Nutarterneqarpoq: Attaveeruttoornerup kingorna pilersuineq Nukissiorfiup iluarseqqippaa
Nuummi innuttaasut arlallit pingasunngornermi ullaakkut innaallagiaqaratik tamat attaveqatigiittarfiini nalunaarput.
Nuummi Nuussuarmi illoqarfiup ilaani arlallit innaallagiaqannginnertik sumik peqquteqarnersoq paasisaqarfigerusullugu ujartuipput. Nukissiorfiit pingasunngornermi ullaap tungaani suli paasissutissanik saqqummiussinngillat.
Assi: Kassaaluk Kristensen
Obs: Nukissiorfiit nalunaarput Nuussuarmi innaallagiamik pilersuineq ullup qeqqata missaani aallarteqqinneqarsimasoq.
Nuummi illoqarfiup ilaani pingasunngornermi ullaakkut innaallagiamik pilersuineq kipineqarsimavoq.
Nukissiorfiit Facebookimi qupperneranni innuttaasut illoqarfiup immikkoortuini assigiinngitsuneersut paasissutissanik ujartuipput.
Innuttaasut nalunaarput illoqarfiup immikkoortuani Nuussuarmi Kangillinnguinilu kiisalu sumiiffinni allani arlalinni innaallagiaaruttoqarsimasoq.
Nukissiorfiit nittartagaat nalunaaqutaq 08.40-ip missaani suli attaveeruttoqarneranik paasissutissiissuteqanngilaq.
Nutarterneqarpoq nal. 09.10
Nukissiorfiit innaallagiaaruttoqarnera pillugu Facebookikkut nal. 09 nalunaaruteqarput.
Suliffeqarfik allappoq Nuup immikkoortuani Nuussuarmi innaallagiaaruttoortoqarnera ajutoortoqarsimaneranik pissuteqartoq. Ajutoorneq ima nassuiarneqarpoq:
- Nukissiorfiit ajoqut aaqqinniarlugu suliaqarput. Nukissiorfiit nal 9:45 facebookkikkut pilersuinermut uninngagallartitsinermut nutaarsiassiissaaq, suliffeqarfik allappoq.
Nutarterneqarpoq nal. 10.05
Nukissiorfiit nutaamik nalunaaruteqarlutik ilisimatitsipput innaallagiamik pilersuinerup attaveerutsinneqarnera arlalitsigut ilungersornartorsiortitsisoq.
Nukissiorfiummi attaveeruttoornerata kingunerisaanik internetimut attaviit - sineriak ilanngullugu - aamma ajornartoorfiupput:
- Tamanna isumaqarpoq sullitanut saaffiginittarfiup callcenterip oqarasuaatikkut mailikkullu saaffiginnissutit akisinnaanngikkallarai.Aamma Nukissiorfiit nittartagaat iserfigisinnaanngilaat, taamannalu peqqutigalugu siusinnerusukkut avammut nalunaaruteqartoqarsinnaasimanngilaq, suliffeqarfik ilisimatitsivoq.
Nukissiorfiit pisut pillugit Facebookikkut paasissutissiisassalluni ilisimatitsivoq.
Innaallagiap attavianik kipisoorutaasimasoq maanna paasineqarsimalerpoq, tamannalu iluarsiniarlugu Nukissiorfiit maanna suliaqarput.
Nutarterneqarpoq nal. 11.10
Nukissiorfiit internetimut attaveqaqqilerput, taamaattumillu sullissinissamut sianerfissaq mailsillu akisinnaaqqilerlugit.
Nuussuarmi innaallagiamik pilersuinerup atulerseqqinnissaa suli sulissutigineqarpoq.
