Nuummi anorersuarnissaa aarlerisaarutigineqarmat Tuukkaq allamut mittussanngortinneqartoq
Silarlunnera pissutaalluni Air Greenlandip sisamanngornermi timmisartuussinissat allannguuteqarfigingaatsiarpai.
Air Greenlandip timmisartua Tuukkaq Nuummukarani Kangerlussuarmukassaaq.
Assi: Leiff Josefsen
Nuummi sisamanngornermi siallerlunilu anorlernissaa aarlerisaarutigineqarpoq. Nuup eqqaani natsimassasoq anorersuannguuttartumik, anorersuarujussuartullu sakkortutigisarsinnaassasoq DMI-mit ilimasaarutigaa.
Amerlanerpaat silarlukkaluartoq angalasinnaaqqullugit Air Greenland timmisartuussinissanik pilersaartutinik allannguivoq. Timmisaartuutileqatigiiffik nittartakkamini pingasunngornermi ualikkut allappoq.
Allannguutit ilaat tassaaavoq timmisartorsuup Tuukkap Kangerlussuarmukartussanngortinneqarnera. Avannaaniit avannamullu angalasut pingaarnersiorniarlugit taamaaliortoqarluni.
- Nuummut kujammullu angalasussat silap iluarsinissaata tungaanut Københavnimiiginnassapput, nutaamillu pilersaarusiuunneqassallutik, Air Greenland allappoq.
Billundip Nuullu akornanni timmisartuussineq taamaatiinnarneqarpoq.
Anori sioqqullugu Qaanaamut Maniitsumut timmisartuussisoqassaaq.
Kangerlussuup, Ilulissat, Aasiaat Sisimiullu akornanni timmisartuussinissamut Dash-8-nik marluk timmisartuussisussanngortinneqarput, taamaattumillu Ilulissani sisamanngornermi unnuissallutik.
Air Greenlandip tallimanngornermi angalasut allannguuteqartoqarsinnaaneranut eqqumaffigeqquaa, taamaattumillu sms-ikkut e-mailikkullu malinnaaqqullugit kajumissaarlugit.
Timmisartortitseqatigiiffiup angalasut eqqugaasut kingusinnerpaamik aggustip 17-ianni apuunneqarumaartut naatsorsuutigaa.
