Ombudsmandi: Kommune Kujalliup innuttaasumut aalajangiinermini oqaatsit atugai ajuusaarnarluinnartut
Kommune Kujallermi arnaq meeqqanut tunngasumik suliami ingerlatsivimmit inussiarniitsumik naleqqutinngitsumillu pineqarpoq, Inatsisartut Ombudsmandia naliliivoq.
Kommuni kujalleq Qaqortumit aqunneqarpoq, suliarli kommunip sortaani pinersoq ilisimatitsissutigineqanngilaq.
Toqqorsivimmit assilisaq
Pisortat oqartussaatitaat inussiarnersumik aamma qajassuartumik innuttaasumut pissuseqassapput. 2023-mili apriilimi Kommune Kujallermi innuttaasumut tunngatillugu tamanna sumiginnarneqarpoq.
Taamatut inerniliivoq Inatsisartut Ombudsmandiat niviarsiaqqamik angerlarsimaffiup avataanut inissinneqarnissamik kommunip aalajangiinera misissoreerlugu.
- Meeraq pingasuinnarnik ukiulik allaat suna toqqissisimanarnerunersoq nammineq aalajangiisinnaasutut isigisinnaagakku naliliinerput naapertorlugu assut isumakulunnarpoq, taamani Kommune Kujalleq niviarsiaqqap arnaanut allappoq.
- Meeqqavit isumannaatsumik sutigut tamatigut inerikkiartorlutik inuuneqarnissaat salliunnagu, angutit assigiinngitsut aapparilertarnissaat pissutigalugu meeqqavit pisariaqartitaanik isumaginnissimannginnerit pissutigalugu meeqqat immikkut pisariaqartitsilersimammat ikiorsiivigineqartariaqarpoq, aalajangiinermi nangilluni allassimavoq.
Oqaatsilli taamaattut nikaginninnerupput pisariaqanngitsumillu ajuallatsitsinerullutik, aamma oqartussaasunut tatiginnikkunnaassutaasinnaapput, ombudsmandi isumaqarpoq.
Kommune Kujalleq: Ataasiaannarluni pisoq
Aamma isumaginninnermi peqquserluuteqarnissamik kommuni innuttaasumik pasinarsaasoorsimasoq ombudsmandi isumaqarpoq.
- Ombudsmandi isumaqarpoq aalajangiinermi oqaatsit atorneqarsimasut ingerlatsinermi pissuserissaarnissamut atatillugu, pisortat oqartussaatitaatut innuttaasup tungaanut oqaatigineqarsimasut periuutsinut naapertuutinngitsut. Ombudsmandip paasinninnera naapertorlugu, tamaat isigalugu inussiarniillisaarnerullunilu nikassaanertut nipaqartinneqartoq. Tamanna ombudsmandimit ajuusaarnartorujussuartut isigineqarpoq, Ombudsmandi allappoq.
Suliaq pitsaanerusumik ingerlanneqarsimasinnaagaluartoq, kommunip ombudsmandimut akissummini nammineq uppernarsarpaa:
- Kommune Kujalleq sutigut tamatigut ingerlatsinermi pissuserissaarnissamik malinninniarsarivoq, taamaalilluni innutaasumut tatigeqatigiinneq siunertarineqartoq anguneqassalluni – tassunga ilanngullugu angjaoqqaaq pineqartoq. Taamaattumik aalajangiineq pineqartoq ataasiaannarluni pisutut isigineqartariaqarpoq, Kommune Kujalliup siunertarisaanut, tassalu innuttaasumik ajunnginnerpaamik suleqateqartoqartariaqarnermik malinninngitsoq.
