Ombudsmandi: Ingerlatsinermi pissuserissaarneq unioqqutinneqarpoq
Kommuneqarfik Sermersooq atorfinitsitsinermut atatillugu ingerlatsinermi pissuserissaarnissamik unioqqutitsisimavoq. Ombudsmandi, innuttaasumit maalaaruteqarneq tunngavigalugu nammineq piumassutsiminik akuliunnermi kingorna, taama isumaqarpoq.
Kommuneqarfik Sermersooq pitsaasumik ingerlatsisimanngilaq, ombudsmandi isumaqarpoq.
Assi: Leiff Josefsen
“Kommuneqarfik Sermersuumit atorfiup aalajangersimasup inuttalerneranut atatillugu sulisunut inimik najugassamik tunisisoqarsimanera ajuusaarnarpoq, naak atorfiup inuttassarsiorneqarluni saqqummiunneqarani tamanna periarfissaasimanngikkaluartoq”, ombudsmandi, suliamik naammassinneqqammersoq suliamillu tamanut saqqummiusseqqammersoq, taama isumaqarpoq.
- Kommunip atorfik inuttassarsioqqissimagaluarpagu ingerlatsinermi pissuserissaarnissami naapertuunnerpaasimassagaluartoq isumaqarpunga, atorfik pineqartoq peqatigitillugu inimik najugassamik neqerooruteqanngikkaanni inuttalerneqarsinnaanngitsoq paasinarsimmat, ombudsmandi oqarpoq.
Ineqarnermut tunngatillugu pissutsit ilungersunartut
Akerlinganik Kommuneqarfik Sermersooq isumaqarpoq, qinnuteqartuni piukkunnarnerpaap atorfinitsinneqarnissaa kommunip pingaartikkaa, aammalu pisortat oqartussaatitaanni isertuaatsumik atorfinitsitsinerit pisassasut.
Illoqarfiit pingaarnersaanni ineqarnermut tunngatillugu pissutsit ilungersunarput, taamaattumik ombudsmandi apeqqummik tunngaviusorujussuarmik suliaqarpoq.
Apeqqutaavormi suliffissarsiortut atorfissaminnut isumaqatiginninniuteqarsinnaanersut, atorfimmut allagarsiussaq ersarissumik ima allassimappat: “Atorfimmut tamatumunnga inimik neqerooruteqartoqanngilaq”, tamannalu pissutigalugu inuppassuit qinnuteqarumanavianngillat, naak atorfimmut qinnuteqarumallutik piumassuseqaraluarlutik piukkunnaateqaraluarlutillu.
Atorfiup inuttassarsiukkap saqqummiunneqarnerani atugassarititaasut allaaserinissaat eqqumaffigineqartoq Kommuneqarfik Sermersuup ombudsmandimik oqaloqateqarnermini oqaatigaa, tamatuma kingunerisinnaammagu kina atorfimmut qinnuteqarnersoq aamma atorfimmut qassit qinnuteqarnersut.
Allatut oqaasiliortoqarnissaa piumasarineqarpoq
- Atorfimmut sapinngisamik siammasissumik soqutiginnittoqarnissaa qulakkeerniarlugu inissamut apeqqutip imatut allaaserineqarsinnaanera siunertamut naleqquttuusinnaavoq: Pissutsit apeqqutaatillugit inimik tunisisoqarsinnaavoq imaluunniit assigisaanik oqaasertalersukkamik, taamaalilluni kommuni atorfimmut atatillugu inimik tunisisussanngortinneqassanngilaq imaluunniit tamanna mattunneqassanani, kommuni ombudsmandimut allappoq, nangillunili:
- Taamatulli periuseqarneq pingaarnertut periarfissaanngilaq isumaqatigiissutit malillugit atorfinitsitsinermi.
Naggassiut
Ombudsmandip suliaq ima naggaserpaa:
- Maluginiarpara kommunip oqaaseqaatimini 11. maj 2023-meersumi uannut ilaatigut oqaatigimmagu, kommuni isumaqarmat pingaaruteqartoq qinnuteqartuni piukkunnarnerpaaq atorfinitsinneqassasoq aammalu pisortat oqartussaatitaanni isertuaatsumik atorfinitsitsinerit pisassasut.
- Kommunip oqaaseqaataa tusaatissatut tiguara, tamannalu tunngavigalugu suliaq pillugu allamik iliuuseqaqqissanngilanga.
