KALAALLIT NUNAANNI ANGERLARSIMAFFIUP AVATAANUT INISSIINERIT
Ombudsmandi kommuninut inatsisiliortunullu: Eqqaamassavarsi inuit pineqarput
Inatsisartut ombudsmandiata meeqqanik angerlarsimaffiup avataanut inissiisarnerit pillugit suliaq sivisuallaarujussuartoq pillugu sakkortuumik kommunimut isornartorsiuivoq. - Sulianik ingerlatsineq pisariaqanngitsumik sivitsorsaasoqartussaanngilaq, inatsisit malinneqassapput aammalu eqqaamaneqassaaq inuit pineqarmata, Inatsisartut Ombudsmandiata, Gedion Jeremiassenip eqqaasitsissutigivaa.
Ombudsmandip arlaleriarluni nalaattarpaa meeqqanik angerlarsimaffiup avataanut inissiisarnernut tunngatillugu pisortat pitsaasumik aqutsinissamik malinninngitsut. - Maanna kommunip taama ittunik suliaqarnermi kukkussutai kingunerisinnaasai assilianngorlugu takutippara, maannakkullu politikkikkut isummerfigisssanngorpoq naapertuilluartumik, eqqortumik inuppalaartumillu suliarinninnissamik qulakkeerinniarneq sukateriffigieqassanersoq, Inatsisartut Ombudsmandiat Gedion Jeremiassen Sermitsiamut oqarpoq.
Assiliisoq: Leiff Josefsen
Inatsisartut ombudsmandiata Kommune Qeqertalik meeqqanik inissiisarnernut tunngasumik suliami suliap ingerlanneqarneranut sakkortuumik isornartorsiuivoq.
Taassuma nalilerpaa kommunip suliap ingerlanneqarneranut ukiut qulit sinnerlugit atorsimammagit akuersaarneqarsinnaanngitsoq, tamatumami kingunerisaanik suliaq suli naammassineqanngitsoq meeqqat pineqartut inersimasutut ukioqalermata, angajoqqaallu ukiuni arlalinngortuni meeqqani angerlartinneqarnissaat pillugu akiuuttarsimasoq toqukkut qimagussimavoq, kommuni suliaq pillugu suli aalajangiinngitsoq.
- Suliat taamaattut, tassa kommuninit sivitsorsarneqartartut uteqqiasumik naammattoortarpagut. Ombudsmandip tungaanit kissaatigaarput suliat, pingaartumik inuit, matumanilui ilaqutariit pillugit suliat, ilaqutariit ataqqillugit pisariaqanngitsumik sivitsorsarneqartassanngitsut, aamma inatsisitigut suliat qaqugu naammassineqareersimanissaannik inatsisitigut piffissaliussaqanngikkaluarpalluunniit.
Suliat meeqqanut tunngassuteqartut sapinngisamik qaammatit pingasut qaangiutsinnagit naammassereerneqartarnissaat kissaatiginartoq
Ombudsmandi oqaaseqaatimini erseqqissaateqarpoq suliat meeqqanut ilaqutaannullu tunngassuteqartut qaammatini marlussunni suliarineqarnissaat, sivisunerpaassappallu pingasunili naammassineqarnissaat kissaatiginartoq. Kisianni suliami matumani pineqartumi suliap ingerlanneqarnera ukiut qulit sinnerlugit sivisussuseqarpoq.
- Suliami matumani pineqartumi assersuutitut ersersinneqarpoq qanoq annertutigisumik sulianik sivitsorsaasoqarsinnaasoq, tassanilu ersersinneqarpoq eqqaamaneqartariaqartoq inuit aaqqissuussaanermi pineqarmata, Gedion Jeremiassen oqarpoq.
Ombudsmandip erseqqissaatigaa Ombudsmandeqarfik mianersortumik aammalu pissutissalimmik isornartorsiuisartoq. Kisianni isornartorsiuineq una Kommune Qeqertalikimut maanna sammitinneqartoq sakkortunerpaajusoq aammalu qaqutigoortuusoq.
- Naliliinera naapertorlugu suliap ingerlanneqarsimanera arlaannaatigulluunniit illersorneqarsinnaanngilaq, taamatullu sakkortutigisumik isornartorsiuineq qaqutigorujussuaq pisarpoq. Ombudmandeqarfik taamak sakkortutigisumik kingullermik isornartorsiuivoq 1999-imi, tassa ukiut 26-it matuma siornatigut.
Maanna politikerit suliassarilerpaat
Suliap matuma inatsisilerinermi allannguinissamut pissutissaqalersitsinersoq pillugu Ombudsmandi isummersuummik saqqummiussaqanngilaq:
- Politikerit tamanna isummerfigalugulu iliuuseqarfigissagunikku namminneq aalajangigassaraat, tassa suliap isornartorsiorneqarluarnerata inatsisilerinermut imaluunniit malittarisassanik allannguinissamut pissutissaqalersitsinersoq. Kisianni Inatsisartut inatsisinut ataatsimiititaliaanut siunnersuuteqarnissamut piareersimavunga, ataatsimiititaliap tamanna kissaatigissappagu.
Kisianni inatsisilerinermi piffissaliussanik aalajangersaasoqarsimanngilaq suliat taamaattut qaqugu naammassineqassanersut? Aamma qanoq nalilerpiuk angajoqqaajusup matumani pineqartup ukiut qulit sinnerlugit qitornaminik angerlartitsiniarsimagaluartup suliap ingerlanera pillugu paasissutissinneqartarsimannginnera?
- Ataatsimut isigalugu, ukiut qulit sinnerlugit suliap ingerlanneqarsimanera akuerineqarsinnaanngilaq, taamaattorli isumaga malillugu ajornakusoorpoq aalajangersimaqqissaartunik piffissalersuinissaq, pissutigalugu suliat ilaanni piffissaqarluarnissaq pisariaqartinneqarsinnaasarmat, sulianilu allani suliat piffissamik sivisunngitsumik atuilluni naammassineqarsinnaasarmata, tamannali aamma politikkikkut isummerfigineqarsinnaasut ilagaat.
- Kisianni suliap ingerlanera pillugu angajoqqaajusup ilisimatinneqartarsimannginnera isornartorsiuininni ilaavoq, tassami eqqaamaneqassaaq inuit pineqarmata, matumanilu ilaqutariit pineqarmata, aammalu aqutsinermut tunngatillugu ileqqorissaarnissamik pisussaaffik naapertorlugu kiisalu inatsisinut innersuussutigalugu, kommunip minnerpaamik paasissutissanik ersarissunik aammalu piffissaliussamik piviusorsiortumik pineqartumut ilisimatitsisarnissaa pingaaruteqarpoq, pineqartut qanoq naatsorsuutiginnissinnaanissaminnut ilisimasaqarnissaat qulakkeerneqartariaqarmat.
Naggataatigut Inatsisartut Ombudsmandiata naqissuserpaa napparsimasoqarnera pissutaalluni kommunimit suliap unitsinneqarnissaanut inatsisitigut pissutissaqanngitsoq, aammalu kommunip piumasarisinnaanngikkaa angajoqqaap allakkatigut qinnuteqaqqaarnissaa meeqqatik angerlaassinnaajumallugit, matumanilu Kommune Qeqertalik suliami pineqartumi arlaleriarluni piumasaqaateqarsimasoq inatsisitigut piumasaqaataanngikkaluartoq.
