Odensemi Københavnimilu inuiattut ullorsiornermi peqataasorpassuit
Odensemi pisarneq malillugu ukioq manna inuiattut ullorsiorneq nalliussineqarmat Nordatlantisk Husimi umiarsualiviani inuppassuit najuupput. Københavnimi ilaatigut kaagillernermik ulloq malunnartinneqarpoq.
Nalliuttorsiorneq erinarsoqatigiit Umiaq erinarsorneranni Erfalasutta nalunaaqutaq ulloqeqqanut amuneqarneranik aallartippoq. Peqatigiiffimmi Umiami siulittaasoq Grethe Schmidt oqalugiartuuvoq.
Nordstlanstisk Husip iluani aneerasaartarfianilu ulloq malunnartinneqarpoq.
Qujanartumik Danmarkimi aasaanerani sila allanngorartuartuusoq ullormi atorsaavoq, tamannalu nuannaarutigisinnaavarput.
Inuit ikinnerpaamik 450-it najuupput
Oqalugiartut arlaqarput. Christoffer Lilleholt, Odense Kommunemi suliffeqarnermut isumaginninnermullu aqutsisoqarfimmi siulittaasoq, Camilla Siezing, peqatigiiffimmi Inuimmi siulittaasoq aamma Nordatlantisk Husimi Kalaallillu Illuanni pisortaq Annette Lyberth, minnerunngitsumillu: Ukiumi tupaallatsitsisoq, ilinniarnertuunngorniaq Aviaya Andersen Koldingimeersoq, siornatigut oqalugiarnermut atatillugu oqalugiallaqqinnerpaatut innersuussaasimasoq oqalugiarpoq.
Soorunami oqalugiartunit kunngi Frederik X ukioq manna Atlantikup Avannaani Illuutinut illersuisunngortoq arlaleriarluni eqqaaneqarpoq.
Pisarneq malillugu Royal Greenlandip tunisassiaanik misileraaneq tigulluarneqarpoq. Peqataasorpassuilli aaqqissuussinermik angummatsitsiniaapput. Aaqqissuisut naatsorsuutigaat inuit 350-it peqataanissaat, 100-nillu amerlanerusut takkupput, tassa 450-it missaat.
Iluatsipporli. Kikkut tamarmik tamussersorput, aamma kaffisorlutillu kaagisorput. Meeqqanut minnernut pississaartarfik napparneqarsimavoq. Meeqqanut annernut inersimasunullu minigolfertarfik aliikkutarineqarsinnaavoq, ataatsimuualaarnerullu ingerlanerani nuannarineqarluartut Ulf Fleischer aamma Christian Søgaards Trio tusarnaartitsipput.
Umiaq nereqatigiissitsisoq
Odensemi aamma ileqquusoq malillugu peqatigiiffiup Umiap inunnut peqataaniarlutik nalunaarsimasunut ulloq naggaserlugut nereqatigiissitsivoq.
Københavnimi Erfalasorput amuneqarpoq
Københavnimi inuiattut ullorsiorneq aamma malunnartinneqarpoq, pisortat namminersortullu illuutaanni erfalasut amuneqarsimallutik.
Folketingip iserfiata pingaarnersaani ullormut tamatumunnga atatillugu qallunaat kalaallillu erfalasui aamma takuneqarsinnaapput.
Kalaallit Illuutaanni Løvstrædemiittumi erfalasutta amuneqarnissaanut, kaagillernermik erinarsoqatigiinnissamullu qaaqqusisoqarpoq. Kalaallit Illuutaanni siulersuisuni siulittaasuusimasoq Martha Labansen aamma Inuit Ataqatigiit sinnerlugit Folketingimut ilaasortaq Aaja Chemnitz ilaatigut oqalugiartuullutik.
150-init amerlanerusut inuiattut ullorsiornermi takkupput.
