Nunatta aalisarnermut inatsissaa nutaaq akuersissutigineqartutut nalilerneqarsinnaalerpoq

Akerlilersuineq takussaagaluartoq, allaallumi sioorasaarutitut taaneqarsinnaasut saqqummiunneqaraluartut, ilaatigut aalisakkerivimmik matusinissamik aamma kilisaatitaarnissamut aningaasaliissutinik unitsitsisoqassasoq, aalisartunut aalisariutinik atortunillu pisissutissanik atukkiussisarnerit aqqutigalugit selskabininngaanniit taarsigassarsisimasut pigisaannik arsaarneqassasut, minnerunngitsumillu illuatungiliuttut sakkortuumik akerlilersuigaluartut, naalakkersuisooqatigiit partiivisa aalajangiusimavaat aalisarnermut inatsisissaq nutaaq upernaaq manna ataatsimiinnermi naammassineqassasoq. Aappassaaneerinninnermut atatillugu allannguutit akuersissutigineqareernerisa kingorna maannakkut pingajussaaneerinninnissaq inaarutaasumillu taasinissaq kiserngorupput.

- Pissusissamisoorpoq oqallinneq annertooq ingerlanneqarmat, inatsisissatut siunnersuut oqallisigineqartoq tassaavoq inuiaqatigiinnut tamanut sunniuteqarluinnartussaq. Taamaammat oqallinneq annertussasoq naatsorsuutigisimavarput. Kisianni naatsorsuutigisimanngilarput suliap ingerlanneqarnerani oqallinnermilu paasissutissanik eqqunngitsunik paatsiveerussaatinillu siammarterisoqarnissaa, pingaartumik inuit attaveqaqatigiittarfii aqqutigalugit, siammarterinerit tamakku Inatsisartuni ilaasortat ilaasa peqataaffgivaat, tamannalu pillugu uppernarsaatissanik tunineqartarpugut.

- Taamaattumik Naalakkersuisut akissuteqaataannik saqqummiussinissara sioqqullugu pisariaqartissimavara erseqqissaateqassallunga inuit akornanni taamaattut oqaaseqaatit siammarterneqartarnerat akisussaassuseqanngituliornerusoq, tamannalu kinguneqarpoq, kinguneqartitsiniartoqassasorlu ilimagereerpara, kisianni Naalakkersuisunut pingaaruteqarpoq erseqqissassallugu eqqunngitsumik tunngavilimmik sunniiniarnerit aamma annilaangasaarinerit ingerlanneqarsimasut arajutsisimanngikkipput, assersuutigiinnarlugu aalisakkavut nunanit allanit suliffeqarfinnut tunniussorniarneqarnerat eqqunngilluinnarpoq, takuinnarneqarsinnaavoq inatsisissatut siunnersuummi § 1 "Kalaallit Nunaanni aalisakkanit isumalluutit kalaallit inuiaqatigiit ataatsimut pigaat."

Inatsisissap aalajangiiffigineqarnerata kingornatigut pisussat

Aalisarnermut, piniarnermut nunalerinermullu ataatsimiititaliap allannguutissatut Naalakkersuisut siunnersuuteqarnissaannik piumasaqaataat Naalakkersuisunit aappassaaneerinninnermut atatillugu naammassineqarput, aappassaaneerinninnermilu aalisarnermut inatsisissap taasissutigineqarnerani 20-it isumaqataapput qulingiluallu akerliullutik .

Kisianni suliaq tassungaannaq killissanngilaq, tassami aalisarnermut inatsit tamakkiisoq tassaavoq inatsisitigut sinaakkutitut inatsisaasoq, taannalu akuersissutigineqarpat, nalunaarutit allallu aalisarnermut tunngatillugu malittarisassat aamma naleqqussarneqartussaassapput.

Polar Seafood-imit sioorasaarisoqarmat ukiup naanerani aalisartut - selskabimut taarsigassarsisimasut - angallataannik atortuutaannillu arsaarinnittoqassarnissaanik, tamanna aallaavigalugu, maanna suliamik aallartitsisoqarpoq qanoq iliorluni aalisartut taakku selskabinut pituttorsimanerminnit kaanngartinneqarsinnaanersut.

- Qularnaveeqqusiinissamik, aningaasalersuinissamut periarfissanik, ESU-mi aningaasanik qaffaanissamik allanilluunniit neqerooruteqarnissamut sukumiinerusumik isumaliuteqartoqartinnagu aningaasaqarnikkut piviusumik pisariaqartitat misissorneqaqqaassapput. Taamaattumik Naalakkersuisut siullertut isumaqarput misissueqqinnissamut tunngavissat ilisimaniarlugit aalisarneq pillugu inatsisissatut siunnersuutip akuerineqarnissaata utaqqineqarnissaa pissusissamisoornerpaassasoq. Inatsisartut peqatigalugit inaarutaasumik aalajangiisoqassaaq. Naalakkersuisut taamaalillutik ataatsimiititaliap inassuteqaataani siunertaq ingerlateqqissavaat sinerissallu qanittuani aalisartut pisariaqartumik kiffaanngissuseqalernissaat toqqissimalernissaallu qulakkiissallugu. aalisarnermut piniarnermullu, Kim Kielsen (S) erseqqissaavoq.

Tamatuma saniatigut KNAPK  inatsisissap suliarineqarnerani arlalinnik piumasaqaateqarnikuuvoq, assersuutigalugu akinik minnerpaaffiliisoqarnissaa, aamma 3 sømilimiit 12 sømilimut sinerissap qanittuani aalisarfik annertusineqassaoq.

Taamaattumik aalisarnermut inatsisissaq (ilimagineqartariaqartumik) akuersissutigineqarpat, Naalakkersuisut inatsisip atuutsinneqalerneranut atasunik sulianik arlalissuarnik aallartitsissasut qularnanngilaq.

Naapertuuttumik unammilleqatigiinnermik qulakkeerinninneq

Aalisarneq, - piniarneq aamma nunalerinermut ataatsimiititaliap aamma piumasaraat ukiuni aggersuni pisortanit pigineqartumut Royal Greenlandimut aamma namminersortut aalisariutaateqarfinnut assigiinngisitsisoqassanngitsoq:

- Ataatsimiititaliap § 32, imm. 3-mut tunngatillugu inassutigigaa “piffissami aaliangersimasumi ikaarsaariafilikkamik, ingerlatseqatigiiffinnut pisortanit pigineqartunut nunatta kitaani raajarniarnermi pisassiissutit amerlassusaasa qummut killissaat 33,33 %-imiit nalimmassarneqassasoq, ingerlatseqatigiiffinnut allanut piumasaqaataalersussanut naapertuussarlugu”. Naalakkersuisut inersuussut taanna pillugu inatsisissatut siunnersuutip pingajussaaneerneqarnissaanut allannguutissamik siunnersuummik saqqummiujumaarput, Kielsen ilimasaarivoq.

Inatsisissatut siunnersuummik pingajussaaneerinninneq sisamanngornermi maajip 16-iani pissaaq.