Nuup ilaani Qaqortumi illupilorujussuit amerleqqissanngillat

Kommuneqarfik Sermersuumi illoqarfiup ilaanut pilersaarut sukanganerpaaq.

Nuummi illoqarfiup ilaanut qangarnitsanut, Qaqortumut aamma Avannarlernut illoqarfiup ilaanut pilersaarut sakkortuumik taaguutaa taama ippoq, taannalu 2018-imi aggustimi kommunalbestyrelsip akuersissutigaa.

Sukaterutaasoq marlunnik aalajangiisunik siunertaqarpoq: Ilaatigut GTO-p typehusiaraanik tulleriiaartunik tamaani immikkuullarissutsip attannissaa; ilaatigullu sumiiffiup ilaqutariinnut nutaaliaasunut inissiaqarfittut kajungernartutut ineriartortinnissaa.

Ukiut arfineq-marluk qaangiuttullu illoqarfiup ilaanut pilersaarut aamma taamatorsuaq sukangassuseqanngitsoq kommunalbestyrelsip nassuerutigiinnartariaqarpaa.

Periarfissarsiaqarfiit, aamma paasisassatut nassuiaatitut periarfissat inissianik piginnittut typehusinik isaterinissaannut, illunillu anginerujussuarnik sanaartornissamut akuersissuteqarfiusarput, tamanna illoqarfiup ilaanut pilersaarutip anersaavanut siunertaanullu akerliulluni. Allanngoriartorneq, taamaalisukkut sanilerisanit illoqarfiup ilaanik najugaqarfigisaminnik ilisarnarunnaarsitsisutut allannguuteqartumik isiginnittuusunit naammagittaalliuuterpassuarnik nassataqartoq.

2018-imi illoqarfiup ilaanut pilersaarummik akuersissuteqarnerup kingornatigut kommune illunik isateralunilu najugaqarfiusumi illunik anginernik sanaartornissamut qulinik akuersissuteqarsimavoq.

Illut millionilikkaanik nalillit

Nuummi Netboligimik piginnittoq, illunik tuniniaasartoq Thomas Rix Qaqortumi illunik nioqqutiginiakkanik peqartuarpoq.

- Qaqortoq tassaavoq sumiiffik inissiaqarfik kajungernartoq, nipaatsoq, oqaluttuarisaanermullu tunngasoq, qanittunnguarisaaniilluni Nuuk nutaaliaq, Sermitsiamut Thomas Rix oqarpoq.

Maannakkorpiaq Netbolig Gertrud Raskvejimi GTO-typehusimik 1.795.000 koruunuligassamik nioqqutigisaqarpoq. Illu 1959-imeersuuvoq, 81 kvadratmeteriulluni – kvadratmeterimut ataatsimut aki 22.160 koruuni.

Nioqquteqarnermut ussassaarummini Netbolig erseqqissuliuutigisavimmik allappoq illu iluarsaanneqarsinnaasoq, imaluunniit allineqarsinnaasoq, aammali illumut nutaamut anginerusumullu inissaaliiniarluni isaterneqarsinnaasoq. Nuummilu inoqarpoq illumik to millionit koruuningajannik akilimmik pisiaqarsinnarlutik erniinnaartumik isateralutillu nutaamik illuliornissamut piareersimasunik.

Soorluttaaq TV-kkut aallakaatitassiami ”Hammerslag”-imisulli Nuup Qaqortuani pingasut aalajangiisuupput: Inissisimaffik, inissisimaffik aamma inissisimaffik.

Qaqortumi typehusit, GTO-mi illunik titartaasarfiup 1950-ikkunni aamma 1969-ikkunni titartagai toqqammavigisatut inissisimaffigisaminni qaqutiguinnakkut 80 kvadratmeterinik anginerusarput.

- Typehusitoqqat ilaqutariinnut tamarmiusunut ataatsinut sananeqarput, ilaqutariinnulli nutaalianut mikivallaarput. Qaqortumi nutaanngorsaaneq sumiiffimmi oqaluttuarisaanermik, immikkullu ilisarnaataasumik ataqqinnilluni pissaaq, illoqarfiulli ilaanut pilersaarut sukangavallaartoq pitsaassutsip pisarialittut kivitsiviginissaanut aporfissanik inissiisinnaavoq, Thomas Rix oqarpoq.

Ukiumi siusinnerusumi Gertrud Raskvejimi Netbolig illumik tunisaqarpoq, taannalu allannguuteqarnermik iliuuseqarfiuvoq. Typehusitoqaq isaterneqarpoq, illulu nutaaq 170 kvadratmeterinik angissusilik sanaartorneqarpoq. Akia: 5.950.000 koruuni. – kvadratmeterimut aki 30.558 koruuni.

- Illu sap. akunnialunnguit qaangiummata tunineqarpoq, tassalu aki eqqortoq atorlugu nioqqutigineqarmat, Thomas Rix oqaluttuarpoq.

Akialu eqqortoq suugami? Tassaavoq niuffaffimmi akiusoq.

Toqqaviit portusuupilussuit

Inoqarfinnik matooraanerit, innuttaasullu eqimattuuffinnut nutserartitaaneri malittaralugit ilaqutariinnut Nuummut nutsertunut Qaqortumi Grønlands Tekniske Organisationip, GTO-p 1950-ikkunni aamma 1960-ikkunni typehuserpassuit taakku sanaartorpai.

Ukiut tusintilikkaat nikinnerisa nalaanni Qaqortup ilusaa allanngoriartulerpoq. Ilaqutariit amerliartuinnartut tamatuma eqqissisimanartuuffiunera, isikkivigilluinnartuuneralu arajutsisimajunnaarpaat, taamanikkullu kommunalbestyrelsiusup sumiiffimmut illoqarfiup ilaanut pilersaarut 2009-mi aggustimi akuersissutigaa, tamannalu attassiniartuussallunilu nutarsaaniartuusussaavoq.

Nutarsaaniarnerli pineqarneruvoq.

2011-mi Sermitsiap allaaserisaq ”Monsterhus i Myggedalen” saqqummiuppaa, tassanilu pineqarpoq illuarannguaq isaterneqartoq, illumik anginerujussuarmik taarserneqartoq. Illup nutaap illoqarfiup ilaanut pilersaarutip quleriinnut 1 ½-inut killilersuutigisai malittarai, Gertrud Raskvejilli tungaanut nunatamut assut sivinganeqartumut 5 ½ meterinik portussuseqartumik betonngimik toqqavilerlugu sanaartorneqarpoq.

2017-imi Nuummi Eqqaamasat (peqatigiiffik) pillugu Sermitsiaq allaaserisamik ”Kræver byggeri stoppet” saqqummiussaqarpoq, peqatigiiffiup Annaassisitta Oqaluffianut qanittuaqqamik illuliornissaq akerliliiffigalugu. Taamatuttaaq illu 1 ½-inik qalereeqarpoq, Avannarlernullu sammiveqartumik assorsuaq portussuseqartitamik betonngimik toqqaveqarpoq.

Illoqarfiup ilaanut pilersaarummi pineqarput qaleriinni 1 ½-ini ”ammasumik/pukkitsumik sanaartukkat”, toqqaveqarujussuaqarnermikkulli illut piviusutut quleriittut 2 ½-ilittut sanaartugaapput. Naqqup teknikkimut toqqortaatinullu atornissaanut illoqarfiup ilaanut pilersaarut akuerinnippoq, najugaqarfiginissaanulli akuersinani. Toqqaverujussuit arlallit matoqartiterrapput, igalaaminnilu qaamanertaqartarlutik. Immaqa malittarisassiat malinneqarput, immaqali aamma naamik.

Pilersaarusiornermut nunaminertanillu atugaqarnermut Inatsisartut inatsisaat, pilersaarusianut inatsisitut taaneqartartoq kommuninut nunaminertanut tamanut, aamma inuit namminneq pigisaattut illunut sunulluunniit nakkutilliiartortarnissamut, uuttortaasarnissanullu attavissaliivoq. Taamaalisukkut pilersaarusianut inatsit pissutsit inatsisinik unioqqutitsisuunnginnerinik qulakkeerinninnissamut illumik piginnittumut pisussaaffiliivoq.

- Isumalluutitsigut pisinnaanitsigut ingerlatsivik nakkutilliinernik isumaginnippoq, pissutsillu akuersissutaasunut naapertuutinngikkaangata peqqussutit pillugit kalerrisaarutinik tunniussaqartarpugut, Kommuneqarfik Sermersuumi pilersaarusiornermut oqartussaaffimmullu pisortaq Runa Sværd Sermitsiamut oqaaseqarpoq.

Meeraanerup nalaani aqqusineq

”Illoqarfiup ilaanut pilersaarutini sukanganerpaaq” 2018-imeersoq Nuummi Eqqaamasanut siulittaasup Orla Dalagerip pikkunarivallaanngilaa.

- Illoqarfiup ilaanut pilersaarut sumiiffimmi oqaluttuarisaanermut tunngaffeqartumi takussunartorpassuarnik pilersitaqarsimavoq, Orla Dalager Sermitsiamut oqarpoq.

- Illoqarfiup ilaanut pilersaarummit immikkut akuersissuteqarnerit kommunimi ingerlatsivimmiit tunniunneqapallaannarneqartarput, inuillu ooriutillit isateralutillu angisuunik sanaartortartuupput. Isigiuminaaqaaq, aammalu Nuummi Qaqortup Avannarliillu sinniisuuffigisaattut immikkut ittuussuseq sumiiffimmi illuliortarnermi ileqqorisamut akerliusunit illunit arriitsumik qularutissaanngitsumilli aseroriartuaarneqarpoq.

Allanngoriartorneq tamanna Orla Dalagerip aarleqquteqarfigaa.

- Amerlaqaat Qaqortumi meeraasimasut, aammalu aalisartut sulisartullu najugaqarfigisaattut atugaasumik anersaaqarnermik immikkut ittuusumik eqqaamasaqartut. Inersimasutut meeraanerup nalaani aqqusinermut uteqqikkusupput, sumiiffimmili illoqarfiup ilaanut pilersaarutip allanut aqqutissiuisuusup pilersitaatut akigititani inissisimaffimmit qaffasissorujussuarmit pakkersimaneqarput.

Nuummi Eqqaamasat pillugit peqatigiiffik 2017-imi Annaassisitta Oqaluffiata eqqannguani sanaartornermut sakkortuumik akerliliigaluarpoq, iluaqutaanngitsumilli.

- Nuummi illoqarfiup ilatoqaanut tunngatillugu tusarniaaffigisartakkatut akuerisaavugut, kommunilli uagut tusarnaanngilaatigut, aammalu najugaqartut tusartanngivippai, Orla Dalager oqarpoq.

Kommunimit kalerrisaarutaasutut illoqarfiup ilaanut pilersaarutip sukaternissaa peqatigiiffiup pisariaqartilluinnarpaa.

- 2018-imili kukkusaqarfigisatut sukaterinermit misilittakkatigut upperilinnginnerani atuuttuulernera takorusuppara, Orla Dalager oqarpoq.

Illoqarfiup ilaanut pilersaarut nutaaq takkutilerpoq

2018-imit illoqarfiup ilaanut pilersaarutip Qaqortoq aamma Avannarliit ilaannakortutut eriagisarialittut nalunaagarai: Illut ataasiakkaat eriarisariaqartuupput, sumiiffiullu ilaa eriagisarialittut sanaartortiterfiuvoq.

- Sumiiffik illoqarfimmi innuttaasunut aamma tikeraanut immikkut illuinnartumik pingaaruteqarpoq. Taamaattumik illoqarfiup ilaata illulioriaatsikkut naleqartuuffiisa attallugillu illersugaanissaat pingaartuuvoq, sanaartornermut avatangiisinullu ingerlatsivik kommunalbestyrelsimut allakkiami allappoq.

Ingerlatsivillu aarlerisaarussuteqarpoq.

- Ukiuni kingulliunerusuni illut pinngoqqaartut tamakku isaterniarnerinut nikeriarnermik pinngortoqarsimavoq, taakku kvadratmeterinik amerlanipilussuarnik taarserneqartarput, aammalu illut annertuupilussuarmik portussusilerneqartarput. Ilassutitut killilersuutinik kommune akuersissuteqassanngippat sumiiffimmi illut amerlasuut illunik nutaalianik taarserneqarnissaat ilimanassaaq, Nuummilu ineriartortitsinikkut oqaluttuarisaanerup ilaa illulioriaatsip ilaanik pingaarutilimmik ilaqarluni tammartussaassaaq.

Qaqortumut Avannarlernullu illoqarfiup ilaanut nutaamik pilersaarusiortoqassasoq ingerlatsiviup inassuteqaatigaa, taassuma sumiiffik tamaat eriagisarialittut taakkartussallugu. Taamaalisukkut illoqarfiup ilaanut pilersaarutip takkuttussap illut isaterneqartut taamaallaat maannakkut illup angissuserisaata iluani sanaartugaanissaat qulakkiissavaa.

Kingullermik ataatsimiinnermi inassuteqaammik malittarisaqarnissaq kommunalbestyrelsip aalajangiuppaa.