Aqqalu Jerimiassenip isumassarsiani inuit ilaasa nuannarinavianngikkaat,
allallu qisuariarfigissagaat nalunngilaa.
Aqqalu Jerimiassenip isumassarsiani inuit ilaasa nuannarinavianngikkaat,
allallu qisuariarfigissagaat nalunngilaa.
Aammali Issittumi ullup ingerlaneranut naleqqussarluni
sulisoqartarnissaanik siunnersuut isumaqatigineqassaaq – tassa nunani allani
piffissamik suliffiusartumik ilaarsiinnarani, nunanimi allani pissutsit
Nunatsinni pissutsinit allaanerulluinnartarmata.
Isumaqatigiinngissuteqartoqarnissaa piareersimaffigaa:
– Allanngortitsinissaq
pineqaleraangat, maani inuppassuit ileqqunik aalajangiusimanniinnartarput. Amerlaqisunut
arfineq-pingasunit sisamanut sulisarneq upperisarsiornertut ilersimavoq.
Allanngortinneqarsinnaanngitsutut – imaluunniit allanngortinneqartariaqanngitsutut,
Atassutip siulittaasua AG-mut oqarpoq.
Ullup qeqqata missaani suliartortarluni
Jeremiassenip oqallisissiaani isumassarsiatsialaasumi tunngavigineqarpoq
pisortat suliffeqarfiutaanni sulisut akunnerit suliffigisartagaasa nalilersorneqartariaqalernissaat.
Seqernup qullarnerpaaffiani inuillu sulinngiffeqartaleraangata, ullut
sivisunerpaaffiini sulisut sulilluarnissaat ajornakusoornerulersarpoq.
Ullaakkut qasoqqasarput unnukkullu nukissaqarlualersarlutik. Taamaattumik
piffissaq suliffiusoq naleqqussartariaqarparput. Aasarisseruttornerani ulloqeqqanit
unnuup tungaanut sulisoqarsinnaasassaaq, siunnersuutimi allappoq.
- Inuit qaqugukkut taava
suliartortassappat?
- Nalunaaqutaq immaqa aqqanermut.
Inuit namminneq tamanna paasiniarumaarpaat. Siunnersuutigali oqallisissiaavoq,
qanorpiaq aaqqiisoqarnissaanik siunnersuuteqanngilanga.
- Inuit aasaanerani
nalunaaquttap akunnerini arfineq-pingasuni suli sulisassappat,
kingusinnerusukkut suliartuinnartarlutik?
- Ullormut akunnerit arfinillit
arfineq-pingasullu akornanni sulisarnissaq aamma oqallisigineqarsinnaavoq. Piffissap
suliffiup inuunitsinni atukkatsinnut naleqqussarnissaa ataatsimut
oqaloqatigiissutigissagipput, uannut pingaaruteqarpoq. Maani Avannaani
piffissami aalajangersimasumi ulloq unnuarlu qaamasarpoq. Inuit taamaalillutik
ullaakkut iteriarujussuartarput sinileqqissinnasaratillu, Aqqalu Jerimiassen
akivoq Europallu kujataani ullup kiannerpaaffiani – nalinginnaasumik
nalunaaqutaq marluk sisamallu akornanni – ulluunerani qasuersaarfeqartarnissaannik
aalajangertoqarsimanera eqqaallugu.
- Taqqavanimiusulli
pisalernissarput pineqanngilaq, ilanngullugu taama nassuiaappallappoq.
- Saagummi qaamanermit
akimorneqarsinnaanngitsut?
- Aap, iluaqutaasarput, sulili
qaamasaqaluni.
Aqqalu Jerimiassenip
siunnersuutini Inatsisartunit itigartinneqarsinnaammat sillimaffigaa: - Taama pisoqassappat
innuttasut qanoq isumaqarnersut apereriartigik, oqarpoq.
