Tusass qaammataasatigut attaveqaatit pillugit isumaqatigiissuteqarpoq
Tusass Eutelsat nunatsinnut OneWeb LEO atorlugit qaammataasatigut attaveqaatinik pilersitsisoqarnissaanik isumaqatigiissuteqarfigaa.
Suleqatigiinnerup nutaap siunertaraa qaammataasaq aqqutigalugu sukkasuumik nukittuumillu attaveqarnerup qulakkeernissaa, kiisalu pingaaruteqarluinnartunik sullissinerit soorlu imaatigut aammalu upalungaarsimanermik sullissinerit nukittorsarnissaat, Tusass isumaqatigiissut pillugu allappoq.
Foto: Tusass
Tusass naapertorlugu sumiiffinni qaammataasakkut attaveqaatilinni attaviit kigaassinnaasartut attaveeruttoorfiusinnaasartullu pitsaanerusumik attaveqaateqalertinniarlugit suleqateqartoqalerpoq.
Tusass nalunaarpoq Eutelsat qaammataasatigut attaveqaatai OneWeb LEO-mik (Low Earth Orbit) taaneqartartut nunatsinni atulersinnissaannut ukiunut arlalinnut isumaqatigiissuteqarfigisimallugu.
Isumaqatigiissutip tamatuma Tusass nunami isorartuumi tikikkuminaatsumilu qaammataasatigut isumannaatsumik attaveqaasersuinissaq qulakkiissaavaa, tamannalu imaatigut angallannermut upalungaarsimanermullu iluaqutaassaaq.
Pisortaaneq oqiliallallunilu nuannaarpoq
Pisortap Toke Binzerip isumaqatigiissut qaammataasatigut attaveqaatinik pitsanngorsaasussaq nuannaarutigaa:
- Qaammataasakkut attavilinni pitsaanerusumik sukkanerusumillu interneteqarnissamik innuttaasunut neriorsuuterput pitsaanerpaamik eqquutsinniarlugu, Eutelsat suleqatigilerparput. Taamaattumik aamma oqiliallaatigaara nuannaarutigalugulu isumaqatigiinniarnerit sivisuumik ingerlatereerlugit kiisami isumaqatigiissuteqaratta, Toke Binzer oqarpoq.
Tusass naapertorlugu qaammataasaq OneWeb aalajangersimasumik nunarsuarmut qanittumi ingerlaarfeqarpoq, issittumi sumiiffinni attaviit qulakkeernerusinnaallugit.
- Attaviit issittumi sumiiffinni allani, soorlu Canadap avannaani qajannaassusaanik uppernarsaapput – naak silap pissusaa sakkortusinnaagaluartoq, Tusass allappoq.
Tusass ilisimatitsivoq isumaqatigiissutip kingunerisaanik attaveqaatit pitsaanerusut piffissami qaninnermi pilersinneqassasut.
Starlink pillugu oqaloqatigiinneq ingerlaannarpoq
Tusassip siusinnerusukkut nalunaarutigisimavaa Amerikamiut Starlinkimik attaveqaataat, sumiiffinni qaammataasat atorlugit attaveqaateqarfiusuni atorsinnaanissaa anguniarlugu, isumaqatigiinniutigineqartoq.
Oqaloqatigiinneq taanna ingerlaannarpoq:
- Starlink soqutiginnittullu allat oqaloqatigiuarpavut, periarfissanut nutaanut suleqatissanullu pitsaasunut ammajuaannaratta.
- Maanna Eutelsat OneWeb pillugu isumaqatigiissuteqarfigaarput, tamannalu siunissami qaninnermi innuttaasut qaammataasanik attaveqarfigineqartartuni arlalinniittut digitalikkut inuunerannik pitsaanerulersitsissaaq, Anne Rønne Tusassimi attaveqaqatigiinnermut tunisassiornermullu pisortaq Sermitsiamut allakkatigut akissuteqarluni nassuiaavoq.
