Meeqqat tusaaniarneqartarnissaat Naalakkersuisut meeqqat ulluanni oqariartuutigaat
Meeqqat tusaaniarneqartarnissaat, oqaanneqartarnissaat illersornissaallu pingaaruteqartoq, Naalakkersuisut allapput.
Meeqqat ulluanni Color Run, tassa qalipaatinik millooraluni arpartitsineq, aaqqissuunneqartarpoq. Sisimiuni Nalunnguarfiup Atuarfiani juunip aallaqqaataani 2024-mi assilisaq.
Assi: Dorthe-Ivalo Jensen
Ullumi meeqqat ulluat. Naalakkersuisut tassunga atatillugu toqqissisimanissaq, isumassorneqarnissaq meeqqallu tusarnaarneqartarnissaasa pingaaruteqassusaat saqqummiuppaat.
Meeqqanut, inuusuttunut inatsisinut atuutsinneqarnerannut naligiissitaanermullu naalakkersuisoqarfiup tusagassiuutitigut nalunaarutigaat.
Meeqqat ulluat illoqarfinni nunaqarfinnilu amerlasuuni nalliussineqartarpoq. Meeqqat, ilaqutariit nunaqqatigiillu assigiinngitsunik aaqqissuussinernut sammisassaqartitsinernullu aggersarneqartarlutik.
- Ilutigisaanik inersimasutut akisussaaffeqarnitsinnik ullumi eqqaasinneqarpugut. Meeqqat tamarmik toqqissisimanartumi, isumassorneqarlutik, asaneqarlutik aammalu inersimasuniit tusarnaarneqarlutik peroriartornissaminnut pisinnaatitaaffeqarput, tusagassiuutitigut nalunaarummi allappoq.
Meeqqat angajoqqaaminnit perorsarneqarnissartik, oqaaqqissaarneqartarnissaq ilitsersorneqarnissartillu pisariaqartikkaat naalakkersuisoqarfimmiit aamma allapput.
- Meeqqat qanoq misiginertik pillugu toqqartumik ilaatigut oqaluttuarfigisarpaatigut. Ilaatigut pissusilersornermikkut, nipaallisimanermikkut qanorluunniit ittuunermikkut tamanna ersersittarpaat, ingammik meeqqat mikinerit, misigisartakkaminnik aammalu misigissutsiminnik immaqa suli oqaasinnguisinnaanngitsut. Meeraq ikiorneqarnissaminik aammalu tapersersorneqarnissaminik pisariaqartitsigaangat uagut inersimasuusugut qanilaartuunissamut aammalu apersuisarnissamut ataatsimut akisussaaffeqarpugut.
Naalakkersuisut naggataagut meeqqat ilaqutariillu tamaasa Meeqqat Ulluanni ullorsiorluarnissaannik kissaappaat.
