Nunarsuarmi sermit aatsaat taama sukkatigisumik aakkiartortut
Nunarsuup sermii ataannassanersut apeqqutaasoq silasiuunit oqaatigineqarpoq.
Issittumi Kalaallit Nunaannilu sermit siorna aakkiartornerat taama sukkatigisimanngillat, Skandinaviamili Asiamilu Avannarlermi sermit atsaat taama aakkiartupallatsigisimapput. (Assi toqqorsivimmit).
Assi: John Mcconnico/Ritzau Scanpix
Nunarsuaq tamarmiittut sermit aatsaat taama sukkatigisumik aakkiartorput.
Ukiuni kingullerni pingasuni sermit aatsaat taama annikillitigisimapput.
Tamanna Naalagaaffiit Peqatigiit kulturimut tunngasunut ataatsimiititaliaata, UNESCO-p, nalunaarusiaani nutaarsiassaqartitsivik Reuters naapertorlugu tallimanngormat saqqummiunneqartumi erserpoq.
- Sermit 9000 gigatonsit 1975-imiilli aassimapput, taakku Tysklanditut angitiginerat 25 meterinillu issussuseqartumut assersuunneqarsinnaapput, Michael Zemp, World Glacier Monitoring Service-mi (WGMS) pisortaasoq, Genèvemi tusagassiortunik katersortitsinermi oqarpoq.
2024-mi sermeq 450 gigatonsit missaanniittoq nunarsuarmi aassimavoq.
2023-mi sermeq annerpaaq 600 gigatoninik oqimaassusilik aassimalluni.
Silasiorfik silasiornermut tunngasunik suliaqartoq Naalagaaffiit Peqatigiit ataaniittoq naapertorlugu ukiuni arfinilinni kingullerni ukiut tallimat sermit aatsaat taama millitigisimapput. AFP allappoq.
- Sermit illersornissaa avatangiisinut, aningaasaqarnermut inuiaqatigiinnullu pisariaqaannarani, inuuinnarnissamut apeqqutaavoq, WMO-mi generalsekretæri Celeste Saulo oqarpoq.
Canadap kitaani, USA-mi, Skandinaviami, Europap qeqqani, Kaukasusimi New Zealandimilu sermit 2000-ikkut aningorunnanngikkaat peqatigiiffik naliliivoq.
Norgemi Sverigemilu sermeqarpoq. Norgemi Jostedalsbreen 487 kvadratkilometerisut annertutigaaq Europap nunavittaani sermersuit annersaat. Sermertaq Vestland fylkep kitaata tungaaniippoq.
Issittumi Kalaallit Nunaannilu sermit siorna aakkiartupallanngillat, Skandinaviami Asiamilu Avannarlermi taamaattoqanngilaq. Sermiti aakkiartornerat aatsaat taama annertutigisut 2024 nalunaarsorneqarput.
- Arlalinnik isumaqatigiinniarsinnaavugut, kisianni fysikkip inatsisai soorlu sermip aakkiartorfia isumaqatigiinniutigisinnaanngilarput, Stefan Uhlenbrook, WMO-mi imeq pillugu kryosfæremullu pisortaq oqarpoq.
/ritzau/
