Nunatta Eqqartuussisuuneqarfia: Avatangiisinik illersuisoq tigummigallarneqarsinnaavoq
Avatangiisinik illersuisup Paul Watsonip aggustip 15-iata tungaanut tigummigallarneqarnissaata akuerineqarsinnaaneranik Sermersuup Eqqartuussisuuneqarfiata aalajangernera, Nunatta Eqqartuussisuuneqarfiata isumaqatigaa.
Paul Watson aggustip 15-iata tungaanut Nuummi pineqaatissinneqarsimasunut inissiisarfimmiittussanngortinneqarpoq, taamanikkussamut Japanimut tunniunneqassanersoq aalajangerneqassaaq.
Miguel Medina/AFP/Ritzau Scanpix
Paul Watsonip, ukiorpassuarni nunanit tamalaanit tigusarineqarnissaanik peqqussuteqarfiusup, tigummigallarneqarnissaanik aalajangiineq Nunatta Eqqartuussisuuneqarfiata marlunngormat atuuttussanngortippaa. Kalaallit Nunaanni Politiit taamatut tusagassiorfinnut nalunaaruteqarput.
Sapaatiummat umiarsuarmik Nuummut tikimmat tigusarineqarpoq, tigusarinninnerlu pissangananngilaq.
Canadamiu Amerikamiu Paul Watson suliniaqatigiiffimmik, imaani uumassusillit illersorniarlugit suliniuteqartumik, pilersitsisuuvoq.
Akerleriissutaasumik suliniaqataasartoq
Paul Watson avatangiisit pillugit suliniaqatigiiffimmik Greenpeacemik pilersitseqataavoq, akerleriissutaaqisumillu suliniaqataasartuulluni. 2010-mi Sikuiuitsumi kujallermi arfanniat Japanimiut sulineranni Paul Watsonip akuliunnera pissutigalugu Japanimi tigusassatut nalunaarutigineqarpoq, Ritzau allappoq.
The Guardian naapertorlugu avatangiisinik illersuisoq arfannianik saassussisimasoq niuernerannillu akornusersuisimasoq, Japanimi oqartussaasut isumaqarput.
Paul Watsonip, ullumikkut 73-inik ukiullip, Danmarkimi inatsisinik atortitsinermut ministereqarfiup aalajangiinissaa utaqqisariaqarpaa, taakkuami aalajangertussaavaat Japanimut tunniunneqassanersoq.
