KL

DK

Nunatta Eqqartuussisuuneqarfiata pinngitsaaliilluni atoqateqarnermut kanngutsaattuliornermullu eqqartuussut atuuttussanngortippaa

Sisimiuni angut maanna 44-inik ukiulik akuersissuteqaqqaarani pinngitsaaliilluni atoqatiginnissimaneranut kannguttaatsuliorsimaneranullu eqqartuussut Nunatta Eqqartuussisuuneqarfiata atuuttussanngortippaa. Tamanna pivoq pingasunngornermi. Eqqartuunneqartoq ilaqutaminut pinerlisimannginnerarluni pinngitsuuneqarpoq, eqqartuussulli atuuttussanngortinneqarpoq.

Tôrtia Reimer-Johansen
Journalist
Offentliggjort

Tamanna siorna septembarimi 2023-mi pivoq, niviarsiaqqap 18-it inorlugit ukiullip arnaatalu angut maanna eqqartuussaasoq taamani pulaarmassuk.

Tassani pulaarnerminni imigassartorput ikiaroorlutillu. 

Niviarsiaqqap sallusussaatitaanani nassuiaagami oqarpoq angaaminut pulaarnerminni akuersiteqqaarnani pinngitsaalineqarluni atoqatigineqarsimalluni kiisalu kannguttaatsuliorfigineqarsimalluni. Niviarsiaqqap arnaa pisup nalaani natermi artuleqqavoq.

- Oqarama iliuuseqartoqanngilaq

Pisup kingorna niviarsiaraq annilaangasimavoq, qanorlu pineqarsimanerminik oqarneq ajulersimalluni.

Qaammat ataaseq qaangiutereersoq angajuminut oqaluttuarpoq.

- Angajunnut oqarama kamappoq, soorooq oqajaarsimannginnama.

Pinerlineqartoq tassani nassuiaanneqarpoq kingusinaarluni oqarmat uppernarsaatissaqarnavianngitsoq.

Qanoq pineqarsimanermini anaanani kingorna paasitippaa, namminerli oqarnera naapertorlugu arnaa iliuuseqarsimanngilaq.

- Anaanaga iliuuseqanngilaq, soqutiginngilaa. Misigivunga ikiortissaqarnanga upperineqarnangalu. Kamappunga annersittarlugulu, niviarsiaraq eqqartuussivimmi qiaatigaluni oqaluttuarpoq.

Niviarsiaqqap aataa kingorna iliuuseqarpoq pisimasorlu politiinut nalunaarutigalugu.

Nunatta eqqartuussisuuneqarfiata aalajangiinera

Unnerluussisussaatitaasut piumasaraat angut ukiumi ataatsimi qaammatinilu pingasuni pineqaatissinneqarsimasut inissiisarfiannut inissinneqassasoq, niviarsiaqqamullu 50.000 koruuninik taarsiissuteqassasoq.

Illersuisuata pinngitsuutinneqarnissaa piumasaraa.

Eqqartuussisuuneqarfiulli niviarsiaqqap nassuiaataa tutsuiginarluinnartutut nalilerpaat, taamaattumillu eqqartuussut atuuttussanngortillugu.

Angut maanna 44-inik ukiulik unnerluussummut pisuutinneqarpoq eqqartuunneqarlunilu.

inuiaqatigiit familie blufærdighedskrænkelse alkohol og stoffer retsafgørelse voldtægt samfund

ATORFIIT Se alle jobs

Powered by Labrador CMS