KALAALLIT NUNAANNI ANGERLARSIMAFFIUP AVATAANUT INISSIINERIT
Inissiinermut suliami ombudsmandi kommunimut sakkortuumik isornartorsiuivoq
Inatsisartut ombudsmandiat, Gedion Jeremiassen Kommune Qeqertaliup meeqqanik angerlarsimaffiup avataanut inissiinermut tunngatillugu Kommune Qeqertaliup suliamik ingerlatsisimanera "akuerineqarsinnaanngitsoq" naqissusiivoq, suliarlu Inatsisartut inatsisit atuutsinneqarnerannut ataatsimiititaliamut ingerlateqqippaa. Matumani pineqarpoq angajoqqaap ukiut qulit sinnerlugit meeqqani marluk angerlartinniarlugit tamaviaarsimanera.
Inatsisartut ombudsmandia isumaqarpoq Kommune Qeqertalikip suliassaqarfiani piffissap sivisunerujussua inerteqqutaasoq angajoqqaat meeqqamik angerlarsimaffimmut utertinnissaat pillugu qinnuteqaataat suliarineqarmat. Ombudsmandip maanna suliaq Inatsisartuts inatsisilerituunut nalunaarutigaa.
Assiliisoq: Leiff Josefsen
Meeqqat marluk inissinneqarsimasut angajoqqaavat ukiut qulit sinnerlugit, 2012-imiilli meeqqani, angerlarsimaffiup avataanut inissinneqarsimasut angerlaassiniarlugit tamaviaarsimavoq. Meeqqat pingajuat piffissaap sivikitsup iluani angerlartissallugu iluatsissimavaa. Taamaammallu meeqqat pingajuat Inatsisartut Ombudsmandiata suliamik misissuinermini ilanngullugu misissuiffiginngilaa.
Meeqqalli matumani pineqartut angerlarsimaffiup avataanut inissinneqarsimasut marluusut aappaa januaarimi 2022-mi 18-inik ukioqalersimavoq, aappaalu decembarimi 2024-mi 18-inik ukioqalersimalluni. Angajoqqaajusoq meeqqani angerlartinniarlugit tamaviaartoq maajimi 2024-mi toqukkut qimagussimavoq.
Taamaalilluni angajoqqaajusup taassuma meeqqani marluk nammineq perorsarsinnaasimanngilai, massa ukiorpassuarni meeqqani angerlartinniarlugit tamaviaarsimagaluarluni.
- Naak noqaassuteqartuartaraluartoq meeqqani 18-iniliitinnagit angerlartinneqassasut, kommune aalajangiissuteqarsimanngilaq , Inatsisartuts ombudsmandia oqarpoq.
Kommunip allakkatigut qinnuteqaat piumasaraa, kingornalu suliap unitsinneqarnissaa aalajangiullugu
Angajoqqaajusoq kommunimut arlalippassuariarluni saaffiginnittarsimavoq, angerlartitsinissamik qinnuteqarluni. Kisianni kommunip angajoqqaajusumut piumasaqaatit nutaat saqqummiutiinnartarsimavaat, ilaatigut allakkatigut qinnuteqarnissamik piumasaqaateqarfigalugu, meeqqani angerlartissagunigit pilersaarusiornerit ilanngullugit naammasseqqaassagai, kisianni ilaqutariit ataatsimuuleqqinnissaanik kinguneqarsiminngilaq, naggataatigullu kommunip nalunaarutigaa, kommunimi sulisut napparsimasut pissutigalugit suliaq unitsinneqarsimasoq.
Suliaq pillugu nassuiaasiamini Ombudsmandi allappoq kommuni inatsisitigut tunngavissaqanngitsoq piumasaqassalluni, angajoqqaatut oqartussaassusillip allakkatigut qinnuteqaateqartariaqarneranik, kiisalu ombudsmandip kommunip inatsisitigut tunngavissaqanngitsumik suliaq unitsissimagaa.
Ombudsmandip taakku marluusutut isummerfigai sakkortuumik isornartorsiorneqartariaqartut.
Kiisalu Ombudsmandi naggataatigut inerniliivoq, suliamut pingaarutillit kukkunerit annertuut pisimasut, taamaattumillu Inatsisartut inatsisit atuutsinneqarnerannut ataatsimiititaliaanut kommunalbestyrelsimullu Ombudmandi pillugu inatsimmi § 23 naapertorlugu nalunaarutiginnissimalluni.
Kommunep nassuiaatini allanngortippaa
Taannaannaanngilarli, angajoqqaarmi meeqqaminik angerlartinnissaanik sulissutiginnittoq, suliap ingerlanera taassumalu killiffia pillugit nalunaarfigineqanngisaannarsimavoq.
Ombudsmandip oqaaseqaataani ersarissumik oqaatigineqanngilaq meeqqanik inissiineq angajoqqaat akuersiteqqaarnagit pinngitsaaliilluni inissiinerusimanersoq imaluunniit angajoqqaatut oqartussaasup akuersissuteqarneratigut inissiinerit pisimanersut.
Taamaakkaluartoq suliap angajoqqaat akuersiteqqaarnagit inissiinissamik suliarineqarsimasutut isikkoqarpoq, februaarimi 2021-imi angajoqqaap oqaaseqaataa taamak paasineqarsinnaammat, " A-p oqaatigaa, misigisimalluni meeqqani annaavissimallugit tigoqqissinnaanagillu, aammalu susoqarneranik oqarfigineqarnani meeqqat imminerminiik peersitaasimasut."
Angajoqqaap meeqqani angerlarsimaffimmut utertinniarlugit sorsunnera nukinnik atuilussinnarnerusimasoq kingusinnerusukkut ersersinneqarpoq, tassami apriilip 2024-mi angajoqqaaq kommunimit allakkatigut paasissutissanik kiisami pissarsivoq:
- Kommune allakkatigut 24. april 2024-meersutigut A-mut (angajoqqaajusumut, aaqq.) nalunaaruteqarpoq, kommune 2013-imi angerlartitsinissap itigartitsissutigineqarnera pillugu oqaasiinnakkut aalajangiisimasoq. A ilitsersorneqarpoq, iliuusissatut pilersaarummi anguniagassat anguneqarpata meeqqat angerlartinneqarnissaannik qinnuteqaqqissinnaasoq. Naggataatigullu kommunimit oqaatigineqarluni, kommunimi sulisut napparsimallutik sulisimanngitsut, taamaalillunilu A-p angerlartitsinissamik noqqaassutai uninngatiinnarneqarsimasut, ombudsmandip nassuiaammini oqaatigaa.
Oqaatigineqareersutullu angajoqqaq tamaviaarsimagaluartoq maajip 23-ani 2024-mi toqukkut qimaguppoq, tassa nalunaarummik taassuminnga tunineqareerluni qaammat ataaseq qaangiummat.
