsuaq pilersinneqarmat Namminiilivinnissaq pillugit inatsimmi §21 atuutilersinneqarsimanesoq Aki-Matilda Høegh-Damip aalajangiusimavaa.

- Suut pineqarnersut paasisimalluarnissaat pingaaruteqarpoq, politikkeri oqarpoq.

aaja chemnitz donald trump selvstyreloven samfund inuiaqatigiit mette frederiksen

ATORFIIT Se alle jobs

Powered by Labrador CMS