Nuummi atuarfiup sanaartornera kinguaattoormat atualerfissaq kinguartinneqarpoq
Atuarfik nutaaq Nuup qeqqaniittoq aggustip 15-ani atuartitsilernissamut naammassineqarsinnaanngimmat, atuartut aasaanerani atuanngiffeqarnerat ullunik 14-inik sivitsorneqassaaq.
Kunngi Frederiup qulingata dronning Maryllu qaammammi matumani siusinnerusukkut Kalaallit Nunaanniinnerminni Atuarfik Inussuk pulaarpaat. Atuarfilli pilersaarutit malillugit atualertoqartinnagu piareersinnaanngilaq
Ida Marie Odgaard / Ritzau Scanpix
Nuummi atuarfimmik Inussumik sanaartortut kinguaattoormata, Kommuneqarfik Sermersuup ullunik 14-inik atualertoqarnissaa kinguartippaa.
- Atuanngiffeqarnissamut pilersaarut nutaaq imaappoq, sisamanngornermi aggustip 29-anni 2024 Atuarfik Inussummi atuartut tamarmik atuariartussapput, ukiorlu atuarfiusoq marlunngornermi juunip 24-anni 2025 naammassissaaq. Sisamanngornermi aggustip 15-ianni 2024 Nuummi atuarfiit sinnerini ukioq atuarfiusoq aallartissaaq, naammassissallunilu tallimanngornermi juunip 20-anni 2025, Kommuneqarfik Sermersooq nittartakkamini ilisimatitsivoq.
Atuarfik Inussummi atuanngiffeqarnissamut pilersaarut atuarfinnit allanit allaanerugaluartoq, atuartut allat assigalugit atuartunut ullut 200-t atuarfiussasut erseqqissaatigineqarpoq.
- Sunngiffimmi ornittakkat AKO’llu USK-imut ASK-imullu attuumassuteqartut aasaanerani atuanngiffeqarnermi atuartunut ammaannassapput, taamaasillutik atuartut tamarmik aasaanerani atuanngiffiusumi sivitsorneqartumi paarineqarnissaat periarfissaassaaq, illoqarfiit pingaarnersaasa kommuniat nalunaarpoq, taannalu paasissutissanik angajoqqaanut allagarsiivikkut (forældreintra) aammalu 1.klassinngortussanut angajoqqaat e-boksianut nassiussisimavoq.
