Siunnersuisooqatigiit: Ilinniartitaanermi anguniakkat pingaarnerit anguneqarsinnaagunanngillatMeeqqat atuarfianniit ingerlariaqqillutik ilinniagallit arriitsumik amerliartorput, maannakkullu suliniutit ineriartornerlu eqqarsaatigalugit ilinniartitaanermut periusissiami anguniakkat pingaarutillit arlallit anguneqarsinnaanaviaratik, Kalaallit Nunaanni Ilinniartitaanermut siunnersuisooqatigiit nalunaarusiaminni nutaami taama naliliipput.
Inuusuttut amerlasuut meeqqat atuarfianniit ilinniarnertuunngorniarfimmiluunniit ingerlariaqqinneq ajornerat unammilligassaasoq, Ilinniartitaanermut siunnersuisooqatigiit naliliipput.
Toqqorsivimmit: Oscar Scott Carl
Kalaallit Nunaanni Ilinniartitaanermut Siunnersuisooqatigiit innuttaasut ilinniartitaaneranni qaffassarniarlugu anguniakkat pingaarutillit piviusunngorsinnaanerat qularutigalugu, killiffilik pillugu nalunaarusiami inerniliutigaat.
Naalakkersuisut Ilinniartitaanermut periusissiaanni 2024-miit 2030-mut atuuttumi anguniakkat eqqarsaatigalugit ineriartorneq maanna arriippallaarpoq.
Inuiaqatigiinni ilinniagallit amerliartorput, kisiannili politikerit anguniarlugu siunnerfiat eqqarsaatigissagaanni arriinnerulluni, siunnersuisooqatigiit nalunaarusiami allapput.
Ilaatigut 2030-mi 30-t 35-llu akornanni ukiullit 70 procentiisa inuussutissarsiornermut tunngasunik ilinniagaqarnissaannut tunngasoq.
Ilinniartitaanermut Siunnersuisooqatigiit anguniagaq timitalerneqarsinnaanngitsoq naliliipput, kisitsimmi piffissami sivisuumi 55 procentit missaanniissimammat.
Innuttaasut
tunngaviusumik atuarfinni ilinniagaqartut amerlassusaasa piffissami 2002-miit 2023-mut ineriartornerat titartakkami takutinneqarpoq. Amerlassutsimikkut
2002-miit 42%-it missaanniit 2023-mi 56%-it missaannut amerleriarsimapput. Qaffariaat
ukiuni siullerni malunnarnerpaavoq, tamatumalu kingorna ineriartorneq
annikilliartulersimalluni, 2023-illu tungaanut qaffakkiartorusaarluni. Siumukartoqaraluartoq
ineriartorusaartoqarpoq, tamatumunngalu ersersitsivoq ilinniartitaanermi qaffasissutsit
piffissami sivisungaatsiartumi allanngoriartuaarsimanerinik, Kalaallit Nunaanni Ilinniartitaanermut siunnersuisoqatigiit allapput.
Pingaarutillit piffissami sivitsortumi ingerlalluanngitsut Kalaallit Nunaanni Ilinniartitaanermut Siunnersuisooqatigiit qitiusumik ilinniartitaanermut naleqqersuutit akimorlugit maannamut killiffimmiit 2030 tungaanut anguniagassatut aalajangiunneqartut akornanni malunnartumik amigaateqartoqarnera takussutissianngorlugu suliaqarput:
"Naak naleqqersuutit ataasiakkaat takutikkaluaraat arriitsumik pitsaasup tungaanut ineriartortoqaraluartoq – matumani ilanngullugu tunngaviusumik ilinniarfiup saniatigut inersimasut ilinniagaqartut – ataatsimut isigalugu arriitsumik siumut ingerlasoqarpoq, siunniunneqartut anguniarnerini pisariaqartinneqartumik sukkassuseqarnissamut tunngatillugu naammaginarani," Kalaallit Nunaanni Ilinniartitaanermut Siunnersuisooqatigiit nalunaarumminni allapput.
GUX-imik aamma inuussutissarsiutinut ilinniagaqarfinni kiisalu meeqqat atuarfianniit inuusuttut ilinniagaqarfiinut ikaarsaarnermik naammassinnittartut piffissami sivitsortumi ingerlalluarsimanngitsut siunnersuisoqatigiit allapput.
Anguniakkat pissutsillu nikingassutaat takussutissiami ersersinneqarput.
Tusarfik: Ilinniartitaanermi periusissiq + Annual Work Plan
Ilinniartitaanermut tunngasuni sulisussaaleqinerup annertunera, aningaasaqarnikkut aammalu sulisutigut, aaqqissuussamik malitseqartitsinissamut, naliliinissamut ilikkartitsinissamullu piginnaasat killeqarnerat, Ilinniartitaanermut siunnersuisoqatigiit tikkuarpaat.
"Piviusunngortitsinissamut piginnaasat pitsaanerusumillu paasissutissanik tunngavissat nukittorsarneqanngippata 2024-2030-imut Ilinniartitaanermut periusissiat eqaatsumik aqunneqarnissaanut pingaarnertut anguniagaqarnermut kinguarsaataassasoq ataatsimut nalilerneqarpoq," siunnersuisoqatigiit allapput.
Siunnersuisooqatigiit periusissiami anguniarneqartut timitalernissaannut arlalinnik kaammattuuteqarput. Anguniarneqartoq, akisussaaneq missingersuutillu ersarissumik ataatsimoortillugit periusissiap piviusunngortinneqarnissaanut pilersaarut tapersersorneqartariaqartoq siunnersuisooqatigiit tikkuarpaat.
Nunap karsiata aningaasaqarniarnerata unammilligassaqarnerata kingunerisaanik sipaarniartariaqarneq ilinniartitaanermut eqquisoq, siunnersuisooqatigiit aamma sammivaat, taamaalilluni "patajaatsumik aningaasalersuisoqarnissaa qulakkeerneqarnissaa kaammattuutigineqarpoq, taamaaliornikkut ineriartortitsinermi suliniutit qanittoq ungasinnerusorlu isigalugit sipaarniutaannginniassammat."
