KL

DK

Nunatta Eqqartuussisuuneqarfiata eqqartuussut atuuttussanngortippaa — nakuuserfigineqartoq innarluuteqalersimavoq

Angut 32-inik ukiulik toqutseriarsimasutut pisuutinneqarluni ukiuni pingasuni pineqaatissinneqarsimasut inissiisarfianniittussanngorlugu pineqaatissinneqarpoq. Saniatigut pinerloqatinilu 10.000 koruunit avillugit taarsiisussanngorput. Ukiup aallartisimalaarnerani poorskip nalaani imigassartornerup nalaani nakuuserneq sakkortooq pivoq, angut persuttarneqartoq inuunermi sinnera innarluuteqartussanngorlugu.

Tôrtia Reimer-Johansen
Journalist
Offentliggjort

Angutit tallimat Uummannami poorskip nalaani illumi erngupput. Ilisimannittut nassuiaataat naapertorlugit erngunneq sakkortuumut saappoq, tassani angutip 32-inik ukiullip 53-inik ukiulik persuttalermagu.

Angut tilluarneqarpoq, isimmittarneqarluni tukkarneqarlunilu. Taamaaliorneqarami ilisimajunnaarpoq.

Nakuusertoq nakuusernermi nalaani pausertarpoq imeqqilertarlunilu, kingornalu angut natermi nalasoq nakuuserfigeqqittarlugu. Nakuuserneq sakkortooq minutsit 30-it tungaanut pivoq.

Illumi piginnittoq nakuuserneq unitsinniarlugu iliuuseqaraluarpoq, taamaalioramili annersinneqarami igalaakkut qimaavoq. Illumi isersimasut allat nakuuserfigineqartumut ikiuutinngillat.

Akunnerni 24-ini ikiortissaasuasoq

Angut 53-inik ukiulik nakuuserfigineqartoq natermut qimaannarneqarpoq. Aqaguani illumik piginnittoq illumut uterpoq. Angullu 53-inik ukiulik tassani natermi suli nalavoq.

Nassuiaatigineqartut naapertorlugit illumik piginnittoq nalaasaarfimmut innarpoq sinilerlunilu.

Unnukkut iterami angut nakuuserfigineqarsimasoq suli natermi nalavoq, aaginnaalluni. Illumillu piginnittoq napparsimaviliarpoq ikiortissamik aallerluni.

Portøri illumut apuukkami angut nakuuserfigineqarsimalluni natermi nalasoq naammattoorpaa, atisai aammik siggussimasut angullu qisuariarneq ajorluni. Portøri politiinut sianerpoq. Angullu Uummannami napparsimavimmukaanneqarpoq. Nakuuserfigineqarsimanermini ajoqusernerni annertuallaarmata aqaguani nuummukaanneqarpoq.

Illumik piginnittoq pisup kingorna sapaatip akunneri marluk qaangiummata imminut toquppoq.

Innarluuteqalertoq tappingerlunilu

Pinerlineqartoq ullumikkut inuunermi sinnera innarluuteqalerpoq. Isaa saamerleq tappingernikuuvoq, isaalu talerperleq marloqiusamik isigisaqarluni. Ajoquserneri ima sakkortutigipput, allaat pisuppiarsinnaanani. Ulloq unnuarlu angerlarsimaffimmi najugaqarpoq inuunermilu sinnera ikiugassaalluni.

Angut nakuusersimasoq naggataarutaasumik oqaaseqarnissaminut periarfissinneqarami utoqqatserpoq.

- Ajuusaarpunga utoqqatserlungalu.

Nunatta Eqqartuussisuuneqarfiata aalajangernera

Nunatta Eqqartuussisuuneqarfiata eqqartuussiviup aalajangernera atuuttussanngortippaa. Angut 32-inik ukiulik ukiuni pingasuni pineqaatissinneqarsimasut inissiisarfianniittussanngortinneqarpoq. Pinerloqataasoq, maanna pineqaatissinneqarsimasut inissiisarfianniittoq 10.000 koruuninik taarseeqatigissavaa. 

Angutit pingajuat toqutseriarsimasutut pinngitsuutinneqarpoq.

inuiaqatigiit samfund

ATORFIIT Se alle jobs

Powered by Labrador CMS