Nuummi inuussutissalerinermik allaffik nutaaq ammarneqartoq
Danmarkimi inuussutissalerinermut ministerip Jacob Jensenip aalisarnermut, piniarnermut, nunalerinermut imminullu pilersornermut naalakkersuisoq Peter Borg ataatsimeeqatiginiarlugu Kalaallit Nunaanniippoq. Tikeraarnermini inuussutissalerinermik aqutsisoqarfiup allaffiata ammaanersiorneqarnerani aamma peqataavoq.
Assi: Arnaq Nielsen
Inuussutissalerinermik Aqutsisoqarfiup Nuummi allaffia sisamanngornermi pisortatigoortumik ammarneqarpoq. Qallunaat inuussutissalerinermik ministeri Jacob Jensen (Ventre) peqataavoq.
Danmarkimit Kalaallit Nunaanniillu inuussutissalerineq aalisarnerlu ukiorpassuarni qanimut suleqataaffigineqarput, Jacob Jensenillu tikeraarnera aalisarnermut, piniarnermut, nunalerinermut imminullu pilersornermut naalakkersuisunngortup Peter Borgip (D) siullermeerluni ataatsimeeqatiginissaanut periarfissaavoq.
Taakku inuussutissalerinermik uumasunullu nakorsaqarnermut sulisoqarnikkut Kalaallit Nunaata Danmarkillu akornanni paarlaasseqatigiittarnissamik sinaakkutissat atsiorpaat.
- Nuummi allaffittaarnermut nuannaarutigaara. Danmarkip Kalaallit Nunaatalu inuussutissanut tunngasutigut suleqatigiinnerat suli qaninnerulersoq tassuuna takussutissaqalerpoq.
- Sulisunik paarlaasseqatigiinnissamik isumaqatigiissut aamma atsiorparput – assersuutigalugu uumasut nakorsaata suliassaqarfiani. Tamanna nunat marluullutik iluaqutigisinnaavaat. Tamanna aamma suleqatigiilluarnermut takussutissaavoq, Jacob Jensen tusagassiuutinut nalunaarummi oqarpoq.
Kinamik isumaqatigiissuteqarneq nutaaq
Aalisakkanik tukertitaanngitsunik Danmarkimiit Kalaallit Nunaanniillu Kinamut avammut tunisaqartarnissamik isumaqatigiissummik inuussutissanut ministeri Kinami sapaatit-akunneri marlussuit matuma siorna tikeraarnermini atsiorpoq.
Isumaqatigiissut taanna Peter Borgip Jacob Jensenillu aamma eqqartorpaat. Aalisakkat suunerit ataasiakkaarlugit akuersissummik tunineqartarunnaarlutik isumaqatigiissut aqqutigalugu aalisakkat tukertitaanngitsut Kinamut tuniniarneqarnissaat ajornannginnerulissaaq.
- Suleqatinnik Peter Borgimik ataatsimeeqateqarnissara qilanaarisimaqaara, ilaatigut isumaqatigiissut qallunaat kalaallillu suliffeqarfiisa aalisakkanik tukertitaanngitsunik Kinamut avammut niuersinnaanerannik ajornannginnerulersitsisoq eqqartornissaanut, Jacob Jensen oqarpoq.
Inuussutissalerinermut Aqutsisoqarfiup allaffia pisortatigoortuunngitsumik januaari 2025-mi ammarneqarpoq. Aalisakkat nerisassiallu Kalaallit Nunaanni avammut tunisassiat misissornissaannik isumaginnittuuvoq. Piffissap ingerlanerani suliaqarnerujartussalluni.
Inuussutissanik avammut niuerneq danskit naalagaaffiannit suli akisussaaffigineqarpoq, akisussaaffiulli Kalaallit Nunaannut nuunneqarnissaa politikkikkut eqqartorneqarluni. Taamaattumillu nuunneqarnera tamatumunnga attuumassuteqarpoq.
