Nuummi inissialiorneq Nunat Avannarliit Siunnersuisoqatigiivisa nersornaasiuttagaannut innersuunneqarpoq
Inissiaatileqatigiiffik kommunip pigisaa Iserit Nunat Avannarliit Siunnersuisoqatigiivisa avatangiisinut nersornaasiuttagaannut innersuunneqarpoq.
Iserit nukimmik atuinikinnerusumik inissianik 48-nik sanaartornini pillugu Nunat Avannarliit Siunnersuisoqatigiivisa Avatangiisinut Nersornaasiuttagaannut innersuunneqarpoq. Iserip Nuummi sanaartornerisa ilaannit assi toqqorsivimmeersuuvoq.
Leiff Josefsen
Ukioq manna Nunat Avannarliit Siunnersoqatigiivisa Avatangiisinut Nersornaasiuttagaanik tunniussinermi „piujuartitsilluni sanaartorneq“ qulequtarineqarpoq.
Kommuneqarfik Sermersuup inissiaatileqatigiiffiutaa Iserit Nuummi inissianik 48-nik DGNB-mik allagartalinnik sanaartornini pillugu nersornaammut innersuunneqarpoq. FN-ip nunarsuarmi anguniagaanit 17-init allagartalersuineq aallaaveqarpoq, avatangiisinut, aningaasaqarnermut inuttullu atugassanut naligiimmik pingaartitsinermik aallaaveqarluni.
Nunat Avannarliit Siunnersuisoqatigiivi tusagassiuutinut nalunaarummi taama ilisimatitsipput:
- Kalaallit Nunaanni, naatsorsuutigineqartumit siusinnerusukkut arfinileriaammik sukkanerusumik sikumik aakkiartorfiusumi, kommunip inissiaatileqatigiiffia Iserit A/S maluginiarnartumik sanaartornermik ingerlatsivoq, tassani sanaartornermi atortussat, assartuineq, sulisartut atugaat, eqqagassalerineq inuttullu atukkat eqqarsaatigeqqissaarlugit mingutsitsinnginnerusumik sanaartortoqarluni, siunnersuisoqatigiit innersuussinerminni allapput.
Nukissiornermik atuinikinnerungaatsiartut
Inissialiornerit sanaartornermut malittarisassani piumasaqaatinit 50 procentimik nukissiornermik atuinikinnerusut, Nunat Avannarliit Siunnersuisoqatigiivisa erseqqissarpaat.
- Iserip sanaartornera Kalaallit Nunaanni maligassaalluarpoq, Nunat Avannarliit Siunnersuisoqatigiivi allapput.
Nunat Avannarliit Siunnersuisoqatigiivisa avatangiisinut nersornaasiuttagaat 1995-imiilli tunniunneqartarpoq.
