KL

DK

Oqaluttuarisaanermi pisoq tassunga killeqarpoq: Atuagkat ukiut 58-it ammareerluni matuvoq

Atuakkanik pisiniarfik Atuagkat ullumi pingasunngornermi naggataamik ammavoq. Ukiorpassuarni pisisartuusimasut qutsaviginiarlugit ualikkut kaffillertoqassaaq.

Atuagkat ullumi pingasunngornermi nal. 17.30 matussaaq.
KASSAALUK KRISTENSEN
Digitalredaktøri
Saqqummersinneqarpoq

Atuagkat ukiuni 60-ingajanni atuarumatuunut atuakkanik Nunatsinneersunik nunanuullu allaneersunik pilersuisuuvoq. Tamannalu maanga killeqarpoq. Atuagkat ukiut 58-ini ammareerluni ullumi pingasunngornermi januaarip 15-ianni naggataamik ammavoq.

Atuakkanik naqiterivik Atuagkat maajip tallimaanni 1966-imi aallartippoq. Kalaallisut atuakkiat amerlanerusut saqqummersinneqartalernissaat taamani siunertarineqarpoq. Atuagarpassuarnik Nuummi, Kalaallit Nunaata sinnerani Danmarkimilu tuniniarneqartussanik tunisassiortarsimavoq.

- Taamanikkut maannatut kalaallit atuakkiortorpassuupput, atuakkallu nunanit allaneersut nuannarineqarluartut kalaallisuunngortinneqartarlutik. Atuagaarniarfik iluatsilluarpoq, taamaalillunilu oqaatsit, oqaluttuarisaaneq kulturilu siammarterneqarnerannut aqqutaalluni, Atuagkat matunermut atatillugu Facebookimi quppernermini allappoq.

Atuagaarniarfiit amerlanerulernissaat neriuutigigaat

Dorthe aamma Claus Jordening Atuagkat 2005-imi pigilerpaat. Piginnittuusut peqqiilliornertik pissutigalugu Danmarkimut nuunniarlutik aalajangersimapput, tamatumunngalu atatillugu atuagaarniarfik tuniniarneqaraluarluni – nutaamilli piginnittussarsinngilaq.

- Tamanna uagutsinnut aliasuutaangaarpoq, pisiniarfimmi atuakkanillu suliaqarneq nuannarilluaratsigit. Pisiniat issiaqatigalugit kaffisoqatigalugit atuakkiat, inuiaqatigiinni pissutsit itsarlu pisimasut pillugit oqaloqateqarneq aamma nuannertarluni, allapput.

Kalaallit Nunaanni atuagaarniarfimmik allamik ammaasoqarnissaa aappariit neriuutigaat, taamaalilluni atuakkat kalaallisut saqqummersinneqartaleqqillutillu tuniniarneqarsinnaalissammata.

Atuagaarniarfik Atuagkat ullumi pingasunngornermi nalunaaqutaq 17.30 matussaaq. Piginnittut pisinianut kingullernut kaffillissapput.

kultur atuagkat boghandel inuiaqatigiit nuuk bøger

ATORFIIT Se alle jobs

Powered by Labrador CMS