Ole Madsen sølviusumik nersornaaserneqarpoq
Ole Madsen ukiorpassuarni inuiaqatigiinnik akuuffigisaminik, nammineq piumassutsimik peqatigiiffilerinermi suliassanik assigiinngitsunik isumagisaqartarnermigut kiisalu ukiorpassuarni pattattartutut ajoqitullu sulisimanermigut sulilu sulinermigut, annertuumik sullissisimanini pissutigalugit sølviusumik Nersornaaserneqarpoq. Inatsisartut Siulittaasuata Mimi Karlsenip Qasigiannguit Oqaluffiata ataatsimiittarfiani nalliuttorsiorpalaartumik katerisimaarnermi Ole Madsen sølviusumik Nersornaaserpaa.
Assiliisoq: Inatsisartut Allattoqarfiat
Nersornaasiinermi Inatsisartut siulittaasuata Mimi Karlsenip Madsenip Qasigiannguani nammineq kajumissutsiminik sulinermini qasusuilluni sulisimanera erseqqissarpaa:
- Inatsisartut Siulittaasoqarfiata sølviusumik Nersornaaserpaatsit ukiorpassuit ingerlanerini assigiinngitsorpassuartigullu inuiaqatigiinnik akuuffigisannik annertuumik sullissisimanerit pissutigalugu.
Ukiorpassuarni suliaqarsimaqisoq
Ole Madsen ukiorpassuarni peqatigiiffinni nammineerluni siulersuisutut, organistitut, ajoqitut illoqarfiullu meerartaanut inuusuttuaqqanullu siunnersuisartutut sulisimanera pillugu Nersornaammik sølviusumik nersornaaserneqarpoq. Mimi Karlsenip oqalugiarnermini Madsenip erinarsoqatigiinni aqutsisutut, timersoqatigiiffimmi KUGSAK-imi sulisutut kiisalu SIP-imi sulisartut kattuffianni sulisutut sulisimanera nersualaarpaa.
- Ukiorpassuarni qasusuilluinnarlutit ilagiit sinniisaannik sullissisimavutit maanilu najukkami annertunerusumik aaqqissuussisoqassatillugu ikiuunnissannut tunuarsimaarneq ajorputit,
soorlu aamma pissusissamisuuginnartoq inuiaqatigiinnik sullisserusunnerit ingerlatiinnarakku utoqqaat peqatigiiffiata ingerlanneqarneranut peqataanikkut.
Ole Madseni nersornaaserneqarnermini oqalugiarnermini qujaniarluni oqaatigaa ataatsimoorneq namminerlu kajumissuseq atorlugu sulineq pingaaruteqartoq:
- Inuunermi inuttut suleqataasussanngorluta inunngortitaasimavugut. Uangulli nammineq aalajangertussaavarput taamaaliussanerluta taamaaliussannginnerlutaluunniit.