Nunatta Eqqartuussisuuneqarfiani akuersinermut inatsit tunngavigalugu angummik perngaammik pineqaatissiisoqarpoq

Angut 36-nik ukiulik pinngitsaaliilluni akuersinermut inatsit naapertorlugu pinngitsaaliilluni arnerisimasutut qaammatini arfinilinni sisamanngormat pineqaatissinneqarpoq.

Angut 36-nik ukiulik Nuummeersoq 2024-mi januaarimi pinngitsaaliilluni atoqateqarsimaneranut qaammatini arfinilinni pineqaatissinneqarsimasunut inissiisarfimmiittussanngortinneqarpoq.
Saqqummersinneqarpoq

Angut 36-nik ukiulik Nuummiu 2024-mi januaarimi Nuummi pinngitsaaliilluni arnerinermi kingorna qaammatini arfinilinni pineqaatissinneqarsimasunut inissiisarfimmiittussanngorlugu sisamanngornermi januaarip 30-ani 2025-mi eqqartuunneqarpoq.

Suliaq Eqqartuussisoqarfik Sermersuumi septembarimi 2024-mi suliarineqarpoq, tassani angut 36-nik ukiulik qaammatini arfinilinni pineqaatissinneqarsimasunut inissiisarfimmiittussanngorlugu pineqaatissinneqarpoq. Atoqatigiinnermut akuersissuteqartoqarsimannginnera eqqartuussivimmi aalajangiunneqarpoq, tamatumalu kingorna angut pinngitsaaliisimasutut pineqaatissinneqarpoq. Angutip pineqaatissiissut ingerlaannaq suliareqqitassanngortippaa.

Nunatta Eqqartuussisuuneqarfiani suliaq ippassaq suliarineqarpoq. Eqqatuussisunit pingasuusunit marluk akuersissuteqartoqarsimanngitsoq isumaqarput, Eqqartuussisoqarfiullu Sermersuup aalajangiinera attatiinnarlugu. Eqqartuussiviup aalajangiinermini ilaatigut ilisimannittut nassuiaataat allakkallu suliap ingerlanneqarnerani saqqummiunneqartut tunngavilersuutigai, politiit tusagassiuutinut nalunaarummi allapput.

- Nunatta Eqqartuussiviani aalajangiineq naammagisimaarpara, sulianilu taamaattuni pillaatisiassatut aalajangersagaq maanna aalajangerneqareermat, Eqqartuussisoqarfik Sermersuumi suliami unnerluussisuusoq kingornalu Nunatta Eqqartuussisuuneqarfiani aamma unnerluussisuusoq Josefine Minor Christensen oqarpoq.

Tunngaviusumik eqqartuussineq

Eqqartuussivimmit aalajangerneqareersumi suliamik taamaattumik Nunatta Eqqartuussisuuneqarfia siullerpaamik suliaqarpoq.

Eqqartuussineq tunngaviusumik pingaaruteqarpoq, tassami akuersinermut inatsit Kalaallit Nunaanni 2023-mi juulip aallaqqaataani atuutilersoq tunngavigalugu perngaammik pineqaatissiisoqarpoq.

- Pinngitsaaliilluni atoqateqarnermi nakuusertoqarnera imaluunniit nakuusernissamik sioorasaarisoqarnera siornatigut tunngavigineqartarnikuuvoq, maannali pinngitsaaliilluni arnerisoqartillugu nalilersuinermi akuersisimannginneq tunngavigineqarpoq, politiit allapput.

- Eqqartuussut pinerlunnerit taamaattut ilungersunartutut isigineqarnerannut ersersitsivoq, neriuppungalu eqqartuussut atoqatigiinnerup tamatigut akuersisoqaqqaartoqartariaqarneranik aallaaveqartussaaneranik takutitsissasoq, taamaanngippat atornerluinerummat, Josefine Minor Christensen oqarpoq.

Powered by Labrador CMS