Qeqqata Kommuniani ataatsimiititaliat ataavartut tallimaasut arfinilinngorataannaapput. Tamanna kommunimi qinikkat amerlanerussutillit sisamanngornermi aalajangerpaat.
Attaviitsoq, Gideon Lyberth, inuussutissarsiutinut aatsitassaqarnermullu ataatsimiititaliamik pilersitsisoqarnissaanik siunnersuuteqarpoq. Tamanna illua-tungiliuttut, maannakkut amerlanerussuteqartut, tassa Naleqqameersut, Atassummeersup, Demokraatineersut attaviitsullu akueraat.
Qeqqata Kommuniani ataatsimiititaliat ataavartut tallimaasut arfinilinngorataannaapput. Tamanna kommunimi qinikkat amerlanerussutillit sisamanngornermi aalajangerpaat.
Attaviitsoq, Gideon Lyberth, inuussutissarsiutinut aatsitassaqarnermullu ataatsimiititaliamik pilersitsisoqarnissaanik siunnersuuteqarpoq. Tamanna illua-tungiliuttut, maannakkut amerlanerussuteqartut, tassa Naleqqameersut, Atassummeersup, Demokraatineersut attaviitsullu akueraat.
- Naleraq, Atassut, Demokraatit attaviitsorlu siunnersuuteqartup siunnersuutaa taperserparput. Tasersiaq Maniitsumut, Qeqqata Kommunianut, iluaqutaangaartussaavoq, taamaammat pingaaruteqarpoq ataatsimiititalimik pilersitsinissaq. Taamaammat siunnersuut tamakkiisumik taperserparput, Nathan Møller (N), oqarpoq.
Borgmesteriutitaqartut akerliusut
Siunnersuulli borgmesteriutitaqartut, maannakkut ikinnerussuteqartut, tassa Siumukkut Inuit Ataqatigiillu akerleraat. Taakkua allattoqarfiup naliliinera taperserpaat. Tassa inuussutissarsiutinut aatsitassanullu tunngasut, aningaasaqarnermut ataatsimiititaliap, maanna piusup, suliassaasa ilaanneereertut.
Suleqatigiit oqaaseqartuata siunnersuut pissaaneqarniutaannaasutut nalilerpaa.
- Ataatsimiititaliamik pilersitsiniarneq ataasiinnavimmik siunertaqarpoq, tassalu kommunalbestyrelsimi amerlanerussutillit allanngorsimanerannik.
- Isumaqanngilagut aningaasaqarnermut ataatsimiititaliap akisussaaffingeriigai nutaatut taaneqarsinnaasut, Evelyn Mølgaard (S), oqarpoq.
Taamali oqarneq siunnersuuteqartup suleqataata akerlilerpaa.
- Amerlanerussuteqarneq aallaavigiinnarlugu siunnersuutaanngilaq, pisariaqarmanuna siunnersuutaasoq, Karl Lyberth (N), oqarpoq.
Aalajangerneq suli atuuttussanngunngitsoq
Amerlanerussutillit ataatsimiititaliornissamik aalajangiinerat maannakkumut atuutinngilaq. Ikinnerussuteqarlutik borgmesteriutitaqartut aalajangerneq Nunamut Namminermut Naalakkersuisoqarfimmi, Nakkutilliisoqarfimmut, suliareqqitassanngortillugu ingerlateqqippaat. Tamanna kommunimi pisortaanerup aamma uppernarsarpaa.
- Suliaq Nakkutilliisoqarfimmut ingerlassaaq, aatsaallu tassanngaanniit akuersissutigineqarpat suliaq ingerlaqqissinnaalluni, Hans Christian Sværd, kommunimi qinikkanut nassuiaavoq.
Borgmesterip, Malik Berthelsenip, Nakkutilliisoqarfimmit juunip naalernerani ataatsimeeqqilerunik akissutissarsereersimanissartik naatsorsuutigaa.
Ataatsimiititaliaq akuerineqassappat Qeqqata Kommunia qinikkanut allaffissornermullu aningaasartuuteqarnerulissaaq. Assersuutigalugu ataatsimiititaliami siulittaasoq, 84.000 koruuninik, kommunalbestyrelsimut ilaasortaanermi saniatigut, ajunngitsorsiaqartinneqassalluni.
