NUTARTIGAQ
Nuummi biilit pingasut ikuallattut
Nuummi industrivej-imi biilit ikuallattut sapaammi ualilluinnartoq nalunaarutigineqarput. Biilit ikuallatsinneqalersimasinnaanerat Nuummi Politiit ilimatsaappaat. Ikuallatsitsisoqarsimasinnaaneranik ilisimasaqartut politiinut saaffiginneqquneqarput.
Nuummi industrivejimi sapaammi ualilluinnartoq ikuallattoqarpoq.
Assilisaq pigineqartoq
Malugiuk: Biilit katillugit pingasut ikuallassimasut, pisumullu takunnissimasinnaasunik suli ujaasisoqartoq, ataasinngornermi ullaakkut politiit nalunaarput.
Kalaallit Nunaanni Politiit nalunaarfigineqarput Nuup Bussiisa allaffiata eqqaani Nuummi Industrivejimiittumi sapaammi ualikkut nalunaaqutaq 18.00 biilit ikuallattut.
- Biilit ikuallattut nalunaarutigineqarput. Paasiniaaneq suli ingerlanneqarpoq, ilimagaarpulli biilinik ikuallaasoqarsimassasoq. Takunnittuusoq saaffiginnereerpoq, taassumallu oqaluttuaraa ikuallattoqalernissaata nalaani nukappiaqqat marluk sumiiffimmi takusimallugit, Kalaallit Nunaanni Politiini pigaartut pisortaat Jeppe Andsager Sermitsiamut oqarpoq.
Industrivejimi ikuallattoqarneranik ilisimasaqartut politiit oqaloqatigissallugit soqutiginerarpaat. Politiit attavigineqarsinnaapput oqarasuaammut 70 1448-mut.
Ikuallanneq qaminneqartoq
Pigaartut pisortaat oqarpoq ikuallanneq illuutinut siornatigut nunatta isiginnaartitsisarfiata illuutigisimasaanut siaruaassimasoq.
Politiit qatserisartullu sapaammi unnoqqaakkut sumiiffimmiipput, aamma Nuussuarmiit Nuummut sullorsuaq matuneqarallarsimagaluarluni.
- Ikuallanneq qaminneqarpoq. Misissuinernik aallartitsivugut. Ikuallattoqarnerani inunnik ajoqusertoqanngilaq, Jeppe Andsager oqarpoq.
