Nuuk: Mittarfiup illorsuartaavata qarasaasianut tunngasut arlallit amigaatigai
Timmisartumut ilaasut Nuummi mittarfiup illorsuartaavani timmisartumut ikinissamut nalunaarniaraangamik kinguaattoortarnissartik ilimagisinnaavaat. Qarasaasianut atortut arlallit suli tunniunneqarsimanatillu atorneqarsinnaanngillat.
Nuummi mittarfiup illorsuartaavata ammarneqarnera sioqqullugu isumannaallisaanermut immikkoortortaqarfik assimi takuneqarsinnaavoq. Taanna ajoquteerarpassuaqarpoq aaqqiissutissallu suliarineqaleruttorput.
Leiff Josefsen
Ilaasut Nuummit aallartussat takkutiaartarnissaat kaammattuutiginarpoq, tassami qarasaasiat atortuisa amigaateqarnerat pissutigalugu sivisunerusumik utaqqisoqartarmat.
- Timmisartumut ikinissamut nalunaarsuisartut suli tunniunneqarsimanngimmata suliassat ilaat suli assammik suliarineqartarput. Aammattaaq atortorissaarutit allat atorneri aatsaat aallartisarnermiipput, Greenland Airportsimi attaveqaqatigiinnermut pisortaq Mikkel Bjarnø Lund Sermitsiamut oqarpoq.
Amigaatit
Qarasaasianut tunngasut unammillernartut ukuupput:
- Timmisartumut ikinissamut nammineerluni nalunaarsuutit nassatanillu tunniussisarfiit suli tunniunneqanngillat.
Ikiartortarfinni aamma ilaasut aallariartulernerminni saaffiginnittarfiani qarasaasiat aamma suli tunniunneqarsimanngillat.
E-gates, timmisartumut ikissutissamut skannerutit, suli aallartisarnermiipput.
- Nassatanik tunniussinermut, timmisartumut ikinissamut nammineerluni nalunaarsuinermut allanullu tunngatillugu suliniuteqarneq aamma ingerlanneqaleruttorpoq, qanittukkullu naammassineqarnissaat naatsorsuutigaarput, attaveqaqatigiinnermut pisortaq oqarpoq.
Aallartisarnermut piffissaqarluartoqarnissaa pissutigalugu illorsuup ammajaarneqarnissaa pilersaarutaajuaannarsimasoq taanna oqarpoq.
- Tamatumunnga pissutaavoq ilaasut, timmisartut, nassatat il.il. eqqarsaatigalugit illorsuaq tamakkiisumik misilittarneqareerpat suut tamarmik, soorlu suliat pitsaanerpaamik ingerlanneqarneq ajortut kiisalu ajoqutit iluarsartugassat il.il. aatsaat suussusersineqarsinnaassammata, Mikkel Bjarnø Lund oqarpoq nangillunilu:
Ajoquteeqqat
- Anguniagaraarput sulilu anguniagariuaannarparput suliap tamatuma naammassinissaa, taamaalilluta mittarfik tamakkiisumik atulerpat nunanullu tamalaanut timmisartuussinerit novembarip 28-ani aallartippata mittarfik piareereerniassagatsigu, ajoquteeqqat, pitsanngorsaatissat iluarsaassassallu naammassereerlutigit – soorluttaaq illorsuaq naammassiniassammat.
"Suliani taama angitigisuni ajornakusoortigisunilu ajornartorsiuteqartuaannaraluartoq, ilimagisamit ajornartorsiutit amerlanerusimasut", attaveqaqatigiinnermut pisortaq nassuerpoq.
- Suliap tamatuma unammillernartullu tamakkua sullitatsinnut ilaasutsinnullu akornutaanerat ajuusaarutigaarput, Mikkel Bjarnø Lund oqarpoq, novembarip 28-anilu mittarfiup illorsuartaavata tamakkiisumik atorsinnaalernissaa taassuma naatsorsuutigaa.
