Nuummi innuttaasut nuukkumannginnerpaapput

Suna pissutigalugu innuttaasut illoqarfinnut, ilaatigullu Danmarkimut, nuuttarpat?

"Nuukkusunnissamut piareersimanerup" misissorneqarnerannit tamanna qulaarneqarpoq.

Kalaallit Nunaanni najugaqariaatsimik ukiuni arlalinni allanngortitsisumik misissuinissaq pillugu politikkikkut kissaateqarneq tunngavigalugu misissuineq Naalakkersuisut aallartippaat, innuttaasummi inoqarfinnit minnerusunit inoqarfinnut annerusunut nuukkiartuaarsimammata.

Misissuineq nalunaarusiami „Sumi najugaqarusuppit“-mi allaaserineqartoq naapertorlugu innuttaasut inoqarfinni minnerusuni najugallit najugaqarfiat minnerujartortilluni nuukkusunnissamut piareersimaneruneq annertunerusarpoq.

Inuusuttuttaaq utoqqarnit nuukkusunnissamut piareersimanerupput, taavalu angutit arnallu nuukkusunnissamut piareersimanerat assigiingajattoq nalunaarusiami allassimavoq.

Inissiat peqqissuserlu kajuminnerulersitsinerpaapput

Nuukkusunnissamut piareersimaneq Nuummi appasinnerpaavoq:

- Kommuninut nunallu immikkoortuinut arfineq-marluusunut tunngatillugu Nuummi nuukkusunngitsut amerlanerpaajupput, tassanilu Avannaata Kommunia Qeqertarsuup Tunuata avannaaniittoq nunap immikkoortuatut innuttaasuni nuunnissamut piareeqqanerpaaffiuvoq, misissuinerup eqikkarneqarnerani allassimavoq.

Nunat immikkoortuini assigiinngitsuni nutsernermut pissusiviusut assigiinngitsuugaluartut, pissutaasut marluk pingaarnerpaat tassaapput:

- Tassani inissiatigut atugassarititanut pitsaanerusunut aamma peqqissutsikkut atugassarititanut pitsaanerusunut periarfissaqarnissaq pillugu kissaateqartoqarpoq. Nunatsinni piffiit ilaannut tunngatillugu pisussat assartuisarnermut, aqqusersuuteqarnermut attaveqaateqartarnermullu pitsaanerusumik periarfissaqartitsisut pillugit kissaataasut aamma ilanngunneqarput, misissuinermi allassimavoq.

Nunatsinnit nutserartut amerliartuinnassapput

Aammattaaq inuup nammineq soqutigisai, soorlu aallaarniarnissamut aalisarnissamullu periarfissatsialannut periarfissaqarnissaq kiisalu ilaquttanut ikinngutinullu periarfissaqarnissaq pineqarput.

Siunissaq eqqarsaatigalugu illoqarfinni najugaqartut amerliartuinnarnissaat nunatsinnillu nutsertut amerliartuinnarnissaat nalunaarusiami nalilerneqarpoq:

- Illoqarfinnut annernut suli nutserartarnissat kiisalu Nunatsinnit nutserartarnissat naatsorsuutigisariaqartut, ukiut tallimat qaangiuppata sumi najugaqalersimanissamut naatsorsuutigisat misissuiffigeqqissaarneranni aamma paasinarsivoq.

- Inoqarfiit annerpaat tallimat ilaanni inoqarfik ataaseq innuttaasunik inoqarfinnit allaneersunik suli suunngitsumik nuuffigineqarnerpaasartussatut naatsorsuutaavoq, nalunaarusiami "Sumi najugaqarusuppit?"-mi allassimavoq.

Nalunaarusiaq tamaat Naalakkersuisut nittartagaanni atuarneqarsinnaavoq.