Oqaasileriffik nittartakkamik nutaamik saqqummersitsivoq
Nunat aqqinik pisortatigoortumik akuerisanik 33.000-it missaanniittunik imalimmik Oqaasileriffik nittartagartaarpoq.
Kalaallit Nuunaanni nunat aqqi pisortatigoortumik akuerisat 33.000-it missaanniittut nittartagaq nutaaq atorlugu
ujarneqarsinnaalerput.
Assiliisoq: Oqaasileriffik / www.nunataqqi.gl
Nittartagaq nutaaq qarasaasiatigut oqarasuaatitigullu angallattakkatigut iserfigalugu atorneqarsinnaavoq, nunallu ujarniakkap aqqa allallugu, imaluunniit nunap assinga qanillisillugu nunat aqqinik sumiiffinnillu ujaasisoqarsinnaavoq.
Nittartagaq pillugu tusagassiuutinut nalunaarummi Oqaasileriffik ima paasissutissiivoq:
- Nittartakkami sumiiffiit ataasiakkaat toorlugit paasissutissat sukumiinerusut pissarsiarineqarsinnaapput. Assersuutigiinnarlugu Oqaatsut ujarniarlugu allakkutsigu periarfissat arlallit saqqummissapput. Ilaat Avannaata Kommunianiittoq toorutsigu paasissavarput Oqaatsut tassaasoq najugaqarfiusimasoq allamiusullu ateqartoq Rodebay. Nunat aqqi najugaqarfiusinnaapput, qaqqaallutik, ikkarluullutik, iterlaallutik il.il.
Kulturi kinaassuserlu
Nunatsinni nunat aqqi kulturitta ilagigaat inuiattullu kinaassutsitsinnik oqaluttuartuusut, Oqaasileriffik naqissusiivoq.
- Inuit pinngortitaq piniarfigalugu inuuffigivaat angallavigalugulu, taamaattumik nunat aqqi inuit sulerisarsimanerannik oqaluttuanik nassuiaatinillu ulikkaarput. Assersuutigalugu piniariarfiit, sumiissusersiorneq, susoqartarsimanera nunallu isikkua malillugit atsiisoqartarsimavoq, soorlu Eqaluit, Kitsissut, Upernivik aamma Saattut, Oqaasileriffik paasissutissiivoq.
Nittartagaq ataavartumik ineriartortinneqarlunilu nutarsarneqartassasoq ilisimatitsissutaavoq.
