Danskit isumaginninnermut
ineqarnermullu ministeriat Sophie Hæstorp Andersen (S) septembarip naanerani
Nuummiippoq, tassanilu ilaatigut peqqissutsimut inunnunnullu innarluutilinnut
tunngasuni naalakkersuisoq Anna Wangenheim (D) ataatsimeeqatigaa. Danskit naalagaaffiata nunatta peqqinnissaqarfiata Danmarkip
peqqinnissaqarfianit ajornerunnginnissaata qulakkeerneqarnissaanut
akisussaaqataasoq taamaammallu nunarput Danmarkilu pituttortumik
suleqatigiinnerunissaat pisariaqartoq, Anna Wangenheimip Sermitsiamut siusinnerusukkut
oqaatigaa.
Ingerlalluartumik
angusaqarfiulluartumillu ataatsimiittut
Danskit isumaginninnermut
ineqarnermullu ministeriat Sophie Hæstorp Andersen (S) septembarip naanerani
Nuummiippoq, tassanilu ilaatigut peqqissutsimut inunnunnullu innarluutilinnut
tunngasuni naalakkersuisoq Anna Wangenheim (D) ataatsimeeqatigaa. Danskit naalagaaffiata nunatta peqqinnissaqarfiata Danmarkip
peqqinnissaqarfianit ajornerunnginnissaata qulakkeerneqarnissaanut
akisussaaqataasoq taamaammallu nunarput Danmarkilu pituttortumik
suleqatigiinnerunissaat pisariaqartoq, Anna Wangenheimip Sermitsiamut siusinnerusukkut
oqaatigaa.
Ingerlalluartumik
angusaqarfiulluartumillu ataatsimiittut
Anna Wangenheim Folketingip nunarput
pillugu ataatsimiititaliaata aggustimi ataatsimiinnerani peqataavoq, tassanilu
erseqqissaatigaa nunatta inunnut innarluutilinnut Danmarkimiittunut ukiumut aningaasartuutigisartagai
125 millionit koruunit missaanniittut Danmarkimit
akilerneqartalertariaqarsorigini.
Tamanna danskit isumaginninnermut
ineqarnermullu ministeriata Sophie Hæstorp Andersenip kingullermik
ataatsimeeqatiginerani piumasaqaatigisimaneraa Anne Wangenheim aperigatsinni
oqaatigaa, inunnik innarluutilinnik sullissinermut tunngasuni
suleqatigiinnerunissaq Sophie Hæstorp Andersenilu ingerlalluartumik angusaqarluarfiulluartumillu
ataatsimiinnerminni ukkatarigitsik.
– Nunatsinni unammillernartut eqqartorpavut, ilaatigut nunatsinni
innuttaasut innarluutillillu naleqquttunik naleqqussakkanillu
neqeroorfigineqarnerusinnaaqqullugit sulisunik piginnaanngorsaanerusariaqarnerup
pisariaqarluinnarneranut tunngasut. Sulisut piginnaasaannik
qaffassaasariaqarpugut, sulisunillu amerlanerusunik innuttaasut
pisariaqartitaat aallaavigalugit piginnaanngorsaanerusariaqarluta.
Suleqatigiissitamik
pilersitsiniartut
Aningaasaqarneq aamma eqqartoritsik suleqatigiissitamillu
unammillernartorpassuarnut aaqqiissutissarsiortussamik pilersitsiniarlutik
isumaqatigiillutik, Anna Wangenheim oqarpoq.
– Innuttaasunut
innarluutilinnut maani nunami periarfissat tamarmik atorneqareernerat
pissutaalluni Danmarkimi najugaqatigiiffimmiittunut aningaasartuuteqarujussuartarneq,
aammattaaq maani nunami innuttaasut eqqarsartaatsimikkut kinguarsimasut
pineqaatissinneqarsimasunut neqerooruteqannginnera pissutaalluni nunamilu maani
aaqqiissuteqartoqarnissaata tungaanut Danmarkimi
najugaqatigiiffimmiittariaqartarnerat immikkoortortamiluunniit
matoqqasumiittariaqartarnerat aamma eqqartorpavut.
– Ingerlalluartumi ammasumillu oqaloqatigiippugut, suleqatigiissitamillu
unammillernartorpassuarnut aaqqiissutissarsiortussamik pilersitsinissaq
siullertut eqqartorlutigu. Naalagaaffik tamatumani akisussaasoq taamatuttaaq nunatta
Danmarkillu innuttaasut innarluutillit periarfissatigut naligiinnginnerannut iliuuseqaqatigiinnissaat
pingaaruteqarluinnartoq erseqqissarpara. Sophie Hæstorp Andersen isummanut
taakkununnga tunngasuni ataatsimut isigalugu oqaluukkuminaqaaq.
Nunatta inunnut innarluutilinnut Danmarkimi najugaqatigiiffimmiittunut immikkoortortamiluunniit matoqqasumiittunut ukiumut aningaasartuutigisartagai 125 millionit koruunit missaanniipput. Taakkua Danmarkimit akilerneqartalernissaat, Naalakkersuisut kissaatigaat
Modelfoto: Scanpix
Piginnaasaqarneq ilisimasaqarnerlu
Sophie Hæstorp Andersenip Nuummiinnerani Sermitsiamit
aamma oqaloqatigaarput. Iliuuseqarfigisariaqakkat arlaqartut, tamatumanilu
inuit innarluutillit Danmarkimukanngikkaluarlutik najukkaminni ikiorserneqartarnissaat
ataatsimut aamma kissaataasoq, taanna oqarpoq.
– Inuit innarluutillit allallu allamik pissuteqartumik
Danmarkimukartariaqartartut atugaannut tunngasut eqqartorpavut. Immikkut
pisariaqartitsisut katsorsarneqarsinnaaqqullugit
ikiorserneqarsinnaaqqullugilluunniit Danmarkiliartarnerat immini ajortuunngilluinnarpoq.
Aammali erseqqippoq, Kalaallit Nunaanni aamma apeqqutigineqartoq qanoq ililluta
pitsaanerusumik neqerooruteqarsinnaanerluta, piginnaanerinnarnik
tunngaveqaannanngitsumik, aammali innuttaasut najukkaminni
ikiorserneqarnissaannut immikkut ilisimasaqarnissaq pisariaqartoq. Danmarkimukartariaqartarnerup
pisariaarukkiartornissaa siunertaralugu najukkaminni ikiorserneqartalernissaat
ataatsimut kissaatigaarput. Tamatumunnga kikkut akiliisussaatitaanersut
apeqqutaatinnagu, Sophie Hæstorp Andersen oqarpoq.
