Nuup mittarfia isumannaallisaanikkut akuerineqaqqittoq

Isumannaallisaanermut akuersissutip Trafikstyrelsimit atorunnaarsinneqarnera pissutigalugu, 14. augustip kingorna Nuup mittarfianit nunanut allanut timmisartuussinerit ingerlanneqarsinnaasimanngillat.

Taamaalillunilu qaammatit marluk missaat qaangiummata aatsaat akuersissut pissarsiareqqinneqarpoq. Nakkutilliineq ulluni 11. aamma 13. oktobarip akornanni ingerlanneqarpoq.

- Ilungersunartumik – aammali ilikkarfigisatsinnik – pisoqareersoq, ingerlatseqqilernerput nunallu tamalaat akornanni timmisartuusseqqissinnaalernerput nuannaarutigaarput. Maannalu terminalip inaarsarnissaa aallussinnaalerparput, mittarfittaanillu suliaqarneq naammassillugu, taamaalillunilu nunat tamat akornanni mittarfiup atoqqaarfissiornissarsuanut ulloq 28. novembarimi pisussamut piariissaagut, Greenland Airportsimi pisortaaneq Jens Lauridsen, mittarfeqarfiup facebookimi saqqummiussaani allappoq.

Trafikstyrelsip akuersissumminik atorunnaarsitsinera ilaatigut matunik parnaasimanngitsunik akuersissuteqanngitsullu piffinnut immikkuullarissunut isersinnaanerannik patsiseqarpoq, tamakkulu aggustusimi nakkutilliiartornermi paasineqarput.

- Securitymi ingerlatsinermik piareersaasiornermi sullitatsinnut ilaasunullu persaqqusersuisimanerput utoqqatsitsissutigaarput. Maannalu anguniakkap tullia - tassa one stop securitymut akuerineqarneq - aallussinnaalerparput, taannalu ukiup nutaap ingerlanerani pisinnaassasoq ilimagaarput, Jens Lauridsen ilassusiivoq.

Canadami Iqalunnut angalasunut isumannaallisaanikkut akuersissuteqannginneq ilungersunarsimavoq, Air Greenlandimi allatut ajornartumik ilaasunik Kangerlussuarmit angallassisariaqarsimammat. Piffissami aggersumi mittarfiup pisortatigoortumik imarpik qulaallugu timmisartuussisinnaalernissaa sioqqullugu, Nuup Mittarfiani isumannaallisaanermut tunngasut arlallit akuerineqassasut, Trafikstyelsi paasissutissiivoq. Taakku assersuutigalugu tassaapput mittarfiup qatserinermut annaassiniarnermullu upalungaarsimanera, isumannaallisaanermi periutsit, silaannakkut angallattunik aqutsinermi malittarisassat kiisalu mittarfimmut 2.200 meterisut takissusilimmut allagartaliussat atortuutillu.